Dzo kpo yi emenuwo dzi

Dzo kpo yi emenuawo dzi

Romatɔwo 10:1-21

10  Nɔviwo, nye dzimedidi vevi, kple nye kukuɖeɖe na Mawu le wo ta, ye nye be woakpɔ ɖeɖe.  Elabena mele ɖase ɖim na wo be, dzo le wo me ɖe Mawu ŋu; gake menye le sidzedze vavãtɔ nu o;  elabena esi womenya Mawu ƒe dzɔdzɔenyenye o, ke boŋ wole didim be yewoaɖo yewo ŋutɔ tɔ anyi ta la, womebɔbɔ wo ɖokuiwo ɖe Mawu ƒe dzɔdzɔenyenye la te o.  Elabena Kristoe nye Se la ƒe nuwuwu, bene ame sia ame si ɖenɛ fiana be xɔse le ye si la nakpɔ dzɔdzɔenyenye.  Elabena Mose ŋlɔe ɖi be, ame si wɔa Se la ƒe nudidi dzɔdzɔeawo dzi la anɔ agbe to dzɔdzɔenyenye la dzi.  Gake dzɔdzɔenyenye si tso xɔse me la ƒo nu ale: “Mègagblɔ le wò dzi me be: ‘Ame kae alia ayi dziƒo?’ bene wòana Kristo naɖi ava,  alo: ‘Ame kae aɖi ayi aʋli me?’ bene wòana Kristo nafɔ tso ame kukuwo dome, hã o.”  Gake nya kae wògblɔ? “Nya la tsɔ ɖe gbɔwò, le wò ŋutɔ wò nu me kple wò ŋutɔ wò dzi me”; eyae nye xɔse ƒe “nya,” si míele gbeƒã ɖemee la.  Elabena ne èɖea gbeƒã ‘nya ma si le wò ŋutɔ wò nu me’ la le dutoƒo be Yesu nye Aƒetɔ, eye nèɖenɛ fiana tso wò dzi me be yexɔe se be Mawu fɔe ɖe tsitre tso ame kukuwo dome la, ekema woaɖe wò. 10  Elabena dzie wotsɔna ɖenɛ fiana be woxɔe se hena dzɔdzɔenyenye, gake nue wotsɔna ʋua eme le dutoƒo hena ɖeɖekpɔkpɔ. 11  Elabena Ŋɔŋlɔ la gblɔ be: “Ame sia ame si ziɔ eƒe xɔse ɖe eŋu la maɖu ŋukpe o.” 12  Elabena vovototo aɖeke mele Yudatɔ kple Helatɔ dome o, elabena Aƒetɔ ɖeka ye le wo katã nu, eye wònaa nu geɖe ame siwo katã yɔnɛ la. 13  Elabena “ame sia ame si yɔa Yehowa ƒe ŋkɔ la, woaɖee.” 14  Ke hã, aleke woawɔ ayɔ ame si dzi womexɔ se o la? Eye aleke woawɔ axɔ ame si ŋu nya womese kpɔ o la dzi ase? Eye aleke woawɔ asee, ne ame aɖeke meɖea gbeƒã o? 15  Eye aleke woawɔ aɖe gbeƒã, ne womedɔ wo ɖa hafi o? Abe ale si woŋlɔe ɖi ene, be: “Ame siwo ɖea gbeƒã nu nyuiwo ŋuti nya nyui la ƒe afɔwo nya kpɔ loo!” 16  Ke hã, menye wo katã ye ɖo to nya nyui la o. Elabena Yesaya gblɔ be: “Yehowa, ame kae xɔ nu si wose tso mía gbɔ la dzi se?” 17  Eya ta nu si wose la mee xɔse tsona. Eye nu si wose la tsoa nya si wogblɔ tso Kristo ŋu me. 18  Ke hã, mele biabiam be: Menye ɖe womesee o ɖe, alo menye nenemae oa? Nya lae nye be, “woƒe gbe ɖi hoo le anyigba blibo la katã dzi, eye woƒe nyawo de afi sia afi si amewo le le anyigba dzi.” 19  Ke hã, mele biabiam be: Menye ɖe Israel menyae o ɖe, menye nenemae oa? Gbã la, Mose gblɔ be: “Mato nu si menye dukɔ o dzi ana miaʋã ŋu; mato dukɔ masenugɔme aɖe dzi ana miado dziku.” 20  Gake dzi ɖo Yesaya ƒo ŋutɔ wògblɔ be: “Ame siwo menɔ diyem o la kpɔm; meɖe ɖokuinye fia ame siwo mebia tanye se o la.” 21  Gake egblɔ le Israel ya ŋu be: “Ŋkeke blibo la katã meke nye abɔwo me ɖo ɖe dukɔ si meɖoa to o, eye wòɖea ɖeklemi la gbɔ.”

Etenuŋɔŋlɔ