Romatɔwo 4:1-25

4  Esi wòle alea ɖe, ekema nya kae míagblɔ tso Abraham, ame si nye mía tɔgbui le ŋutilã nu, la ŋuti?  Ne, le kpɔɖeŋu me, ɖe wobu Abraham be ele dzɔdzɔe le dɔwɔwɔwo ta la, anye ne ekpɔ mɔ aƒo adegbe hafi; gake menye le Mawu gbɔ ya o.  Elabena nya kae ŋɔŋlɔ la gblɔ? “Abraham ɖee fia be yexɔ Yehowa dzi se, eye wobui dzɔdzɔenyenye nɛ.”  Womebua dɔwɔla ƒe fetu abe amenuveve ene o, ke boŋ abe fe si wonyi le eŋu ene.  Gake le ame si mewɔa dɔ o, evɔ wòxɔa ame si bua ame mavɔ̃mawu be enye ame dzɔdzɔe la dzi sena gome la, wobua eƒe xɔse la dzɔdzɔenyenye.  Abe ale si David hã ƒo nu tso dzidzɔ si ame kpɔna ne Mawu bu dzɔdzɔenyenye nɛ dɔwɔwɔwo manɔmee ŋu la ene, be:  “Dzidzɔtɔwoe nye ame siwo ƒe sedzimawɔmawɔ nuwɔnawo wotsɔ ke, siwo ƒe nu vɔ̃wo dzi wotsyɔ nu la;  dzidzɔtɔe nye ame si ƒe nu vɔ̃ Yehowa mabu nɛ kura o.”  Ekema ɖe dzidzɔkpɔkpɔ sia vana aʋatsotsotɔwo dzi loo alo evana aʋamatsomatsotɔwo hã dzia? Elabena míele gbɔgblɔm be: “Wobu Abraham ƒe xɔse dzɔdzɔenyenye nɛ.” 10  Ekema nɔnɔme kawo mee wobui nɛ le? Esime wotso aʋa nɛ loo, alo esime wometso aʋa nɛ o? Menye esime wotso aʋa nɛ o, ke boŋ esime wometso aʋa nɛ o. 11  Eye wòxɔ dzesi, si nye aʋatsotso, abe dzɔdzɔenyenye ƒe nutrenu ene to xɔse si nɔ esi le eƒe aʋamatsomatso ƒe nɔnɔmea me la me, bene wòanye fofo na ame siwo katã si xɔse le togbɔ be wometso aʋa na wo o hã, bene woabui dzɔdzɔenyenye na wo; 12  kple fofo na dzidzimevi siwo wotso aʋa na, menye na esiwo lé ɖe aʋatsotso ŋu la ɖeɖe ko o, ke na esiwo zɔna le ɖoɖo nu le xɔse ma, si nɔ mía fofo Abraham si esi wometso aʋa nɛ o la, ƒe afɔɖoƒewo la hã. 13  Elabena menye to se mee Abraham alo eƒe dzidzimevi la xɔ ŋugbedodo le be wòanye xexe aɖe ƒe domenyila o, ke boŋ dzɔdzɔenyenye si su esi to xɔse me la mee. 14  Elabena ne ame siwo lé ɖe se ŋu la nye domenyilawo la, ekema wona xɔse zu nu si ŋu viɖe mele o, eye woɖe ŋugbedodo la ɖa. 15  Le nyateƒe me la, Se la hea dziku vanɛ, gake afi si se mele o la, sedzidada hã menɔa anyi o. 16  Eya ta xɔse mee wòtso, bene wòanɔ te ɖe amenuveve dzi, ale be kakaɖedzi nanɔ ŋugbedodo la ŋu na eƒe dzidzime blibo la katã, menye na esi léna ɖe Se la ŋu ɖeɖe ko o, ke na esi léna ɖe Abraham ƒe xɔse ŋu la hã. (Mí katã mía fofoe, 17  abe ale si woŋlɔe ɖi ene be: “Meɖo wò dukɔ geɖewo fofo.”) Ame si dzi wòxɔ se, si nye Mawu, la ŋkumee esia dzɔ le, eya, ame si gbɔa agbe ame kukuwo, eye wòyɔa nu siwo meli o la abe ɖe woli ene. 18  Togbɔ be naneke menɔ anyi si ta mɔkpɔkpɔ nanɔ esi o hã la, le mɔkpɔkpɔ ta la, xɔse nɔ esi, bene wòazu dukɔ geɖewo fofo le nya si wogblɔ ɖi la nu, be: “Aleae wò dzidzime anɔ.” 19  Eye togbɔ be megbɔdzɔ le xɔse me o hã la, ebu ye ŋutɔ ƒe ŋutilã ya be eku xoxo ɣemaɣi, esi wònye exɔ ƒe alafa ɖeka kloe ta, eye Sara ƒe vidzidɔ hã ku. 20  Gake le Mawu ƒe ŋugbedodo ta la, meke ɖi le dzimaxɔse ta o, ke boŋ ŋusẽ ɖo eŋu to eƒe xɔse me, eye wòtsɔ ŋutikɔkɔe na Mawu, 21  eye wòka ɖe edzi bliboe be, nu si ŋugbe wòdo la, ate ŋu awɔe hã. 22  Esia tae “wobui dzɔdzɔenyenye nɛ” ɖo. 23  Gake menye eya ɖeɖe ko tae woŋlɔe ɖi be ‘wobui nɛ’ o, 24  ke le mí ame siwo woava bui na la hã tae, elabena míexɔa ame si fɔ Yesu, mía Aƒetɔ la, tso ame kukuwo dome la dzi sena. 25  Wotsɔe na ɖe míaƒe vodadawo ta, eye wofɔe ɖe tsitre, bene woabu mí ame dzɔdzɔewoe.

Etenuŋɔŋlɔ