Dzo kpo yi emenuwo dzi

Dzo kpo yi emenuawo dzi

Galatiatɔwo 5:1-26

5  Ablɔɖe sia tae Kristo na ablɔɖe mí ɖo. Eya ta minɔ te sesĩe, eye migaɖe mɔ woagatsɔ mi ade kluvinyenye ƒe kɔkuti te ake o.  Kpɔ ɖa! Nye Paulo mele egblɔm na mi be, ne miena wotso aʋa na mi la, ekema Kristo manye viɖe aɖeke na mi o.  Gawu la, megale ɖase ɖim na ame sia ame si ana woatso aʋa nɛ la be, ele nɛ hã be wòawɔ Se blibo la katã dzi.  Mi ame siwo katã le agbagba dzem be woabu yewo ame dzɔdzɔewo to sea dzi la, woɖe mi ɖa le Kristo ŋu; mieɖe mia ɖokui ɖa tso eƒe amenuveve la ŋu.  Ke míawo ya míeto gbɔgbɔ la dzi le dzɔdzɔenyenye, si tsoa xɔse me, si míele mɔ kpɔm na la, lalam vevie.  Elabena le Kristo Yesu gome la, asixɔxɔ aɖeke mele aʋatsotso alo aʋamatsomatso ŋu o, hafi boŋ xɔse, si wotu ɖe lɔlɔ̃ dzi ŋu ye asixɔxɔ le.  Mienɔ dua ƒum nyuie. Ame kae xe mɔ na mi be miagayi edzi aɖo to nyateƒe la o?  Menye Ame si le mia yɔm la gbɔe nyaƒoɖeamenu sia ƒomevi tso o.  Amɔwɔʋãnu vi aɖe nana amɔwɔ blibo la katã ʋãna. 10  Meka ɖe edzi be, mi ame siwo le ɖekawɔwɔ me kple Aƒetɔ la ya miegbɔna miaƒe susu trɔ ge o; gake ame si le fu ɖem na mi la akpɔ eƒe ʋɔnudɔdrɔ̃, ame ka kee wòɖanye o. 11  Le gonyeme la, nɔviwo, ne ɖe megale gbeƒã ɖem tso aʋatsotso ŋu la, ke nu ka tae wogale yonyeme tim kokoko? Ekema le nyateƒe me la, woɖe fuwɔametia ŋuti nukikli la ɖa. 12  Ðe madi be ame siwo le agbagba dzem be yewoatrɔ miaƒe susu la, nana woata woawo ŋutɔwo gɔ̃ hã hafi. 13  Nɔviwo, ele eme baa be ablɔɖe tae woyɔ mi ɖo ya; ɖeko migazã ablɔɖe sia wòanye mɔnunana ŋutilã la o, ke boŋ misubɔ mia nɔewo abe kluviwo ene, le lɔlɔ̃ me. 14  Elabena Se blibo la katã nɔ te ɖe nya ɖeka sia dzi, be: “Ele be nàlɔ̃ hawòvi abe wò ŋutɔ ɖokuiwò ene.” 15  Ke ne mieyi edzi le mia nɔewo ɖum, eye miele mia nɔewo mim la, mikpɔ nyuie, be miagatsrɔ̃ mia nɔewo o. 16  Gake mele egblɔm be: Miyi edzi miazɔ le gbɔgbɔ me, ekema miele ŋutilã ƒe nudzodzro aɖeke kura dzi wɔ ge o. 17  Elabena ŋutilã la tsia tsitre ɖe gbɔgbɔ la ŋu le eƒe nudzodzro me, eye gbɔgbɔ la ɖe ŋutilã la ŋu; elabena nu siawo tsia tsitre ɖe wo nɔewo ŋu, si wɔe be, nu siwo tututu miadi be yewoawɔ hafi la, miewɔa wo o. 18  Gawu la, ne gbɔgbɔ lae le mia kplɔm la, ke miele se la te o. 19  Azɔ ŋutilã ƒe dɔwɔwɔwo dze ƒãa, eye woawoe nye agbe gbegblẽ nɔnɔ, makɔmakɔnyenye, ŋukpenanuwɔwɔ, 20  trɔ̃subɔsubɔ, gbɔgbɔyɔyɔ, keléle, dzrewɔwɔ, ŋuʋaʋã, dɔmedzoedodowo, nyahehewo, mamawo, kɔmamawo, 21  ŋubiabiãwo, ahamumuwo, aglotutu siwo gbɔ eme, kple nu siawo tɔgbiwo. Mele nu xlɔ̃m mi ku ɖe nu siawo ŋu do ŋgɔ, abe ale si mexlɔ̃ nu mi do ŋgɔ ene be, ame siwo wɔa nu siawo la, womanyi Mawu ƒe fiaɖuƒe la dome o. 22  Ke gbɔgbɔ la ƒe kutsetse ye nye lɔlɔ̃, dzidzɔ, ŋutifafa, dzigbɔgbɔ blewu, dɔmenyonyo, nyuiwɔwɔ, xɔse, 23  tufafa, ɖokuidziɖuɖu. Se aɖeke metsi tsitre ɖe nu siawo ŋu o. 24  Gawu la, ame siwo nye Kristo Yesu tɔ la he ŋutilã kpakple eƒe nudzodzrowo kple nudidiwo ɖe ati ŋu. 25  Ne gbɔgbɔ la nue míele agbe nɔm ɖo la, ekema mina míayi edzi azɔ ɖe ɖoɖo nu le gbɔgbɔ me hã. 26  Migana míazu ame siwo dia bubu dzodzro, ʋlia ho kple wo nɔewo, biãa ŋu wo nɔewo o.

Etenuŋɔŋlɔ