Hebritɔwo 6:1-20

6  Esia tae esi míedzo le Kristo la ŋuti gɔmedzenufiafiawo gbɔ la, mina míayi ŋgɔ aɖo tsitsinyenye gbɔ, eye míaganɔ gɔmeɖoanyi ɖom ake o, si nye dzimetɔtrɔ tso dɔwɔwɔ kukuwo me kple Mawu dzi xɔxɔse,  nyɔnyrɔxɔxɔ ƒomevi vovovowo ŋuti nufiafia kple asidada ɖe ame dzi, ame kukuwo ƒe tsitretsitsi kpakple ʋɔnudɔdrɔ̃ mavɔ.  Eye nu siae míawɔ, ne Mawu ɖe mɔ.  Elabena manya wɔ be, ame siwo me woklẽ ɖo kpɔ zi ɖeka ɖe ɣeyiɣiawo katã nu, eye woɖɔ dziƒo ƒe nunana faa la kpɔ, eye wozu gomekpɔlawo le gbɔgbɔ kɔkɔe me,  eye woɖɔ Mawu ƒe nya nyui la kple nuɖoanyi si gbɔna la ƒe ŋusẽwo kpɔ,  gake wode megbe la, woagawɔ wo yeye hena dzimetɔtrɔ o, elabena wohe Mawu ƒe Vi la ɖe ati ŋu ake le mɔ bubu nu na wo ɖokui, eye wodoa ŋukpee le gaglãgbe.  Le kpɔɖeŋu me, anyigba si noa tsi si dzana ɖe edzi enuenu, eye emegbe wòmiea numiemie siwo nyo na ame siwo ŋlɔe la, hã xɔa yayra tso Mawu gbɔ.  Gake ne emiea ŋuwo kple srẽwo la, woɖea asi le eŋu, eye ɖeko wòle abe ɖe woƒo fi dee ene; eye mlɔeba wotɔa dzoe.  Ke hã, lɔlɔ̃tɔwo, le miawo gome la, míeka ɖe nu siwo nyo wu kple nu siwo hea ɖeɖekpɔkpɔ vanɛ la dzi, togbɔ be míele nu ƒom alea hã. 10  Elabena Mawu menye madzɔmadzɔtɔ, be wòaŋlɔ miaƒe dɔwɔwɔ kple lɔlɔ̃ si mieɖe fia le eƒe ŋkɔ la ta, esi miewɔ subɔsubɔdɔ na ame kɔkɔewo, eye miegayi edzi le subɔsubɔdɔ wɔm na wo la, be o. 11  Gake míedi be mia dometɔ ɖe sia ɖe naɖe veviedodo ma ke afia, bene mɔkpɔkpɔ ƒe kakaɖedzi blibo la nanɔ mia si va se ɖe nuwuwu, 12  bene miagazu kuviatɔwo o, ke boŋ miazu ame siwo to xɔse kple dzigbɔɖi me nyi ŋugbedodowo dome la srɔ̃lawo. 13  Elabena esime Mawu do ŋugbe na Abraham la, le esi ame aɖeke melolo wui wòatsɔ aka atam o ta la, etsɔ eɖokui ka atam, 14  gblɔ be: “Ɛ̃, le yayra gome la, mayra wò godoo, eye le agbɔsɔsɔ gome la, mana nàsɔ gbɔ ɖe edzi godoo.” 15  Eye ale, esi Abraham gbɔ dzi ɖi la, eƒe asi su ŋugbedodo la dzi. 16  Elabena ame si lolo wu amewo lae wotsɔna kaa atam, eye woƒe atamkaka la nyea nyahehe ɖe sia ɖe ƒe nuwuwu, elabena enyea kpeɖodzinu le se nu na wo. 17  Nenema kee esime Mawu ɖoe be yeaɖee afia ŋugbedodo la ƒe domenyilawo geɖe wu be, yeƒe aɖaŋuɖoɖo metrɔna gbeɖegbeɖe o la, etsɔ atamkaka ɖo kpe edzi, 18  bene le nu eve siwo metrɔna o, siwo me Mawu mate ŋu aka aʋatso le o me la, dzideƒo sẽŋu nanɔ mí ame siwo si va sitsoƒe la si be míalé mɔkpɔkpɔ, si woɖo mía ŋkume la, me ɖe asi. 19  Mɔkpɔkpɔ sia le mía si abe seke ene na míaƒe luʋɔwo, eye wòli dedie heli ke, eye wògena ɖe xɔmetsovɔ la me, 20  afi si Yesu do ŋgɔ yi ɖe mía ta le, ame si zu nunɔlagã abe Melxizedek ene yi mavɔmavɔ me.

Etenuŋɔŋlɔ