Dzo kpo yi emenuwo dzi

Dzo kpo yi emenuawo dzi

Kolosetɔwo 1:1-29

1  Paulo, Kristo Yesu ƒe apostolo to Mawu ƒe lɔlɔ̃nu me, kple mía nɔvi Timoteo,  le esia ŋlɔm na ame kɔkɔewo kple nɔvi nyateƒetɔ siwo le ƒomedodo me kple Kristo le Kolose: Amenuveve kple ŋutifafa, si tso Mawu mía Fofo gbɔ la, woana mi.  Míedaa akpe na Mawu, mía Aƒetɔ Yesu Kristo Fofo, ɣesiaɣi ne míele gbe dom ɖa ɖe mia ta,  elabena míese miaƒe Kristo Yesu dzi xɔxɔse kple lɔlɔ̃ si le mia si na ame kɔkɔewo katã, ŋu nya,  le mɔkpɔkpɔ si wodzra ɖo ɖi na mi le dziƒowo la ta. Mɔkpɔkpɔ sia ŋu nyae miese tsã esime woɖe gbeƒã nya nyui la ŋuti nyateƒea na mi,  esi va mia gbɔ, abe ale si wòle ku tsem hele tsitsim le xexe blibo la katã me, abe ale si ko wòle tsitsim le miawo hã mia dome, tso ŋkeke si dzi miese Mawu ƒe amenuveve la ŋuti nya hekpɔe dze si nyuie le nyateƒe me, la ene.  Nu mae miesrɔ̃ tso Epafra, mía hati kluvi lɔlɔ̃tɔ, si nye Kristo la ƒe subɔla nyateƒetɔ le mía teƒe, la gbɔ,  ame si hã gblɔ lɔlɔ̃, si gbɔgbɔ la na mieɖena fiana la, ŋu nya na mí.  Esia hã tae tso ŋkeke si dzi míesee la, míedzudzɔ gbedodoɖa ɖe mia ta o, eye míele kukuɖeɖe dzi, bene eƒe lɔlɔ̃nu ŋuti sidzedze vavãtɔ la nayɔ mi fũu le nunya kple gbɔgbɔ me nugɔmesese katã me, 10  bene miazɔ ale si dze Yehowa, bene miadze eŋu bliboe, esi mieyi edzi le ku tsem le dɔ nyui sia dɔ nyui wɔwɔ me, eye miele tsitsim le Mawu ŋuti sidzedze vavãtɔ la me, 11  eye woado ŋusẽ mi kple ŋusẽ katã le eƒe ŋutikɔkɔe ƒe ŋusẽ gã la nu, bene miate ŋu ado dzi bliboe, eye miagbɔ dzi ɖi blewu le dzidzɔ me, 12  ahanɔ akpe dam na Fofo la, ame si na miedze hena gomekpɔkpɔ le ame kɔkɔewo ƒe domenyinu la me le kekeli la me. 13  Eɖe mí tso viviti ƒe ŋusẽ la me, eye wòtsɔ mí yi eƒe Vi lɔlɔ̃a ƒe fiaɖuƒe la me, 14  ame si dzi woto ɖe mí to tafe la dzi, si nye míaƒe nu vɔ̃wo ƒe tsɔtsɔke. 15  Eyae nye Mawu makpɔmakpɔ la ƒe nɔnɔme, nuwɔwɔwo katã ƒe ŋgɔgbevi la; 16  elabena eya dzie woto wɔ nu bubu siwo katã le dziƒowo kple anyigba dzi, nu siwo wokpɔna kple nu siwo womekpɔna o, woɖanye fiazikpuiwo, alo aƒetɔnyenyewo, alo dziɖuɖuwo, alo ŋusẽwo o. Wowɔ nu bubuwo katã to edzi na eyama. 17  Eye etre dzɔdzɔ na nu bubuwo katã, eye eyama dzie woto na nu bubuwo katã va dzɔ, 18  eye eyae nye ŋutilã, si nye hame la, ƒe ta. Eyae nye gɔmedzedze la, ame kukuwo dome ŋgɔgbevi la, bene wòazu ame si nye gbãtɔ le nuwo katã me; 19  elabena Mawu kpɔe be enyo be agbɔsɔsɔ blibo la katã nanɔ eyama me, 20  eye be yeato edzi adzra ye kple nu bubuwo katã dome ɖo ake, esi wòto ʋu si wòkɔ ɖi le fuwɔameti la ŋuti me wɔ ŋutifafa, woɖanye nu siwo le anyigba dzi alo nu siwo le dziƒowo o. 21  Le nyateƒe me la, mi ame siwo nɔ adzɔge tsã, eye mienye futɔwo, le esi miaƒe susuwo nɔ dɔwɔwɔ vɔ̃ɖiwo ŋu ta la, 22  eto ame ma ƒe luʋɔŋutilã dzi gadzra mia kplii dome ɖo to eƒe ku me, bene wòatsɔ mi aɖo eŋkume mianye ame kɔkɔewo kple mokakamanɔŋutɔwo kpakple ame siwo ŋu womakpɔ nutsotso aɖeke le o, 23  ne mieyi edzi le xɔse la me, eye woɖo mi ɖe gɔmeɖoanyi la dzi, eye miele tsitre sesĩe, eye miena wote mi ɖa tso nya nyui ƒe mɔkpɔkpɔ ma si miese, si woɖe gbeƒãe na nuwɔwɔ siwo katã le dziƒoa te, la gbɔ o. Nya nyui sia ƒe subɔlae nye Paulo mezu. 24  Azɔ la, mele dzidzɔ kpɔm le nye fukpekpewo le mia ta me, eye nye hã mele nu siwo susɔ le Kristo la ƒe xaxawo me la nu wum le nye ŋutilã me, le eƒe ŋutilã, si nye hamea, la ta. 25  Mezu hame sia ƒe subɔla le aƒedzikpɔkpɔdɔ si tso Mawu gbɔ, si wonam le miaƒe nyonyo ta, be maɖe gbeƒã Mawu ƒe nya la bliboe, la nu, 26  nya ɣaɣla kɔkɔe si woɣla tso nuɖoanyi siwo va yi kple dzidzime siwo va yi la ƒe gɔmedzedze ke. Gake woɖee fia eƒe ame kɔkɔewo azɔ, 27  ame siwo wòdze Mawu ŋu be yeana woanya nya ɣaɣla kɔkɔe sia ƒe ŋutikɔkɔe ƒe kesinɔnuwo le dukɔwo dome. Ƒomedodo si me Kristo le kpli mi lae na mɔkpɔkpɔ mi hena eƒe ŋutikɔkɔe la. 28  Eyae nye ame si míele gbeƒã ɖemee, eye míele nu xlɔ̃m ame sia ame hele nu fiam ame sia ame le nunya katã me, bene míatsɔ ame sia ame afia be ele blibo le Kristo me. 29  Ɛ̃, esia tae mele dɔ wɔm sesĩe ɖo, eye mele ʋiʋlim le eƒe dɔwɔwɔ, si le dɔ dzi kple ŋusẽ le menye, la nu.

Etenuŋɔŋlɔ