Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Romatɔwo 2:1-29

2  Eya ta Oo ame, susu aɖeke meli si ta nàdo taflatsɛ agblɔ be eya tae yedrɔ̃a ʋɔnu ɖo o, ame ka kee nèɖanye o; elabena nu si me nèdrɔ̃a ʋɔnu ame bubu le la mee nèbua fɔ ɖokuiwò le, esi wònye wò ame si drɔ̃a ʋɔnu la, wò ŋutɔ hã èwɔa nu mawo ke ta.  Ke míenyae be Mawu ƒe ʋɔnudɔdrɔ̃, si le nyateƒe la nu la, li na ame siwo wɔa nu siawo.  Gake, Oo ame, esi nèdrɔ̃a ʋɔnu ame siwo wɔa nu siawo, evɔ wò ŋutɔ hã nèwɔa wo la, ɖe nèsusuna be yeasi le Mawu ƒe ʋɔnudɔdrɔ̃ nua?  Alo ɖe nèdoa vlo eƒe dɔmenyonyo kple dzidodo kpakple dzigbɔgbɔ blewu geɖe la, le esi mènya be Mawu ƒe dɔmenyonyo lae le didim be yeakplɔ wò ayi dzimetɔtrɔ gbɔ o taa?  Gake le wò dzimesesẽ kple wò dzimematrɔmatrɔ ta la, èle dziku dzram ɖo ɖi na ɖokuiwò hena dziku kple Mawu ƒe ʋɔnudɔdrɔ̃ dzɔdzɔe ɖeɖe fia ƒe ŋkeke la.  Eye aɖo eteƒe na ame sia ame ɖe eƒe dɔwɔwɔwo nu:  agbe mavɔ na ame siwo le ŋutikɔkɔe kple bubu kple magblẽmagblẽnyenye dim to dzidodo le dɔ nyui wɔwɔ me dzi;  gake le ame siwo lɔ̃a dzrewɔwɔ, eye womeɖoa to nyateƒe la o, ke boŋ woɖoa to madzɔmadzɔnyenye gome la, dziku kple dɔmedzoe,  xaxa kple vevesese, ava ame sia ame si wɔa nu vɔ̃ɖi la ƒe luʋɔ dzi, Yudatɔ tɔ dzi gbã, kple Helatɔ tɔ hã dzi; 10  gake ŋutikɔkɔe kple bubu kple ŋutifafa ava na ame sia ame si wɔa nu nyui la, Yudatɔ gbã, kple Helatɔ hã. 11  Elabena ameŋkumekpɔkpɔ aɖeke mele Mawu gbɔ o. 12  Le kpɔɖeŋu me, ame siwo katã wɔ nu vɔ̃ esime se menɔ wo si o la atsrɔ̃ togbɔ be se menɔ wo si o hã; gake ame siwo katã wɔ nu vɔ̃ le se te la, woatsɔ se adrɔ̃ ʋɔnu wo. 13  Elabena menye ame siwo sea se lae nye ame dzɔdzɔewo le Mawu ŋkume o, ke boŋ ame siwo wɔa se dzi ye woabu ame dzɔdzɔewoe. 14  Elabena ɣesiaɣi si dukɔ siwo si se mele o la me tɔwo wɔ nu si se la bia le dzɔdzɔme nu la, togbɔ be se mele ame siawo si o hã la, wozu se na wo ɖokuiwo. 15  Ame siawo tututue ɖee fia be woŋlɔ se la ƒe gɔmeɖosewo ɖe yewoƒe dziwo me, esi woƒe dzitsinya le ɖase ɖim kpe ɖe wo ŋu, eye le woawo ŋutɔwo ƒe tamesusuwo me la, wole wo nɔewo nu tsom alo le afia tsom na wo be wo tɔ dzɔ. 16  Esia adzɔ le ŋkeke si dzi Mawu ato Kristo Yesu dzi adrɔ̃ ʋɔnu amegbetɔwo ƒe nu ɣaɣlawo, le nya nyui si mele gbeƒã ɖemee nu la dzi. 17  Eya ta ne ŋkɔ le ŋuwò be ènye Yudatɔ, eye nèɖoa ŋu ɖe se ŋu hedana be Mawu le ye si, 18  eye nènya eƒe lɔlɔ̃nu, eye nèlɔ̃ ɖe nu siwo nyo wu sãsãsã la dzi le esi wofia Se la wò ta; 19  eye wona nèka ɖe edzi be yenye mɔfiala na ŋkuagbãtɔwo, kekeli na ame siwo le viviti me, 20  ame si ɖɔa ame masenugɔmewo ɖo, vidzĩwo ƒe nufiala, ame si si sidzedze kple nyateƒe la ƒe nɔnɔme si le Sea me la le la— 21  ekema wò, ame si le nu fiam ame bubu la, mèfiaa nu ɖokuiwò oa? Wò, ame si le gbeƒã ɖem be: “Mègafi fi o” la, wòe fia fia? 22  Wò, ame si le gbɔgblɔm be: “Mègawɔ ahasi o” la, wòe wɔa ahasia? Wò, ame si ɖenɛ fiana be trɔ̃wo nyɔa ŋu na ye la, wòe daa adzo gbedoxɔwoa? 23  Wò, ame si ƒoa adegbe le se ta la, ɖe nètoa Se la dzi dada me doa vlo Mawua? 24  Elabena “wole busunya gblɔm ɖe Mawu ƒe ŋkɔ la ŋu le dukɔwo dome le mia ta”; abe ale si woŋlɔe ɖi ene. 25  Le nyateƒe me la, ne èwɔa se dzi ko hafi viɖe le wò aʋatsotso ŋu; gake ne ènye sedzidala la, ekema wò aʋatsotso la trɔ zu aʋamatsomatso. 26  Eya ta ne aʋamatsomatsotɔ wɔa Se la ƒe nudidi dzɔdzɔeawo dzi la, ekema woabu eƒe aʋamatsomatso la aʋatsotsoe, alo? 27  Eye ne ame si nye aʋamatsomatsotɔ tso dzɔdzɔme la wɔa Se la dzi la, ekema adrɔ̃ ʋɔnu wò ame si si se si woŋlɔ ɖi la le, eye wotso aʋa na wò, gake nènye sedzidala. 28  Elabena menye ame si nye Yudatɔ le gota lae nye Yudatɔ o, eye menye nu si le gota le ŋutilã ŋu lae nye aʋatsotso o. 29  Ke boŋ ame si nye Yudatɔ le ememe lae nye Yudatɔ ŋutɔŋutɔ, eye eƒe aʋatsotso la nye esi woto gbɔgbɔ me tso na eƒe dzi, ke menye to se si woŋlɔ ɖi me o. Menye amewo gbɔe ame sia ƒe kafukafu tsona o, ke boŋ Mawu gbɔe.

Etenuŋɔŋlɔ