Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Hebritɔwo 11:1-40

11  Xɔse nye dziɖoɖo ɖe nu siwo wole mɔ kpɔm na la ŋu kple kakaɖedzi, nu ŋutɔŋutɔ siwo li togbɔ be womekpɔa wo o la ŋuti ɖeɖe fia si dze kɔtɛ.  Elabena nu sia dzie blematɔwo to kpɔ ɖaseɖiɖi na wo ɖokuiwo.  Le xɔse me míekpɔe dze sii be woɖo nuɖoanyiwo ɖe ɖoɖo nu to Mawu ƒe nya la dzi, ale be nu si wokpɔna la dzɔ tso nu siwo medzena o la me.  Le xɔse me Abel tsɔ vɔsa si nyo wu Kain tɔ la na Mawu, eye wòto xɔse sia me kpɔ ɖaseɖiɖi na eɖokui be enye ame dzɔdzɔe, elabena Mawu ɖi ɖase tso eƒe nunanaawo ŋu; eye to esia dzi la, togbɔ be eku hã la, egale nu ƒom.  Le xɔse me wokɔ Henox dzoe, be wòagakpɔ ku o, eye womekpɔe le afi aɖeke o, elabena Mawu kɔe dzoe; elabena hafi woakɔe adzoe la, ekpɔ ɖaseɖiɖi be eƒe nu dze Mawu ŋu nyuie.  Gawu la, ne xɔse mele ame si o la, mate ŋu adze eŋu nyuie o, elabena ele be ame si tena vaa Mawu gbɔ la naxɔe ase be eli, eye be ezua teƒeɖola na ame siwo dinɛ vevie la.  Le xɔse me Noa, esime Mawu na toklãe tso nu siwo womekpɔ kpɔ haɖe o ŋu la, eɖe mawuvɔvɔ̃ fia, eye wòkpa aɖakaʋu aɖe hena eƒemetɔwo xɔxɔ ɖe agbe; eye to xɔse sia me la, ebu fɔ xexea, eye wòzu dzɔdzɔenyenye, si tso xɔse me la, ƒe domenyila.  Le xɔse me Abraham, esime woyɔe la, eɖo to hedo go yi teƒe si woɖo be wòaxɔ wòanye eƒe domenyinu la; eye wòdo go, togbɔ be menya afi si yim wònɔ o hã.  Le xɔse me enye amedzro nɔ ŋugbedodonyigba la dzi, abe dzronyigba dzi ene, eye woa kple Isak kpakple Yakob, ame siwo nye ŋugbedodo ma tututu ƒe domenyilawo kpe ɖe eŋu la, nɔ agbadɔwo me. 10  Elabena enɔ du si gɔmeɖoanyi ŋutɔŋutɔwo li na la lalam, du si ƒe aɖaŋuwɔla kple tsola ye nye Mawu. 11  Le xɔse me kee Sara ŋutɔ xɔ ŋusẽ fɔ dzidzimevi aɖe ƒe fu, esime wòtsi to vidzidzi me kura gɔ̃ hã, elabena ebu ame si do ŋugbea la nyateƒetɔe. 12  Esia tae tso ame ɖeka, si nɔ abe ame si ku ene, me la, wodzi vi siwo sɔ gbɔ abe dziƒoɣletiviwo ene, abe ƒutake siwo womate ŋu axlẽ o la ene. 13  Le xɔse me ame siawo katã ku togbɔ be woƒe asi mesu ŋugbedodoawo me vava dzi o hã, gake wokpɔ wo ɖaa le adzɔge, eye wodo ɖoaƒe na wo, eye woɖe gbeƒãe le dutoƒo be, yewonye amedzrowo kple ame siwo le anyigba la dzi hena ɣeyiɣi kpui aɖe. 14  Elabena ame siwo gblɔ nya siawo la na kpeɖodzi be yewole teƒe si azu yewo ŋutɔ ƒe nɔƒe la dim vevie. 15  Ke hã, ne ɖe wonɔ ŋku ɖom teƒe si woʋu tso dzi la, anye ne mɔnukpɔkpɔ su wo si wogbugbɔ yi. 16  Ke azɔ la, nɔƒe si nyo wu la le wo dzrom, si nye dziƒo tɔ. Eya ta ŋu mekpe Mawu le wo ŋu, be woayɔe be woƒe Mawu o, elabena edzra du aɖe ɖo ɖi na wo. 17  Le xɔse me Abraham, esime wodoe kpɔ la, etsɔ Isak na kloe, eye eya, ame si xɔ ŋugbedodoawo kple dzidzɔ la, tee kpɔ be yeatsɔ yeƒe tenuvi la ana, 18  togbɔ be wogblɔ nɛ be: “Nu si woayɔ be ‘wò dzidzime’ la ato Isak dzi” hã. 19  Gake ebui be Mawu ate ŋu afɔe ɖe tsitre tso ame kukuwo dome; eye exɔe tso afi ma hã wòzu kpɔɖeŋu. 