Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Filipitɔwo 4:1-23

4  Eya ta nɔvinye lɔlɔ̃tɔ, siwo le dzroyem vevie, nye dzidzɔ kple nye fiakuku la, minɔ te sesĩe alea le Aƒetɔ la me, nye lɔlɔ̃tɔwo.  Mele nu xlɔ̃m Ewodia, eye mele nu xlɔ̃m Sintixe, be woƒe tamesusu nanɔ ɖeka le Aƒetɔ la me.  Ɛ̃, mele kuku ɖem na wò hã, hati kɔkutitsɔla vavã, be nànɔ kpekpem ɖe nyɔnu siawo ŋu, ame siwo ʋli kplim aduadu le nya nyui la ta hekpe ɖe Klemens kpakple hanyedɔwɔla susɔeawo ŋu, ame siwo ƒe ŋkɔwo le agbegbalẽa me.  Dzi nedzɔ mi le Aƒetɔ la me ɖaasi. Megale egblɔm ake be: Dzi nedzɔ mi!  Mina amewo katã nanyae be nugɔmeselawo mienye. Aƒetɔ la gogo.  Migatsi dzimaɖi le naneke ŋuti o, ke boŋ le nu sia nu me la, mitsɔ gbedodoɖa kple kokoƒoƒo kpakple akpedada ana Mawu nanya miaƒe didiwo;  eye Mawu ƒe ŋutifafa, si ƒoa susu ɖe sia ɖe ta la, adzɔ miaƒe dziwo kple miaƒe tamesusuwo ŋu to Kristo Yesu dzi.  Mlɔeba la, nɔviwo, nu siwo katã nye nyateƒe, nu siwo katã ŋu wòhiã be woabu vevie, nu siwo katã le dzɔdzɔe, nu siwo katã le dzadzɛ, nu siwo katã dze na lɔlɔ̃, nu siwo katã ŋu woƒoa nu nyui le, ne nɔnɔme nyui aɖe li, eye ne nane li si dze kafukafu la, minɔ nu siawo ŋu bum.  Nu siwo miesrɔ̃, eye miexɔ, eye miese, eye miekpɔ le gbɔnye la, minɔ nu siawo wɔwɔ dzi; eye ŋutifafa ƒe Mawu la anɔ anyi kpli mi. 10  Mele dzidzɔ geɖe kpɔm le Aƒetɔ la me, be miegate ŋunye bubu ake; mienɔ nye nyonyo ŋu bum vavã, gake mɔnukpɔkpɔ mesu mia si mieɖee fia o. 11  Menye ɖe mele esia gblɔm abe ɖe nu hiãm ene o, elabena le nɔnɔme ɖe sia ɖe si me mele la, mesrɔ̃e be ele be nu siwo le asinye la nadze ŋunye. 12  Ɛ̃, menya ale si nu hiãa ame, ɛ̃, menya ale si nu bɔna ɖe ame si. Le nu sia nu kple nɔnɔme ɖe sia ɖe me la, mesrɔ̃ nu ɣaɣla sia: be manya ale si woɖia ƒo kple ale si dɔ wua ame, ale si nu bɔna ɖe ame si kple ale si nu hiãa ame. 13  Le nuwo katã gome la, mekpɔa ŋusẽ tso ame si doa ŋusẽm la gbɔ. 14  Ke hã, miewɔe nyuie, be miezu gomekpɔlawo kplim le nye xaxawo me. 15  Le nyateƒe me la, mi Filipitɔwo mienyae hã be, le nya nyui la gbɔgblɔ ƒe gɔmedzedze me, esi medzo le Makedonia la, hame aɖeke mekpɔ gome kplim le nunana kple nuxɔxɔ ƒe nya me o, negbe miawo ko; 16  elabena esime menɔ Tesalonika kura gɔ̃ hã la, mieɖo nu siwo hiãm la ɖem, menye zi ɖeka ko o, ke boŋ zi eve sɔŋ. 17  Menye be ɖe mele nunana la dim vevie o, ke boŋ kutsetse, si ana miakpɔ viɖe geɖe ɖe edzi la dim mele vevie. 18  Ke hã, nuwo katã le asinye, eye wosɔ gbɔ nam. Meyɔ gba go fifia si mexɔ nu siwo mieɖo ɖem to Epafrodito dzi la, nu siwo nye ʋeʋẽ lilili, vɔsa nyui, si dzea Mawu ŋu la. 19  Nye Mawu hã ana nu siwo katã miahiã la mi, le eƒe ŋutikɔkɔe ƒe kesinɔnuwo nu to Kristo Yesu dzi. 20  Ke mía Mawu kple Fofo la tɔ nanye kafukafu tso mavɔ me yi mavɔ me. Amen. 21  Mido gbe na ame kɔkɔe ɖe sia ɖe si le ƒomedodo me kple Kristo Yesu la nam. Nɔvi siwo le gbɔnye la do gbe na mi. 22  Ame kɔkɔewo katã do gbe na mi, vevietɔ ame siwo le Kaisaro ƒe aƒe me. 23  Aƒetɔ Yesu Kristo ƒe amenuveve nanɔ anyi kple gbɔgbɔ si mieɖena fiana la.

Etenuŋɔŋlɔ