Filipitɔwo 3:1-21

3  Mlɔeba la, nɔvinyewo, miyi edzi mianɔ dzidzɔ kpɔm le Aƒetɔ la me. Meɖe fu nam be manɔ nya mawo ke ŋlɔm ɖo ɖe mi o, gake miaƒe dedienɔnɔ tae.  Mikpɔ nyuie le avuawo ŋuti, mikpɔ nyuie le dɔwɔla vɔ̃ɖiwo ŋuti, mikpɔ nyuie le ame siwo dea abi woƒe ŋutilã ŋu la ŋuti.  Elabena míawoe wotso aʋa na ŋutɔŋutɔ, mí ame siwo wɔa subɔsubɔdɔ kɔkɔe to Mawu ƒe gbɔgbɔ la dzi, eye míaƒe adegbeƒoƒo le Kristo Yesu me, eye míeɖoa ŋu ɖe ŋutilã ŋuti o,  togbɔ be ne ame aɖe aɖo ŋu ɖe ŋutilã ŋuti la, anye nyee wòanye hafi. Ne ame bubu aɖe bu be susu aɖewo li, si tae yeaɖo ŋu ɖe ŋutilã ŋuti la, susu geɖe wu le asinye:  wotso aʋa nam le ŋkeke enyiagbe, metso Israel ƒomea me, le Benyamin toa me, menye Hebritɔ si Hebritɔwo dzi; le se gome la, Farisitɔe menye;  le veviedodo gome la, meti hame la yome; le dzɔdzɔenyenye si to se la dzi gome la, menye mokakamanɔŋutɔ.  Ke hã, nu siwo nye viɖe nam tsã la, mebu nu siawo nu bubu le Kristo la ta.  Nyateƒee, le esia ta mebua nuwo katã hã be wonye nu bubu le nye Aƒetɔ Kristo Yesu ŋuti sidzedze ƒe asixɔxɔ, si nyo wu sãsãsã la ŋuti. Le eyama ta melɔ̃ nuwo katã zu nu bubu, eye mebua wo abe gbeɖuɖɔ dzro aɖe ko ene, bene Kristo nasu asinye,  eye be manɔ ƒomedodo me kplii, eye nye ŋutɔ nye dzɔdzɔenyenye si tso se me la naganɔ asinye o, ke esi tso Kristo dzi xɔxɔse me la boŋ, si nye dzɔdzɔenyenye si tso Mawu gbɔ to xɔse me, 10  bene manya eya kple eƒe tsitretsitsi la ƒe ŋusẽ kpakple gomekpɔkpɔ le eƒe fukpekpewo me, eye malɔ̃ faa aku eƒe ku tɔgbi, 11  ne makpɔe ɖa be, mate ŋu ato mɔ aɖe dzi akpɔ gome le ame kukuwo ƒe tsitretsitsi si ado ŋgɔ la me hã. 12  Menye be mexɔe xoxo, alo wona mede blibo haɖe o, ke boŋ mele edzi, be makpɔe ɖa ne nye asi ate ŋu asu nu si ta Kristo Yesu hã ƒe asi su dzinye ɖo la dzi. 13  Nɔviwo, nyemebua ɖokuinye be nye asi su edzi haɖe o; gake nu ɖeka aɖe le eŋu: Mele nu siwo le megbenye la ŋlɔm be, eye mele nu siwo le ŋgɔnye la minyam, 14  mele du la dzi ɖo ta taɖodzinu la gbɔ, hena Mawu ƒe ameyɔyɔ yi dziƒo ƒe fetu la to Kristo Yesu dzi. 15  Eya ta mina tamesusu ƒe nɔnɔme sia nanɔ mía dometɔ siwo katã tsi bliboe la si; eye ne susu bubu aɖe le mia si le nane ŋu la, Mawu aɖe nɔnɔme si ŋu meƒo nu le va yi la afia mi. 16  Aleke kee wòɖale o, afi ka kee míewɔ ŋgɔyiyi se ɖo o, mina míayi ŋgɔ tẽe le ɖoɖo nu le mɔ ma ke nu. 17  Nɔviwo, miwɔ ɖeka miazu srɔ̃nyelawo, eye mina miaƒe ŋku nanɔ ame siwo le zɔzɔm le mɔ si wɔ ɖeka kple kpɔɖeŋu si miekpɔ le mía gbɔ nu la ŋu. 18  Elabena ame geɖewo li—tsã la, meyɔa wo ŋkɔ edziedzi, gake fifia la, metsɔ aɖatsiwo hã le wo ŋkɔ yɔm—siwo le zɔzɔm abe Kristo la ƒe fuwɔameti la ƒe futɔwo ene, 19  eye woƒe nuwuwu nye tsɔtsrɔ̃, eye woƒe ƒodo ye nye woƒe mawu, eye woƒe ŋukpee nye woƒe kafukafu, eye woƒe susuwo le anyigba dzi nuwo ŋu. 20  Ke míawo ya la, míaƒe dumevinyenye ƒe gomenɔamesi le dziƒowo, afi si hã míele ɖela, si nye Aƒetɔ Yesu Kristo la, lalam vevie tso, 21  ame si atrɔ míaƒe bɔbɔɖeanyi ƒe ŋutilã sia wòasɔ ɖe eƒe ŋutikɔkɔe ƒe ŋutilã la nu, le ŋusẽ si le esi, be wòabɔbɔ nuwo katã ɖe eɖokui te la, ƒe dɔwɔwɔ nu.

Etenuŋɔŋlɔ