Hebritɔwo 3:1-19

3  Eya ŋuti nɔvi kɔkɔewo, dziƒoyɔyɔ gome kpɔlawo, mibu apostolo kple nunɔlagã si me míeʋuna la ŋu—si nye Yesu.  Ewɔ nuteƒe na Ame si ɖoe, abe ale si Mose hã wɔ nuteƒe le Ame ma ƒe aƒe blibo la katã me ene.  Elabena wobui be edze na ŋutikɔkɔe geɖe wu Mose, esi wònye ame si tso aƒe la dze na bubu wu aƒea ta.  Nyateƒee, aƒe sia aƒe la, ame aɖee tsonɛ, gake ame si wɔ nuwo katã lae nye Mawu.  Eye Mose, si nye subɔvi, la wɔ nuteƒe le Ame ma ƒe aƒe blibo la katã me bene wòanye ɖaseɖiɖi hena nya siwo woava gblɔ emegbe la,  gake Kristo wɔ nuteƒe abe Vi ene le Ame ma ƒe aƒe la nu. Míawoe nye Ame ma ƒe aƒe la, ne míelé míaƒe nuƒoƒo dzinɔameƒotɔe kple míaƒe adegbeƒoƒo ɖe mɔkpɔkpɔ la ŋu me ɖe asi sesĩe va se ɖe nuwuwu.  Esia tae abe ale si gbɔgbɔ kɔkɔe la gblɔe ene be: “Ne miese ye ŋutɔ ƒe gbe egbea la,  migasẽ miaƒe dzi me, abe ale si wowɔ le ɣeyiɣi si me wodo dɔmedzoe nam helĩhelĩ, abe le ŋkeke si dzi wodom kpɔ le gbedadaƒo,  esime mia tɔgbuiwo dom kpɔ hetem kpɔ, evɔ wònye wokpɔ nye dɔwɔwɔwo ƒe blaene sɔŋ hafi, la ene o. 10  Esia tae dzidzime sia ƒe nu nyɔ ŋu nam, eye megblɔ be: ‘Wotraa mɔ ɣesiaɣi le woƒe dzi me, eye womedze si nye mɔwo o.’ 11  Eya ta meka atam le nye dziku me be, ‘Womage ɖe nye dzudzɔ la me o.’” 12  Nɔviwo, mikpɔ nyuie, be dzi vɔ̃ɖi maxɔse nagaɖo mia dometɔ aɖeke me, le esi wòle tetem ɖa le Mawu gbagbe la gbɔ ta o; 13  ke boŋ miyi edzi mianɔ nu xlɔ̃m mia nɔewo gbe sia gbe, zi ale si woate ŋu ayɔe be “Egbea,” bene nu vɔ̃ ƒe amebleŋusẽ nagana mia dometɔ aɖeke ƒe dzi me nasẽ o. 14  Elabena ne míelé kakaɖedzi, si nɔ mía si le gɔmedzedzea me la, me ɖe asi sesĩe va se ɖe nuwuwu ko hafi míazu Kristo la ƒe gomekpɔlawo ŋutɔŋutɔ, 15  esime wole gbɔgblɔm be: “Ne miese ye ŋutɔ ƒe gbe egbea la, migasẽ miaƒe dzi me, abe ale si wowɔ le ɣeyiɣi si me wodo dɔmedzoe nam helĩhelĩ ene o.” 16  Elabena ame kawoe see, evɔ wodo dɔmedzoe nɛ helĩhelĩ? Ɛ̃, ɖe menye ame siwo katã Mose kplɔ do goe tso Egipte lae oa? 17  Gawu la, ame kawo ƒe nue nyɔ ŋu na Mawu ƒe blaene sɔŋ? Alo menye ame siwo wɔ nu vɔ̃, ame siwo ƒe kukuwo tsi gbedadaƒo lae oa? 18  Gake ame kawoe wòka atam na be womage ɖe yeƒe dzudzɔ la me o ne menye ame siwo wɔ nu tomaɖomaɖotɔe lae oa? 19  Eya ta míekpɔe be, womete ŋu ge ɖe eme o le dzimaxɔse ta.

Etenuŋɔŋlɔ