Hebritɔwo 9:1-28

9  Eya ta subɔsubɔdɔ kɔkɔe ŋuti ɖoɖowo kple anyigba dzi kɔkɔeƒe nɔ nubabla tsãtɔ la me.  Elabena wotu agbadɔ la ƒe teƒe gbãtɔ si me akaɖiti kple kplɔ̃ kpakple ŋkumeɖobolowo nɔ la; eye woyɔe be “Kɔkɔeƒe la.”  Gake le xɔmetsovɔ evelia megbe la, agbadɔ la ƒe teƒe si woyɔna be “Kɔkɔeƒe ƒe Kɔkɔeƒe la” nɔ anyi.  Dzudzɔdonu si wotsɔ sika wɔ, kple nubablaɖaka, si ŋu wofa sika ɖo keŋ kpe ɖo, si me sikaze, si me mana nɔna, kple Aron ƒe atikplɔ si ƒo se kpakple nubabla ƒe nuŋlɔkpeawo le la, le afi sia;  gake ŋutikɔkɔe ƒe kerubiwo nɔ aɖaka la tame, eye woƒe vɔvɔli tsyɔ avulénu ƒe nutunu la dzi. Gake menye fifiae míanɔ nu ƒom tso nu siawo ŋu tsitotsito o.  Esi wotu nu siawo alea vɔ la, nunɔlawo gena ɖe agbadɔ la ƒe teƒe gbãtɔ ɣesiaɣi hena subɔsubɔdɔ kɔkɔewo wɔwɔ;  gake nunɔlagã ɖeɖe koe gena ɖe teƒe evelia ya ƒe ɖeka zi ɖeka, eye megena ɖe eme o, negbe ɖe wòtsɔ ʋu si wòana ɖe ye ŋutɔ kple dukɔ la ƒe nu vɔ̃ siwo wowɔ le manyamanya me ta la ɖe asi hafi.  Ale gbɔgbɔ kɔkɔe la na wòdze ƒãa be, womeʋu mɔ si yi kɔkɔeƒe la esime agbadɔ gbãtɔ la gakpɔtɔ nɔ anyi o.  Agbadɔ sia tututu nye kpɔɖeŋu na ɣeyiɣi ɖoɖi si me míele azɔ, eye wotsɔa nunanawo kple vɔsawo nana le kpɔɖeŋu sia nu. Ke hã, nu siawo mate ŋu ana dzitsinya deblibo nasu ame si le subɔsubɔdɔ kɔkɔe wɔm la si o, 10  ke boŋ nu siwo ŋu wòku ɖo la koe nye nuɖuɖuwo kple nunonowo kpakple tsilele ƒomevi vovovowo. Nu siawo nye nu siwo se bia le ŋutilã nu, eye woɖoe be woanɔ ewɔm va se ɖe ɣeyiɣi ɖoɖi si dzi woana nuwo nanɔ ɖoɖo nu. 11  Ke hã, esime Kristo va abe nu nyui siwo va li la ƒe nunɔlagã ene, to agbadɔ si lolo wu hede blibo wu si wometsɔ asi tu o, si fia be menye nuwɔwɔ sia ƒe akpa ɖeke o, nu la, 12  ege ɖe kɔkɔeƒe la zi ɖeka ɖe ɣeyiɣiawo katã nu, menye kple gbɔ̃wo kple nyitsuwo ƒe ʋu o, ao, ke boŋ kple ye ŋutɔ ƒe ʋu, eye wòxɔ ɖeɖekpɔkpɔ mavɔ vae na mí. 13  Elabena ne gbɔ̃wo kple nyitsuwo ƒe ʋu kpakple nyinɔe ƒe afi, si wohlẽna ɖe ame siwo ŋu mekɔ o ŋu la, kɔa ame ŋu hena ŋutilã ƒe kɔkɔenyenye la, 14  ekema ɖe Kristo la, ame si to gbɔgbɔ mavɔ me tsɔ eɖokui na Mawu ɖimaƒomaƒoe, la