Dzo kpo yi emenuwo dzi

Dzo kpo yi emenuawo dzi

Kolosetɔwo 3:1-25

3  Gake ne wofɔ mi ɖe tsitre kple Kristo la, ekema miyi edzi mianɔ nu siwo le dziƒo, afi si Kristo la nɔ anyi ɖe Mawu ƒe nuɖusi me le, la dim.  Mina miaƒe susuwo nanɔ nu siwo le dziƒo la ŋu vevie, ke menye nu siwo le anyigba dzi la ŋu o.  Elabena mieku, eye wotsɔ miaƒe agbe kple Kristo la, si le ƒomedodo me kple Mawu, la ɣla.  Ne woɖe Kristo la, míaƒe agbe la, ɖe go la, ekema woaɖe miawo hã ɖe go kplii le ŋutikɔkɔe me.  Eya ta miwu miaƒe ŋutinu siwo le anyigba dzi, le agbe gbegblẽ nɔnɔ, makɔmakɔnyenye, gbɔdɔdɔ ƒe dzodzro, dzodzro vɔ̃, kple ŋubiabiã, si nye trɔ̃subɔsubɔ, la gome.  Nu mawo tae Mawu ƒe dziku gbɔna ɖo.  Miawo hã miezɔna le nu mawo tututu me tsã esime mienɔ agbe le wo me.  Gake azɔ la, miɖe wo ɖe aga tso mia gbɔ ŋutɔŋutɔ: dɔmedzoe, dziku, vɔ̃ɖinyenye, dzugbewo, kple yakanya siwo dona tso miaƒe nu me.  Miganɔ aʋatso kam na mia nɔewo o. Miɖe amenyenye xoxo la kple eƒe nuwɔnawo ɖa, 10  eye mido amenyenye yeye la, si wɔm wole yeyee to sidzedze vavãtɔ me le Ame si wɔe la ƒe nɔnɔme nu, 11  afi si Helatɔ alo Yudatɔ, aʋatsotso alo aʋamatsomatso, amedzro, Skitetɔ, kluvi, ablɔɖeme mele o, ke boŋ Kristo nye nuwo katã, eye wòle wo katã me. 12  Eya ta abe Mawu ƒe ame tiatiawo kple ame kɔkɔe siwo wolɔ̃ ene la, mido dɔmetɔtrɔ ƒe veveseɖeamenu, dɔmenyonyo, ɖokuibɔbɔ, tufafa, kple dzigbɔgbɔ blewu. 13  Miyi edzi miado dzi anɔ anyi kple mia nɔewo, eye miatsɔ anɔ mia nɔewo kem faa ne nya aɖe le ame aɖe si ɖe nɔvia ŋu. Ale si Yehowa tsɔ ke mi faa la, miawo hã miwɔ nenema ke. 14  Gake hekpe ɖe nu siawo katã ŋu la, mido lɔlɔ̃, elabena enye ɖekawɔwɔ ƒe nublanu deblibo. 15  Eye mina Kristo la ƒe ŋutifafa nakpɔ ŋusẽ ɖe miaƒe dziwo dzi, elabena le nyateƒe me la, eya gbɔe woyɔ mi vae le ŋutilã ɖeka me. Eye miɖee fia be yewonye akpedalawo. 16  Mina Kristo la ƒe nya la naxɔ aƒe ɖe mia me le nunya katã me. Miyi edzi mianɔ nu fiam mia nɔewo, eye mianɔ nu xlɔ̃m mia nɔewo kple psalmowo, Mawu kafukafu nyawo, gbɔgbɔmehawo le dɔmekɔkɔ me, eye miadzi ha le miaƒe dziwo me na Yehowa. 17  Eye nu sia nu si miewɔna le nya alo nuwɔna me la, miwɔ nuwo katã le Aƒetɔ Yesu ƒe ŋkɔ me, eye mianɔ akpe dam na Mawu Fofo la to eyama dzi. 18  Mi srɔ̃nyɔnuwo, mibɔbɔ mia ɖokui na mia srɔ̃wo, abe ale si wòdze le Aƒetɔ la me ene. 19  Mi srɔ̃ŋutsuwo, miyi edzi mianɔ mia srɔ̃wo lɔ̃m, eye miganɔ dɔmedzoe dom ɖe wo ŋu helĩhelĩ o. 20  Mi ɖeviwo, miɖo to mia dzilawo le nu sia nu me, elabena esia dzea ame ŋu le Aƒetɔ la me. 21  Mi vifofowo, miganɔ dziku dom na mia viwo o, bene dzi nagaɖe le wo ƒo o. 22  Mi kluviwo, miɖo to ame siwo nye miaƒe aƒetɔwo le ŋutilã nu la le nu sia nu me, menye le ameŋkumenuwɔwɔ me abe ameŋudzelawo ene o, ke boŋ tso dzi me, le Yehowa vɔvɔ̃ me. 23  Nu sia nu si wɔm miele la, miwɔe tso luʋɔ blibo me abe Yehowa ye miele ewɔm na ene, ke menye na amegbetɔwo o, 24  elabena mienyae be Yehowa gbɔe miaxɔ domenyinyi ƒe fetu la tsoe. Miwɔ dɔ na Aƒetɔ Kristo abe kluviwo ene. 25  Ɛ̃, ame si le nu gbegblẽ wɔm la agbugbɔ nu gbegblẽ si wòwɔ la axɔ, eye ameŋkumekpɔkpɔ aɖeke mele eme o.

Etenuŋɔŋlɔ