Romatɔwo 1:1-32

1  Paulo, Yesu Kristo ƒe kluvi si woyɔ be wòanye apostolo, ame si woɖe ɖe vovo hena Mawu ƒe nya nyui,  si ŋugbe wòdo ɖi tsã to eƒe nyagblɔɖilawo dzi le Ŋɔŋlɔ kɔkɔeawo me,  tso Via ŋu, ame si tso David ƒe dzidzime la me le ŋutilã nu,  gake woto ŋusẽ me yɔe be Mawu ƒe Vi le kɔkɔenyenye ƒe gbɔgbɔ la nu to tsitretsitsi tso ame kukuwo dome dzi—ɛ̃, Yesu Kristo mía Aƒetɔ la,  ame si dzi míeto xɔ amenuveve kple apostolonyenye, bene xɔse ƒe toɖoɖo nanɔ anyi le dukɔwo katã dome le eƒe ŋkɔ la ŋu,  dukɔ siwo dome miawo hã mienye ame siwo woyɔ be miava nye Yesu Kristo tɔ le—  le esia ŋlɔm na ame siwo katã le Roma, siwo nye Mawu ƒe lɔlɔ̃tɔwo, siwo woyɔ be woava zu ame kɔkɔewo: Amenuveve kple ŋutifafa si tso Mawu mía Fofo kple Aƒetɔ Yesu Kristo gbɔ la, woana mi.  Gbã la, medaa akpe na nye Mawu to Yesu Kristo dzi le mi katã ta, elabena wole nu ƒom tso miaƒe xɔse ŋu le xexe blibo la katã me.  Elabena Mawu, ame si metoa nye gbɔgbɔ dzi wɔa subɔsubɔdɔ kɔkɔe na le nya nyui si ku ɖe Via ŋu gome, ye nye ɖasefo nam, le ale si meyɔa mia ŋkɔ madzudzɔmadzudzɔe le nye gbedodoɖawo me ŋu, 10  henɔa kuku ɖem be, ne enye Mawu ƒe lɔlɔ̃nu la, wòadze edzi nam mlɔeba be mava mia gbɔ. 11  Elabena ele dzroyem vevie be makpɔ mi, be mana gbɔgbɔmenunana aɖe mi, bene ŋusẽ naɖo mia ŋu; 12  alo be dzidedeƒo na ame nɔewo boŋ nayi edzi le mia dome; ame sia ame to nɔvia ƒe xɔse me, mia tɔ kple tɔnye siaa. 13  Gake nɔviwo, nyemedi be miado kpo nu sia nyanya o be, meɖoe zi geɖe be mava mia gbɔ, bene makpɔ kutsetse aɖe le miawo hã mia dome, abe ale si mekpɔe le dukɔ bubuawo me ene hafi, gake woxe mɔ nam va se ɖe fifia. 14  Helatɔwo kple Barbaratɔwo siaa, nunyalawo kple ame manyanuwo siaa, ƒe fenyilae menye: 15  eya ta mele didim vevie be magblɔ nya nyui la na mi ame siwo le Roma afi ma la hã. 16  Elabena nya nyui la mekpea ŋu nam o; le nyateƒe me la, enye Mawu ƒe ŋusẽ si wòtsɔna xɔa ame sia ame si si xɔse le la ɖe agbe, Yudatɔ gbã, kple Helatɔ hã; 17  elabena woto edzi le Mawu ƒe dzɔdzɔenyenye ɖem le fiafiam le xɔse ta yina xɔse me, abe ale si woŋlɔe ɖi ene be: “Gake ame dzɔdzɔe la—xɔsee ana wòanɔ agbe.” 18  Elabena wole Mawu ƒe dziku ɖem le fiafiam tso dziƒo ɖe ame siwo le nyateƒe la tem ɖe to le mɔ madzɔmadzɔ nu la ƒe mawumavɔ̃mavɔ̃ kple madzɔmadzɔnyenye katã ŋu, 19  elabena nu si woate ŋu anya tso Mawu ŋu la dze le wo dome, elabena Mawu na wòdze na wo. 20  Elabena eƒe nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena, ale be womate ŋu ado taflatsɛ o; 21  elabena togbɔ be wonya Mawu hã la, womedo eyama ɖe dzi abe Mawu ene o, eye womeda akpe nɛ hã o, ke boŋ woƒe tamebubu zu dzodzro, eye woƒe dzi masenugɔme la do viviti. 22  Togbɔ be wogblɔna be yewonye nunyalawo hã la, wozu bometsilawo, 23  eye wotrɔ Mawu magblẽmagblẽ la ƒe ŋutikɔkɔe wòzu nu si le abe amegbetɔ si gblẽna, kple xewo, kple lãfɔnewo, kple nu siwo tana ene la, ƒe nɔnɔme. 24  Eya ta le woƒe dziwo ƒe nudzodzrowo nu la, Mawu ɖe asi le wo ŋu na makɔmakɔnyenye, bene woado vlo woawo ŋutɔwo ƒe ŋutilãwo, 25  wo ame siwo tsɔ Mawu ƒe nyateƒe la ɖɔ li aʋatso, eye wode ta agu na nuwɔwɔ hewɔ subɔsubɔdɔ kɔkɔe nɛ ɖe Ame si wɔ nuwo la teƒe, si nye yayratɔ tso mavɔ me yi mavɔ me. Amen. 26  Esia tae Mawu ɖe asi le wo ŋu na gbɔdɔdɔ ƒe dzodzro siwo nye ŋukpenanuwo, elabena woƒe nyɔnuwo trɔ ale si woazã wo ɖokuiwo le dzɔdzɔme nu la wòzu esi mele dzɔdzɔme nu o; 27  nenema kee ŋutsuwo kura gɔ̃ hã wɔ nu si mele dzɔdzɔme nu o esi wogblẽ nyɔnuwo ɖi, eye ŋutsuwo kple ŋutsuwo le fiefiẽm adãtɔe le woƒe dzodzro sesẽwo me ɖe wo nɔewo ŋu, eye wole nu ɖigbɔwo wɔm hele woƒe vodada ŋuti teƒeɖoɖo blibo, si dze la, xɔm le wo ɖokuiwo me. 28  Eye ale si ko womelɔ̃ be yewoaxɔ Mawu ŋuti sidzedze vavãtɔ o la, Mawu hã ɖe asi le wo ŋu na tamesusu ƒe nɔnɔme si medzea eŋu o, be woawɔ nu siwo mesɔ o, 29  esi woyɔ fũu kple madzɔmadzɔnyenye, vɔ̃ɖinyenye, ŋubiabiã, nu vɔ̃ɖi wɔwɔ katã; woyɔ fũu kple ŋuʋaʋã, amewuwu, dzrewɔwɔ, amebeble, susu vɔ̃ɖiwo ŋu bubu; wonye sakplisalawo, 30  ameŋugblẽlawo, ame siwo léa fu Mawu, ame mabuamewo, ɖokuidoɖedzilawo, adegbeƒolawo, ame siwo toa nu vɔ̃ɖiwo vanɛ, ame siwo meɖoa to wo dzilawo o, 31  ame masenugɔmewo, ɖoɖodzidalawo, ame siwo melɔ̃a ame ƒe nya o, ame makpɔnublanuiwo. 32  Togbɔ be ame siawo nya Mawu ƒe ɖoɖo dzɔdzɔe la nyuie, be ame siwo wɔa nu siawo la dze ku hã la, menye ɖeko woyia edzi wɔa wo o, ke wolɔ̃na ɖe edzi na ame siwo wɔa wo la hã.

Etenuŋɔŋlɔ