Dzo kpo yi emenuwo dzi

Dzo kpo yi emenuawo dzi

Kolosetɔwo 2:1-23

2  Elabena medi be mianya ale si gbegbe mele ʋiʋlim ɖe mia kple ame siwo le Laodikea kpakple ame siwo katã mekpɔ nye ŋkume kpɔ o la ta,  bene woafa akɔ na woƒe dziwo, bene woawɔ nu aduadu le lɔlɔ̃ me, bene kesinɔnu, si nye nugɔmesese blibo, ƒe kakaɖedzi nasu wo si, bene woaɖo Mawu ƒe nya ɣaɣla kɔkɔe, si nye Kristo, ƒe sidzedze vavãtɔ gbɔ.  Eya mee woɣla nunya kple sidzedze ƒe nu xɔasiwo katã ɖo nyuie.  Esia gblɔm mele, bene ame aɖeke nagatsɔ aɖe ŋanɛ aflu mi o,  elabena togbɔ be nyemele mia gbɔ le ŋutilã me o hã la, meli kpli mi le gbɔgbɔ me, eye dzi le dzɔyem, eye mele ɖoɖo nyui, si nu miele zɔzɔm ɖo, kple miaƒe Kristo dzi xɔxɔse ƒe kelili la kpɔm.  Eya ta ale si miexɔ Aƒetɔ Kristo Yesu la, miyi edzi miazɔ le ƒomedodo me kplii,  eye mianye ame siwo ƒo ke ɖe to, eye wotu wo ɖe eyama me, eye woli ke wo ɖe xɔse la me, abe ale si wofia mi ene, eye miagba go le xɔse me le akpedada me.  Mikpɔ nyuie: ɖewohĩ ame aɖe ato xexemenunya kple beble dzodzro dzi le amewo ƒe kɔnyinyiwo nu alé mi adzoe, le xexea ƒe gɔmedzenuwo nu, ke menye le Kristo nu o;  elabena eya mee Mawu ƒe nɔnɔmewo katã dze le, le ŋutilã me. 10  Eye ale blibonyenye aɖe su mia si to eya si nye dziɖuɖuwo kple ŋusẽwo katã ƒe ta la dzi. 11  To miaƒe hadede kplii dzi la, wotsɔ aʋatsotso si menye asie wotsɔ tsoe o la tso aʋa na mi hã, si me woɖe ŋutilã ƒe ame blibo la ɖa le, to Kristo la ƒe aʋatsotso me, 12  elabena woɖi mi kpakplii le eƒe nyɔnyrɔxɔxɔ me, eye to miaƒe hadede kplii dzi la, wofɔ mi ɖe tsitre ɖekae to Mawu, ame si fɔe ɖe tsitre tso ame kukuwo dome la, ƒe dɔwɔwɔ si dzi miexɔ se la me. 13  Gawu la, togbɔ be mienye ame kukuwo tsã le miaƒe vodadawo kple aʋamatsomatso ƒe nɔnɔme, si me mienɔ le ŋutilã me la me hã la, Mawu gbɔ agbe mi kpakplii. Elɔ̃ faa tsɔ míaƒe vodadawo katã ke mí, 14  eye wòtutu nu si wotsɔ asi ŋlɔ ɖe mía ŋuti, siwo me ɖoɖowo nɔ, eye wòtsia tsitre ɖe mía ŋu, la ɖa; eye wòɖee ɖa le mɔa dzi, esi wòtsɔ gatagbadzɛ hee ɖe fuwɔameti la ŋuti. 15  Esi wòɖe nu le dziɖuɖuwo kple ŋusẽwo dzi la, eɖe wo fia le gaglãgbe abe nu siwo dzi wòɖu ene, eye wònɔ ŋgɔ na wo le aʋadziɖuɖu ƒe gbɔlɔlɔ gã aɖe me to fuwɔameti la dzi. 16  Eya ta migana ame aɖeke nadrɔ̃ ʋɔnu mi le nuɖuɖu kple nunono alo azãɖuɖu aɖe alo ɣletidzedzi ƒe ŋkekenyui aɖe, alo sabat aɖe ŋuti o; 17  elabena nu mawo nye nu siwo ava va la ƒe vɔvɔli, ke nua ŋutɔŋutɔ le Kristo la me. 18  Migana ame aɖeke, si kpɔa dzidzɔ ɖe alakpaɖokuibɔbɔ kple mawudɔlawo subɔsubɔ ƒomevi aɖe ŋu, eye “wòtea afɔ ɖe to” ɖe nu siwo wòkpɔ ŋu, eye eƒe ŋutilãmetamesusu doe ɖe dzi glodzoo madzemadzee la, nate fetu la mi o, 19  ame si meléna ɖe ta la ŋu sesĩe o, ta siae na ŋutilã blibo, si kpɔa nu siwo hiã nɛ, eye eƒe ƒunukpeƒewo kple lãmekawo blae ɖekae la, tsɔa tsitsi si Mawu nana la nɔa tsitsimee. 20  Ne mieku kple Kristo ɖekae le xexea ƒe gɔmedzenuwo gome la, ekema nu ka tae miegale mia ɖokui bɔbɔm ɖe seawo te, abe ɖe miegale agbe le xexea me ene: 21  “Mègatsɔe o, eye mègaɖɔe kpɔ alo aka asi eŋu o,” 22  le nu siwo katã woɖo ɖi na tsɔtsrɔ̃ to wo zazã me la ŋu, le amewo ƒe sededewo kple nufiafiawo nu? 23  Le nyateƒe me la, nu mawo tututu dzena abe nu siwo me nunya le ene, to subɔsubɔ si ƒomevi ame ɖo na eɖokui kple alakpaɖokuibɔbɔ, kple nuveviwɔwɔ ŋutilã la me; gake viɖe aɖeke mele wo ŋu le avuwɔwɔ atsi tsitre ɖe kɔɖiɖi na ŋutilã la ŋu me o.

Etenuŋɔŋlɔ