Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Romatɔwo 14:1-23

14  Mixɔ ame si gbɔdzɔ le xɔse me la, gake menye be miatso nya me le ame bubu ƒe nya siwo mele ta kpɔm na o la ŋu o.  Xɔse le ame aɖe si be wòaɖu nu sia nu, gake amagbewo koe ame si gbɔdzɔ ya ɖuna.  Ame si ɖua nu la negado vlo ame si meɖua nu o la o, eye ame si meɖua nu o la negadrɔ̃ ʋɔnu ame si ɖua nu o, elabena Mawu xɔ ame ma.  Ame kae nènye, be nàdrɔ̃ ʋɔnu ame bubu ƒe aƒemesubɔvi? Ye ŋutɔ ƒe aƒetɔe wòle tsitre alo dze anyi na. Ɛ̃, woana wòatsi tsitre, elabena Yehowa ate ŋu ana wòatsi tsitre.  Ame aɖe bua ŋkeke aɖe be ele vevie wu bubu; ame bubu bua ŋkeke sia ŋkeke sɔsɔe; ame sia ame nekpɔ kakaɖedzi le ye ŋutɔ ƒe susu me.  Ame si bua ŋkeke la, ebunɛ na Yehowa. Eye ame si ɖua nu la, eɖunɛ na Yehowa, elabena edaa akpe na Mawu; eye ame si meɖua nu o la, meɖunɛ o le Yehowa ta, ke hã, edaa akpe na Mawu.  Le nyateƒe me la, mía dometɔ aɖeke mele agbe na eya ŋutɔ ɖokui ɖeɖe ko o, eye ame aɖeke mekuna na eya ŋutɔ ɖokui ɖeɖe ko o;  elabena ne míele agbe la, míele agbe na Yehowa, eye ne míeku la, míeku na Yehowa. Eya ta ne míele agbe alo míeku la, Yehowa tɔ ye míenye.  Elabena esia tae Kristo ku, eye wògagbɔ agbe ɖo, bene wòanye Aƒetɔ ɖe ame kukuwo kple ame gbagbewo siaa dzi. 10  Gake nu ka tae nèle ʋɔnu drɔ̃m nɔviwò? Alo nu ka tae wò hã nèle vlo dom nɔviwò? Elabena mí katã míava tsi tsitre ɖe Mawu ƒe ʋɔnudrɔ̃zikpui la ŋgɔ; 11  elabena woŋlɔ ɖi be: “Yehowa gblɔ be: ‘Zi ale si mele agbe la, klo sia klo abɔbɔ nam, eye aɖe sia aɖe aʋu eme be nyee nye Mawu.’” 12  Eya ta mía dometɔ ɖe sia ɖe abu akɔnta le ye ŋutɔ ɖokui ŋuti na Mawu. 13  Eya ta migana míanɔ ʋɔnu drɔ̃m mía nɔewo azɔ o, ke boŋ mitso nya me ale: be miagada naneke ɖe nɔvi aɖeke ŋgɔ be wòakli, alo ade afɔ ata me nɛ o. 14  Menyae, eye meka ɖe edzi le Aƒetɔ Yesu me, be naneke menye nu makɔmakɔ le eɖokui si o; negbe ne ame aɖe bu nane be enye nu makɔmakɔ hafi wònyea nu makɔmakɔ nɛ. 15  Elabena ne nuɖuɖu tae nɔviwò le nu xam ɖo la, ekema mègale zɔzɔm le lɔlɔ̃ me o. Mègatsɔ wò nuɖuɖu gblẽ ame ma si ta Kristo ku ɖo la dome o. 16  Eya ta migana woaƒo nu gbegblẽ tso nu nyui si miewɔna la ŋu o. 17  Elabena Mawu fiaɖuƒe la menye nuɖuɖu kple nunono o, ke boŋ dzɔdzɔenyenye kple ŋutifafa kpakple dzidzɔ le gbɔgbɔ kɔkɔe me boŋ ye. 18  Elabena ame si wɔa eɖokui Kristo ƒe kluvi le nu siawo me la, eƒe nu nyoa Mawu ŋu, eye amewo kpɔa ŋudzedze ɖe eŋu. 19  Eya ta mina míati nu siwo naa ŋutifafa nɔa anyi kple nu siwo tua ame nɔewo ɖo la yome. 20  Midzudzɔ Mawu ƒe dɔ la dome gbegblẽ le nuɖuɖu ta. Nyateƒee, nuwo katã le kɔkɔe, gake ne ame aɖe ƒe nuɖuɖu zu nukikli la, egblẽa nu. 21  Enyo be nàgaɖu lã alo ano wain alo awɔ nane si azu nukikli na nɔviwò o. 22  Xɔse si le asiwò la, nenɔ asiwò na wò ŋutɔ le Mawu ŋkume. Dzidzɔtɔe nye ame si medea eɖokui ʋɔnudɔdrɔ̃ me to nu si dze eŋu la wɔwɔ dzi o. 23  Gake ne ɖikekewo le eme la, ekema wobu fɔe xoxo ne eɖui, elabena meɖui tso xɔse me o. Ɛ̃, nu sia nu si womewɔ tso xɔse me o la, enye nu vɔ̃.

Etenuŋɔŋlɔ