20  Le xɔse me kee Isak yra Yakob kple Esau le nu siwo ava va la ŋu. 21  Le xɔse me Yakob, esime wòsusɔ vie wòaku la, eyra Yosef viŋutsuawo dometɔ ɖe sia ɖe, eye wòziɔ ɖe eƒe atizɔti ŋu de ta agu. 22  Le xɔse me Yosef, esime wòɖo kudo nu la, eƒo nu tso Israel viwo ƒe ʋuʋu la ŋu; eye wòde se ku ɖe eƒe ƒuwo ŋu. 23  Le xɔse me Mose dzilawo ɣlae ɣleti etɔ̃ sɔŋ le edzidzi vɔ megbe, elabena wokpɔe be ɖevi sue la dze ɖeka, eye womevɔ̃ fia ƒe sedede la o. 24  Le xɔse me Mose, esime wòtsi la, egbe be woagayɔ ye be Farao vinyɔnuvi la ƒe vi o, 25  eye wòtiae be woawɔ ŋlɔmi le ye ŋu kpe ɖe Mawu ƒe dukɔ la ŋu, wu be yeakpɔ gome le nu vɔ̃ ƒe vivisese me hena ɣeyiɣi vi aɖe ko, 26  elabena ebu ŋukpe si wodo Kristo la be enye kesinɔnu siwo ƒo Egipte ƒe nu xɔasiwo ta; elabena eƒe ŋku nɔ teƒeɖoɖofetu la ŋu tututu. 27  Le xɔse me edzo le Egipte, gake mevɔ̃ fia ƒe dziku la o, elabena eyi edzi nɔ te sesĩe, abe ɖe wònɔ Ame si womekpɔna o la kpɔm ene. 28  Le xɔse me eɖu ŋutitoto la hewɔ ɖe ʋuhehlẽ ƒe ɖoɖowo dzi, bene nutsrɔ̃la la nagaka asi woƒe ŋgɔgbeviwo ŋu o. 29  Le xɔse me woto Ƒu Dzĩ la me abe anyigba ƒuƒui dzi ene, gake esi Egiptetɔwo tee kpɔ la, ƒu la mi wo. 30  Le xɔse me Yerixo gliawo mu le xlãƒoƒoe ŋkeke adre megbe. 31  Le xɔse me Raxab gbolo la metsrɔ̃ kpe ɖe ame siwo wɔ nu tomaɖomaɖotɔe la ŋu o, elabena exɔ ŋkutsalawo le ŋutifafa me. 32  Eye nya kae magagblɔ? Elabena ɣeyiɣi manɔ anyi o, ne medi be mayi edzi aƒo nu tso Gideon, Barak, Simson, Yefta, David, kpakple Samuel kple nyagblɔɖila bubuawo ŋu, 33  ame siwo to xɔse me ɖu fiaɖuƒewo dzi le aʋa me, do nu dzɔdzɔe wɔwɔ ɖe ŋgɔ, xɔ ŋugbedodowo, mia nu na dzatawo, 34  tsi dzo ƒe ŋusẽ nu, si le yi nu, wona ŋusẽ ɖo wo ŋu le gbɔdzɔgbɔdzɔ me, wowɔ kalẽ le aʋawɔwɔ me, wosi aʋakɔ siwo tso dzronyigba dzi la vevie. 35  Nyɔnuwo xɔ woƒe ame kukuwo to tsitretsitsi dzi; gake wowɔ fu ame bubuwo vevie, elabena wogbe be yewomalɔ̃ be woana ɖeɖe yewo to tafe aɖeke dzi o, bene woakpɔ tsitretsitsi si nyo wu la. 36  Ɛ̃, ame bubuwo xɔ woƒe tetekpɔwo to fewuɖuɖuwo kple ƒoƒowo me, le nyateƒe me la, nu si wu ema, siwo nye bablawo kple gaxɔmenɔnɔwo. 37  Woƒu kpe wo, wote wo kpɔ, wodze wo kple laxalaxa, woku ɖe yi nu, wonɔ tsatsam le alẽgbalẽwo me, le gbɔ̃gbalẽwo me, esime wonɔ koɖoɖo me, xaxa me, ŋlɔmiwɔwɔ ɖe wo ŋu me; 38  eye xexea medze woanɔ eme o. Wotsa tsaglãla le gbedadaƒowo kple towo kpakple anyigba dzi agadowo kple dowo me. 39  Ke hã, togbɔ be ame siawo katã kpɔ ɖaseɖiɖi na wo ɖokuiwo to woƒe xɔse me hã la, womekpɔ ŋugbedodo la me vava o, 40  elabena Mawu kpɔ nane si nyo wu la ɖi na mí do ŋgɔ, bene woagawɔ wo bliboe míawo manɔmee o.

Etenuŋɔŋlɔ