Dzo kpo yi emenuwo dzi

Dzo kpo yi emenuawo dzi

Romatɔwo 15:1-33

15  Ke hã, ele na mí ame siwo ŋu ŋusẽ le la be míatsɔ ame siwo ŋu ŋusẽ mele o la ƒe gbɔdzɔgbɔdzɔwo, eye be míaganɔ mía ɖokui ŋu dzem o.  Mina mía dometɔ ɖe sia ɖe nadze ehavi ŋu le nu si nyo hena etutuɖo la me.  Elabena Kristo la kura gɔ̃ hã medze eɖokui ŋu o; ke boŋ abe ale si woŋlɔ ɖi ene la: “Ame siwo nɔ vlo dom wò la ƒe vlodoamewo va dze dzinye.”  Elabena nu siwo katã woŋlɔ ɖi tsã la, woŋlɔ wo ɖi le míaƒe nufiafia ta, bene to míaƒe dzidodo kple akɔfafa si míekpɔna le Ŋɔŋlɔawo me dzi la, mɔkpɔkpɔ nasu mía si.  Ke Mawu si naa dzidodo kple akɔfafa la nena tamesusu ƒe nɔnɔme si tututu nɔ Kristo Yesu si la nanɔ miawo hã mia si le mia nɔewo dome,  bene miatsɔ tame ɖeka kple nu ɖeka ado mía Aƒetɔ Yesu Kristo ƒe Mawu kple Fofo la ɖe dzi.  Eya ŋuti mixɔ mia nɔewo, abe ale si ko Kristo la hã xɔ míi ene, hena Mawu ƒe kafukafu.  Elabena mele egblɔm be, le nyateƒe me la, Kristo va zu subɔla na ame siwo tso aʋa tsɔ ɖee fia be Mawu nye nyateƒetɔ, bene wòaɖo kpe ŋugbe siwo Mawu do na wo tɔgbuiwo la dzi,  eye bene dukɔwo nado Mawu ɖe dzi le eƒe nublanuikpɔkpɔ la ta. Abe ale si woŋlɔe ɖi ene be: “Esia tae makafu wò le dutoƒo le dukɔwo dome, eye madzi kafukafuha na wò ŋkɔ la.” 10  Eye wògagblɔ be: “Mi dukɔwo, dzi nedzɔ mi kpe ɖe eƒe amewo ŋu.” 11  Egagblɔ hã be: “Mikafu Yehowa, mi dukɔwo katã, eye amewo katã nekafui.” 12  Eye Yesaya gagblɔ be: “Isai ƒe ke anɔ anyi, eye ame aɖe atsi tsitre aɖu dukɔwo dzi; eya ŋue dukɔwo aziɔ woƒe mɔkpɔkpɔ ɖo.” 13  Mawu si naa mɔkpɔkpɔ la natsɔ dzidzɔ kple ŋutifafa katã ayɔ mi fũu le esi miexɔe se ta, bene mɔkpɔkpɔ nasɔ gbɔ ɖe edzi na mi le gbɔgbɔ kɔkɔe ƒe ŋusẽ me. 14  Ke nɔvinyewo, kakaɖedzi le nye ŋutɔ hã asinye le mia ŋu, be mia ŋutɔwo hã mieyɔ fũu kple nyuiwɔwɔ, abe ale si mieyɔ fũu kple sidzedze katã ene, eye be miate ŋu axlɔ̃ nu mia nɔewo hã. 15  Ke hã, metsɔ dzideƒo geɖe wu le nu ŋlɔm na mi tso nya aɖewo ŋu tẽe, abe ɖe megale ŋku ɖom wo dzi na mi ene, le amenuveve si wonam tso Mawu gbɔ la ta, 16  be manye Kristo Yesu ƒe dutoƒo subɔla na dukɔwo, eye mawɔ Mawu ƒe nya nyui la ƒe dɔ kɔkɔe la, bene nunana la, si nye dukɔ siawo, nadze eŋu, esi wotsɔ gbɔgbɔ kɔkɔe kɔ eŋu ta. 17  Eya ta susu si ta matso aseye le Kristo Yesu me, le nu siwo ku ɖe Mawu ŋu me la, le asinye. 