Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Nyaɖeɖefia 9:1-21

9  Eye mawudɔla atɔ̃lia ku eƒe kpẽ la. Eye mekpɔ ɣletivi aɖe si ge tso dziƒo va dze anyigba, eye wotsɔ aʋli me safui la nɛ.  Eye wòʋu aʋli la nu, eye dzudzɔ do tso do la me abe dzokpo gã aɖe me dzudzɔ ene, eye do la ƒe dzudzɔ na ɣe do viviti, ya hã do viviti.  Eye ʋetsuviwo do tso dzudzɔ la me ɖe anyigba dzi; eye wona ŋusẽ wo, abe esi tɔgbi le anyigba dzi dziɖegbewo* si ene.  Eye wogblɔ na wo be woagawɔ nuvevi aɖeke anyigba dzi numiemie aɖeke alo gbe mumu aɖeke alo ati aɖeke o, negbe ame siwo Mawu ƒe nutrenu mele ŋgonu na o la ɖeɖe ko.  Eye woɖe mɔ na ʋetsuviawo be, woagawu wo o, ke boŋ be woawɔ fu wo vevie ɣleti atɔ̃, eye fu si wowɔ wo la nɔ abe fu si dziɖegbe wɔa ame, ne ete ame ene.  Eye le ŋkeke mawo me la, amewo adi ku, gake womakpɔe akpɔ o, eye woadi be yewoaku, gake ku anɔ sisim le wo gbɔ.  Eye ʋetsuviawo ƒe nɔnɔme ɖi sɔ siwo wobla akpa na hena aʋawɔwɔ la tɔ; eye nane nɔ woƒe ta abe sikafiakukuwo ene, eye woƒe mo nɔ abe amegbetɔwo ƒe mo ene,  gake woƒe ɖa ɖi nyɔnuwo ƒe ɖa. Eye woƒe aɖuwo nɔ abe dzatawo tɔ ene;  eye akɔtakpoxɔnu siwo le abe gakɔtakpoxɔnuwo ene la nɔ wo ŋu. Eye woƒe aʋalawo nɔ ɖiɖim abe sɔ geɖe siwo le du sim yina aʋa la ƒe tasiaɖamwo ƒe ɖiɖi ene. 10  Eye asike kple ti le wo si abe dziɖegbewo tɔ ene; eye woƒe asikewo mee woƒe ŋusẽ le be woawɔ nuvevi ameawo ɣleti atɔ̃. 11  Fia aɖe le wo nu, si nye mawudɔla si le aʋli la nu. Le Hebrigbe me la, woyɔnɛ be Abadon, gake woyɔnɛ le Helagbe me be Apolion. 12  Fuwɔame ɖeka nu va yi. Kpɔ ɖa! Fuwɔame eve bubu ava ɖe nu siawo yome. 13  Eye mawudɔla adelia ku eƒe kpẽ la. Eye mese gbe aɖe tso sikavɔsamlekpui si le Mawu ŋkume la ƒe dzowo me, 14  wògblɔ na mawudɔla adelia si si kpẽ nɔ la be: “Tu mawudɔla ene siwo wobla ɖe Frat tɔsisi gã la to.” 15  Eye wotu mawudɔla ene, siwo wodzra ɖo na gaƒoƒo kple ŋkeke kple ɣleti kple ƒe la, be woawu amewo ƒe akpa ɖeka le etɔ̃ me. 16  Eye sɔdolawo ƒe aʋakɔwo ƒe xexlẽme nɔ akpe ewo teƒe akpe ewo teƒe eve: mese woƒe xexlẽme. 17  Eye ale si mekpɔ sɔawo kple ame siwo bɔbɔ nɔ anyi ɖe wo dzi le ŋutega me lae nye esi: akɔtakpoxɔnu siwo biã abe dzo ene, siwo le blɔ vie, eye wole abe dzokpe ene la, nɔ wo ŋu; eye sɔawo ƒe ta le abe dzatawo ƒe ta ene, eye dzo kple dzudzɔ kpakple dzokpe do tso woƒe nu me. 18  Wotsɔ dɔvɔ̃ etɔ̃ siawo wu amewo ƒe akpa ɖeka le etɔ̃ me, le dzo kple dzudzɔ kpakple dzokpe si do tso woƒe nu me la me. 19  Elabena sɔawo ƒe ŋusẽ le woƒe nuwo kple woƒe asikewo me; elabena woƒe asikewo le abe dawo ene, eye ta li na wo, eye esiawoe wotsɔna wɔa nuvevii. 20  Gake ame susɔe siwo wometsɔ dɔvɔ̃ siawo wu o la metrɔ dzi me tso woƒe asinudɔwɔwɔwo me, bene woagade ta agu na gbɔgbɔ vɔ̃wo kple legba siwo wotsɔ sika kple klosalo kple gadzẽ kple kpe kpakple ati wɔ, siwo metea ŋu kpɔa nu alo sea nu alo zɔa azɔli hã o, la o; 21  eye wometrɔ dzi me tso woƒe amewuwuwo kple woƒe gbɔgbɔyɔyɔnuwɔnawo kple woƒe agbe gbegblẽ nɔnɔ kple woƒe fififiwo me o.

Etenuŋɔŋlɔ

Alo “akeklewo.”