Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Hebritɔwo 2:1-18

2  Esia tae wòle vevie na mí be míalé to ɖe nu siwo míese la ŋu geɖe wu, bene míagatra mɔ gbeɖe o.  Elabena ne nya si wogblɔ to mawudɔlawo dzi la li ke sesĩe, eye vodada ɖe sia ɖe kple tomaɖomaɖo ŋuti nuwɔna ɖe sia ɖe xɔ eŋuti tohehe le dzɔdzɔenyenye nu la,  ekema aleke míawɔ asi, ne míetsɔ ɖeke le ɖeɖekpɔkpɔ gã sia gbegbe me o, esi wònye wote eŋuti nya gbɔgblɔ to mía Aƒetɔ la dzi, eye ame siwo see la ka ɖe edzi na mí,  esime Mawu ŋutɔ hã tsɔ dzesiwo kple nukunuwo kpakple ŋusẽdɔ vovovowo, kple gbɔgbɔ kɔkɔe nana le eƒe lɔlɔ̃nu nu, ɖi ɖase hekpe ɖe wo ŋuti?  Elabena menye mawudɔlawo tee wòtsɔ anyigba si gbɔna, si dzi amewo anɔ, si ŋu míele nu ƒom tsoe, la de o.  Ke ɖasefo aɖe ɖo kpe edzi le afi aɖe be: “Nu kae amegbetɔ nye, be nèɖoa ŋku edzi, alo amegbetɔvi, be nèléa be nɛ?  Èbɔbɔe ɖe anyi vie wu mawudɔlawo; ètsɔ ŋutikɔkɔe kple bubu ɖɔ nɛ, eye nètsɔe ɖo wò asinudɔwɔwɔwo nu.  Ètsɔ nuwo katã de eƒe afɔ te.” Elabena esi Mawu tsɔ nuwo katã de ete la, megblẽ naneke ɖi, si metsɔ de ete o. Ke hã, fifia la, míekpɔe haɖe be wotsɔ nuwo katã de ete o;  gake míekpɔa Yesu, ame si wobɔbɔ ɖe anyi vie wu mawudɔlawo, ame si woɖɔ ŋutikɔkɔe kple bubu na le esi wòkpe ku ƒe fu, bene to Mawu ƒe amenuveve me la, wòaɖɔ ku kpɔ ɖe ame sia ame ta la ta. 10  Elabena esi ame si ta nuwo katã li ɖo, ame si dzi nuwo katã to va la, nɔ vi geɖewo kplɔm nɔ ŋutikɔkɔe me vam la, esɔ nɛ be yeawɔ woƒe Kplɔla Vevitɔ, ame si dzi wotona kpɔa ɖeɖe la, bliboe to fukpekpewo me. 11  Elabena ame si le amewo ŋu kɔm kple ame siwo ŋu kɔm wole la siaa dzɔ tso ame ɖeka me, eye le esia ta ŋu mekpee be wòayɔ wo be “nɔviwo” o, 12  esime wògblɔ be: “Maɖe gbeƒã wò ŋkɔ la na nɔvinyewo; madzi ha akafu wò le hame la titina.” 13  Egagblɔ hã be: “Maɖo ŋu ɖe eŋu.” Eye wògagblɔ be: “Kpɔ ɖa! Mía kple ɖevi sue siwo Yehowa nam lae nye esi.” 14  Eya ta esi wònye ‘ɖevi sueawo’ nye gomekpɔlawo le ʋu kple ŋutilã me ta la, eya hã kpɔ gome le nu mawo ke me, bene wòato eƒe ku la dzi axɔ ŋusẽ le ame si ate ŋu ahe ku avae la si, si nye Abosam; 15  eye be wòana ablɔɖe ame siwo katã zu kluviwo le woƒe agbenɔɣi katã le vɔvɔ̃ na ku ta la. 16  Elabena le nyateƒe me la, menye mawudɔlawo ŋue wòle kpekpem ɖo kura o, ke Abraham ƒe dzidzime la boŋ ŋue wòle kpekpem ɖo. 17  Eya ta eƒoe ɖe enu be wòava nɔ abe “nɔviawo” ene le goawo katã me, bene wòazu nunɔlagã nublanuikpɔla kple nyateƒetɔ le nu siwo ku ɖe Mawu ŋu me, bene wòasa avulévɔ ɖe amewo ƒe nu vɔ̃wo ta. 18  Elabena esi eya ŋutɔ kpe fu esime wonɔ edom kpɔ ta la, ate ŋu akpe ɖe ame siwo dom wole kpɔ la ŋu.

Etenuŋɔŋlɔ