Dzo kpo yi emenuwo dzi

Dzo kpo yi emenuawo dzi

Kolosetɔwo 4:1-18

4  Mi aƒetɔwo, miyi edzi mianɔ nu si le dzɔdzɔe kple nu si sɔ, la wɔm na miaƒe kluviwo, esi mienyae be Aƒetɔ le miawo hã mia si le dziƒo ta.  Minɔ gbedodoɖa dzi ɖaa, eye minɔ ŋudzɔ le eme kple akpedada,  eye le ɣeyiɣi ma ke me la, minɔ gbe dom ɖa ɖe míawo hã mía ta, bene Mawu naʋu nuƒoƒo ƒe ʋɔtru na mí, bene míagblɔ Kristo la ŋuti nya ɣaɣla kɔkɔe, si tututu ta mele gaxɔ me bablawo me ɖo la;  bene maɖee afia abe ale si wòdze be maƒo nui ene.  Miyi edzi miazɔ le nunya me le nuwɔwɔ kple ame siwo le egodo la me, eye miƒle ɣeyiɣi si sɔ la na mia ɖokui.  Mina miaƒe nya nadze to ɣesiaɣi, eye dze nanɔ eme, bene mianya ale si wòle be miaɖo nya ŋu na ame sia ame.  Ale si nɔnɔmeawo le le gbɔnye la, nɔvinye lɔlɔ̃tɔ Tixiko, si nye subɔla nyateƒetɔ kple hati kluvi le Aƒetɔ la me la, ana mianya wo katã.  Nu si tututu tae mele edɔm ɖe mia gbɔ ɖoe nye be, mianya ale si nuwo le le mía gbɔ, eye be wòafa akɔ na miaƒe dziwo,  eye mele Onesimo, nɔvinye nyateƒetɔ lɔlɔ̃tɔ, si tso mia dome, la dɔm kpe ɖe eŋu. Woana mianya ale si nuwo katã le le afi sia. 10  Aristarxo, hatinye gamenɔla, do gbe na mi, Barnaba nɔvi Marko hã, (ame si ŋu míede se le na mi be ne eva mia gbɔ la, miaxɔe nyuie,) 11  kple Yesu si woyɔna be Yusto; ame siawo tso aʋatsotsotɔwo dome. Ame siawo koe nye hanyedɔwɔlawo na Mawu fiaɖuƒe la, eye ame siawo tututue va zu ŋusẽdoame ƒe kpekpeɖeŋu nam. 12  Epafra, ame si tso mia dome, eye wònye Kristo Yesu ƒe kluvi la, do gbe na mi, eye wòle ʋiʋlim vevie ɣesiaɣi ɖe mia ta le eƒe gbedodoɖawo me, bene mianɔ tsitre bliboe, eye miakpɔ kakaɖedzi sẽŋu le Mawu ƒe lɔlɔ̃nu blibo la me mlɔeba. 13  Ɛ̃, mele ɖase ɖim tso eŋu be, edzea agbagba geɖe ɖe mia kple ame siwo le Laodikea kpakple ame siwo le Hierapoli la ta. 14  Luka, atikewɔla lɔlɔ̃tɔ la, do gbe na mi, eye Dema hã do gbe na mi. 15  Mido gbe na nɔvi siwo le Laodikea nam, eye mido gbe na Nimfa kpakple hame si le eƒe aƒe me la nam. 16  Eye ne woxlẽ agbalẽ sia na mi vɔ la, miwɔ ɖoɖo be woaxlẽe le Laodikeatɔwo ƒe hamea hã me, eye miawo hã miaxlẽ esi tso Laodikea la. 17  Eye migblɔ na Arxipo be: “Yi edzi nàlé be na subɔsubɔdɔ, si nèlɔ̃ xɔ le Aƒetɔ la me la, be nàwɔe ade goe.” 18  Nye Paulo ƒe gbedoname, si metsɔ nye ŋutɔ nye asi ŋlɔ, lae nye esi. Miaƒe susu nenɔ nye gaxɔ me bablawo ŋu. Amenuveve nanɔ anyi kpli mi.

Etenuŋɔŋlɔ