18  Elabena atse mablem magblɔ nya aɖeke o, negbe ɖe wòkpe ɖe nu siwo Kristo wɔ to dzinye na dukɔwo be woaɖo to la ŋu; ewɔ esia to nye nya kple nuwɔna dzi, 19  le dzesiwo kple nukunuwo ƒe ŋusẽ me, le gbɔgbɔ kɔkɔe ƒe ŋusẽ me; ale be tso Yerusalem kple eƒe nutoa me godoo va se ɖe keke Iliriko ke la, meɖe gbeƒã nya nyui si ku ɖe Kristo la ŋu tsitotsito. 20  Ɛ̃, aleae meɖoe be, nyemagblɔ nya nyui la le afi si woyɔ Kristo ŋkɔ le xoxo o, bene nyemaganɔ etum ɖe ame bubu ƒe gɔmeɖoanyi dzi o; 21  ke boŋ abe ale si woŋlɔe ɖi ene la: “Ame siwo womegblɔ eŋu nya aɖeke na o la akpɔe, eye ame siwo mesee o la ase egɔme.” 22  Esia ŋuti hãe zi geɖe la, nyemekpɔ asinu va mia gbɔ o. 23  Gake esi teƒe aɖeke megale nuto siawo me, si nyemekpɔ ɖo o, eye esi wònye ƒe aɖewoe nye esia mele didim vevie be mava mia gbɔ 24  ne meva yina Spania ta la, mele mɔ kpɔm be aleke kee wòanɔ hã la, le nye afi ma yiyi me la, mava kpɔ mi ɖa, eye ne menɔ mia gbɔ wòɖi kɔ nam vie vɔ la, miaɖom ɖa vie ne mayi afi ma. 25  Gake fifia la, mele mɔ dze ge ayi Yerusalem be masubɔ ame kɔkɔeawo. 26  Elabena edze ame siwo le Makedonia kple Axaya la ŋu be, yewoama yewoƒe nuwo kple ame kɔkɔe siwo le Yerusalem la ƒe ame dahewo to nudzɔdzɔ aɖo ɖe wo dzi. 27  Nyateƒee, edzɔ dzi na wo be yewoawɔe alea, eye wonye woƒe fenyilawo hã; elabena ne dukɔwo kpɔ gome le woƒe gbɔgbɔmenuwo me la, ekema edze be woawo hã woatsɔ ŋutilãmenuwo asubɔ ame siawo. 28  Eya ta ne mekpɔ nu sia gbɔ, eye metsɔ kutsetse sia yi na wo dedie vɔ la, ekema mava to mia gbɔ ayi Spania. 29  Gawu la, menya be ne megbɔna mia gbɔ la, mava kple Kristo ƒe yayra ƒe agbɔsɔsɔme blibo la. 30  Azɔ mele nu xlɔ̃m mi, nɔviwo, to mía Aƒetɔ Yesu Kristo dzi, kple gbɔgbɔ la ƒe lɔlɔ̃ me, be miaʋli kpe ɖe ŋunye le gbedodoɖa na Mawu ɖe tanye me, 31  bene woaɖem tso dzimaxɔsetɔ siwo le Yudea la si me, eye bene subɔsubɔdɔ si wɔ ge meyina le Yerusalem la nadze ame kɔkɔeawo ŋu; 32  ale be ne metsɔ dzidzɔ va mia gbɔ to Mawu ƒe lɔlɔ̃nu me la, mía kple miawo siaa ƒe dzi nadze eme. 33  Mawu si naa ŋutifafa la nanɔ anyi kpli mi katã. Amen.

Etenuŋɔŋlɔ