Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Filipitɔwo 1:1-30

1  Paulo kple Timoteo, Kristo Yesu ƒe kluviwo, le esia ŋlɔm na ame kɔkɔe siwo katã le ƒomedodo me kple Kristo Yesu, siwo le Filipi, kple dzikpɔlawo kpakple subɔsubɔdɔwɔlawo:  Amenuveve kple ŋutifafa, si tso Mawu mía Fofo kple Aƒetɔ Yesu Kristo gbɔ la, woana mi.  Ɣesiaɣi si meɖo ŋku mia dzi la, medaa akpe na nye Mawu ɖaa  le nye kokoƒoƒo ɖe sia ɖe, si me metsɔa dzidzɔ ƒoa koko ɖe mi katã ta le, la me,  le miaƒe asikpekpe ɖe nya nyui la ŋu tso ŋkeke gbãtɔ dzi va se ɖe fifia ta.  Elabena meka ɖe nu sia tututu dzi: be ame si dze dɔ nyui wɔwɔ gɔme le mia me la, awɔe ade goe va se ɖe Yesu Kristo ƒe ŋkeke la dzi.  Esɔ be masusu nu sia le mi katã ŋu, le esi miele nye dzi me, eye mi katã mienye gomekpɔlawo kplim le amenuveve la me, le nye gaxɔ me bablawo kpakple nya nyui la ta ʋiʋli kple eɖoɖo anyi le se nu siaa me la ta.  Elabena Mawue nye ɖasefo nam be, lɔlɔ̃ si le Kristo Yesu si la tɔgbi ye metsɔ le mi katã susum vevie.  Eye nu si ŋuti meyia edzi doa gbe ɖa ɖo lae nye esi: be miaƒe lɔlɔ̃ nanɔ dzidzim ɖe edzi geɖe wu le sidzedze vavãtɔ kple nugɔmesese blibo me; 10  bene miakpɔ nu siwo le vevie wu la adze sii nyuie, bene mianye ame dzadzɛwo, eye miaganɔ nukikli zum na ame bubuwo o, va se ɖe Kristo ƒe ŋkeke la dzi, 11  eye be dzɔdzɔenyenye ƒe ku si to Yesu Kristo dzi la nayɔ mi fũu, hena Mawu ƒe ŋutikɔkɔe kple kafukafu. 12  Ke nɔviwo, mele didim be mianyae be, nu siwo dzɔ ɖe dzinye la na be nya nyui la va ɖe zɔ yi ŋgɔ boŋ, 13  eye ale Roma fiagã ƒe dzɔlawo katã kple ame susɔeawo katã va nyae be Kristo tae mele bablawo me ɖo; 14  eye esi kakaɖedzi su nɔvi siwo le Aƒetɔ la me dometɔ akpa gãtɔ si le nye gaxɔ me bablawo ŋu ta la, wole dzideƒo geɖe wu ɖem le fiafiam le Mawu ƒe nya la gbɔgblɔ me vɔvɔ̃manɔmee. 15  Nyateƒee, ame aɖewo le gbeƒã ɖem Kristo la le ŋubiabiã kple hoʋiʋli me, gake bubuwo hã tsɔ didi vevi le ewɔm. 16  Ame mamlɛtɔ siawo le gbeƒã ɖem Kristo la le lɔlɔ̃ ta, elabena wonya be nya nyui la ta ʋiʋli tae mele afi sia ɖo; 17  gake ame gbãtɔawo tsɔ dzrewɔwɔ ƒe gbɔgbɔ le ewɔm, menye kple susu nyui o, elabena wosusuna be yewoahe xaxa avae nam le nye gaxɔ me bablawo me. 18  Ekema nu kae? Menye nanekee o, eya koe nye be mɔ ka nue woɖawɔe le o, eɖanye susu gbegblẽ alo susu nyui ye o, wole gbeƒã ɖem Kristo, eye mele dzidzɔ kpɔm le esia ta. Le nyateƒe me la, mayi edzi anɔ dzidzɔ kpɔm, 19  elabena menya be esia ahe ɖeɖekpɔkpɔ avae nam to miaƒe kokoƒoƒo kple Yesu Kristo ƒe gbɔgbɔ la ƒe kpekpeɖeŋu dzi, 20  le nye mɔkpɔkpɔ vevi kple kakaɖedzi be ŋu makpem le mɔ aɖeke nu o, ke boŋ be woato ŋutilã la dzi ado Kristo ɖe dzi fifia, abe ale si wònɔna ɖaa tsã ene, to nye nuƒoƒo dzinɔameƒotɔe me, eɖanye to agbe me alo ku me o, la nu. 21  Elabena le gonyeme la, ne mele agbe la, Kristoe, eye ne meku la, viɖee wònye. 22  Ke be mayi edzi anɔ agbe le ŋutilã me la, nye dɔwɔwɔ me kutsetsee—ke hã, nu si wòle be matia la, nyemena wonya o. 23  Mexaxa le nu eve siawo dome; gake nu si le dzroyem lae nye asiɖeɖe le ŋunye kple Kristo gbɔ nɔnɔ, elabena le nyateƒe me la, esia nyo wu sãa. 24  Ke hã, le gonyeme la, ehiã be makpɔtɔ anɔ ŋutilã me le mia ta. 25  Eye esi meka ɖe esia dzi ta la, menyae be makpɔtɔ anɔ anyi, eye mayi edzi anɔ anyi kpli mi katã hena miaƒe ŋgɔgbedede kple miaƒe xɔse me dzidzɔ, 26  bene miaƒe aseyetsotso la nagba go le Kristo Yesu me le tanye to nye anyinɔnɔ kpli mi ake me. 27  Ðeko minɔ agbe ale si dze Kristo la ƒe nya nyui la, be ne meva kpɔ mi ɖa alo nyemeli o la, mase tso mia ŋu be miele tsitre sesĩe le gbɔgbɔ ɖeka me, hetsɔ luʋɔ ɖeka le nya nyui la ƒe xɔse la ta ʋlim aduadu, 28  eye be miele ame siwo le tsitre tsim ɖe mia ŋu la ƒe ŋɔdzidodo vɔ̃m le go aɖeke me o. Nu sia tututu nye tsɔtsrɔ̃ ƒe kpeɖodzi na wo, ke miawo la, ɖeɖekpɔkpɔ ƒe kpeɖodzi wònye na mi; eye dzesi sia tso Mawu gbɔ, 29  elabena miawoe wona mɔnukpɔkpɔe le Kristo ta, menye be miaxɔ edzi ase ko o, ke be miakpe fu ɖe eta hã. 30  Elabena miawo hã miele ʋiʋli ma ke, si miekpɔm meʋli, eye miegale eŋu nya sem fifia le ŋunye, la ʋlim.

Etenuŋɔŋlɔ