ƒe ʋu maklɔ míaƒe dzitsinyawo ŋu tso dɔwɔwɔ kukuwo me geɖe wu, bene míawɔ subɔsubɔdɔ kɔkɔe na Mawu gbagbe la oa? 15  Esia tae wònye nubabla yeye ƒe avuléla ɖo, bene le esi wòku hena wo ɖeɖe tso vodada siwo wowɔ le nubabla tsãtɔ la te me to tafe la dzi ta la, ame siwo woyɔ la naxɔ domenyinu mavɔ ƒe ŋugbedodo la. 16  Elabena afi si nubabla le la, ele be nublala, si nye amegbetɔ, la naku hafi. 17  Elabena amewo ƒe kue ɖoa kpe nubabla dzi, esi wònye be zi ale si nublala, si nye amegbetɔ, la le agbe la, ŋusẽ mele nubabla la ŋu o ta. 18  Eya ta womeɖo nubabla tsãtɔ la hã gɔme anyi ʋu manɔmee o. 19  Elabena esime Mose gblɔ Se la me sedede ɖe sia ɖe na dukɔa la, etsɔ nyitsuiwo kple gbɔ̃wo ƒe ʋu hekpe ɖe tsi kple alẽfu dzĩ kpakple isop gbe ŋu, eye wòhlẽ wo ɖe agbalẽ la ŋutɔ kple ameawo ŋu, 20  gblɔ be: “Esiae nye nubabla, si ƒe se Mawu de na mi la, ƒe ʋu.” 21  Eye wòhlẽ ʋu la ɖe agbadɔ la kple dutoƒo subɔsubɔdɔ la ƒe agbawo katã hã ŋu nenema ke. 22  Ɛ̃, wotsɔ ʋu klɔa nu sia nu kloe ŋu le Se la nu, eye ne womekɔ ʋu ɖi o la, tsɔtsɔke aɖeke menɔa anyi o. 23  Eya ta ehiã vevie be woatsɔ nu siawo akɔ nu siwo le dziƒo ƒe kpɔɖeŋunuawo ŋu, gake woatsɔ vɔsa siwo nyo wu vɔsa siawo la akɔ dziƒonuwo ya ŋutɔ ŋu. 24  Elabena menye kɔkɔeƒe si wotsɔ asi wɔ, si nye nu ŋutɔŋutɔ la ƒe kpɔɖeŋu, ye Kristo ge ɖo o, ke boŋ dziƒo ŋutɔŋutɔ wòge ɖo, bene wòado ɖe Mawu ŋutɔ ŋkume azɔ le mía ta. 25  Eye menye be wòatsɔ eɖokui anɔ nanam enuenu, abe ale si nunɔlagã la tsɔa ʋu si menye ye ŋutɔ tɔ o gena ɖe kɔkɔeƒe la ƒe sia ƒe ene o. 26  Ne nenemae la, ekema ahiã be wòanɔ fu kpem enuenu tso xexea ƒe gɔmeɖoanyiɣi. Gake azɔ eɖe eɖokui fia zi ɖeka ɖe ɣeyiɣiawo katã nu le nuɖoanyiawo ƒe nuwuɣi, bene wòaɖe nu vɔ̃ ɖa to eɖokui tsɔtsɔ asa vɔe me. 27  Eye ale si woɖoe na amewo be woaku zi ɖeka ɖe ɣeyiɣiawo katã nu, gake ʋɔnudɔdrɔ̃ ava le esia megbe la, 28  nenema kee wotsɔ Kristo la hã na zi ɖeka ɖe ɣeyiɣiawo katã nu be wòatsɔ ame geɖewo ƒe nu vɔ̃wo; eye zi evelia si wòadze woakpɔ la, manye ɖe nu vɔ̃ ta o, eye ame siwo le mɔ kpɔm na woƒe ɖeɖekpɔkpɔ vevie lae akpɔe.

Etenuŋɔŋlɔ