Hebritɔwo 4:1-16

4  Eya ta esi ŋugbedodo aɖe gali hena gege ɖe eƒe dzudzɔ la me ta la, mina míakpɔ nyuie be wòagadze ɣeaɖeɣi abe ɖe mia dometɔ aɖe do kpo gege ɖe eme ene o.  Elabena wogblɔ nya nyui la na míawo hã, abe woawo ke ene; gake nya si wose la meɖe vi na wo o, elabena woƒe xɔse mewɔ ɖeka kple ame siwo see la tɔ o.  Elabena mí ame siwo ɖee fia be xɔse le mía si la, míeyina ɖe dzudzɔ la me, abe ale si wògblɔ ene be: “Eya ta meka atam le nye dziku me be, ‘Womage ɖe nye dzudzɔ la me o,’” togbɔ be wowu eƒe dɔwɔwɔwo nu tso xexea ƒe gɔmeɖoanyiɣi ke hã.  Elabena egblɔ nya si gbɔna la le afi aɖe le ŋkeke adrelia ŋu, be: “Eye Mawu dzudzɔ tso eƒe dɔwɔwɔwo katã me le ŋkeke adrelia dzi,”  eye wògagblɔ le afi sia be: “Womage ɖe nye dzudzɔ la me o.”  Eya ta esi wòsusɔ be ame aɖewo nage ɖe eme, eye ame siwo wogblɔ nya nyui la na gbã la mege ɖe eme o le tomaɖomaɖo ta la,  egaɖo ŋkeke aɖe ɖi, esi wògagblɔ le ɣeyiɣi didi aɖe megbe, le David ƒe psalmo me be “Egbea”; abe ale si míegblɔe va yi ene be: “Ne miese ye ŋutɔ ƒe gbe egbea la, migasẽ miaƒe dzi me o.”  Elabena ne ɖe Yosua kplɔ wo yi dzudzɔteƒe aɖe la, anye ne Mawu magaƒo nu tso ŋkeke bubu aɖe ŋu emegbe o.  Eya ta sabat ƒe dzudzɔ aɖe gakpɔtɔ li na Mawu ƒe amewo. 10  Elabena ame si ge ɖe Mawu ƒe dzudzɔ me la, edzudzɔ hã tso ye ŋutɔ ƒe dɔwɔwɔwo me, abe ale si ko Mawu hã dzudzɔ tso ye ŋutɔ tɔwo me ene. 11  Eya ta mina míawɔ míaƒe ŋutete ɖe sia ɖe be míage ɖe dzudzɔ ma me, bene ame aɖeke nagage ɖe tomaɖomaɖo ƒe nuwɔna ma tɔgbi me o. 12  Elabena Mawu ƒe nya la le agbe, eye ŋusẽ le eŋu, eye wòɖana wu yi nueve sia yi nueve, eye wòƒona ɖe ame yi ɖamaa keke luʋɔ kple gbɔgbɔ kple ƒunukpeƒewo kpakple ƒutomemi ke me, eye wòte ŋu dzea si dzi me susuwo kple tameɖoɖowo. 13  Eye nuwɔwɔ aɖeke mele ɣaɣla le Mawu ŋkume o, ke boŋ woklo nu le nuwo katã dzi, eye wodze gaglãa le ame si wòle be míabu akɔnta na la ŋkume. 14  Eya ta esi nunɔlagã si to dziƒowo me yi, si nye Yesu, Mawu ƒe Vi la, le mía si ta la, mina míayi edzi anɔ eyama me ʋum vevie. 15  Elabena menye nunɔlagã si mate ŋu ase veve ɖe míaƒe gbɔdzɔgbɔdzɔwo nu o ye le mía si o, ke boŋ esi wodo kpɔ le go sia go me abe mía ŋutɔwo ke ene ye, gake nu vɔ̃ mele eŋu o. 16  Eya ta mina míatsɔ nuƒoƒo dzinɔameƒotɔe ate ɖe amenuveve ƒe fiazikpui la ŋu, bene woakpɔ nublanui na mí, eye woave mía nu, wòanye kpekpeɖeŋu si sɔ ɖe ɣeyiɣi nyuitɔ dzi.

Etenuŋɔŋlɔ