Efesotɔwo 5:1-33

5  Eya ta mizu Mawu srɔ̃lawo, abe lɔlɔ̃viwo ene,  eye miyi edzi miazɔ le lɔlɔ̃ me, abe ale si ko Kristo la hã lɔ̃ mi, eye wòtsɔ eɖokui na ɖe mia ta wònye nunana kple vɔsa na Mawu, be wòanye ʋeʋẽ lilili la ene.  Migana woayɔ agbe gbegblẽ nɔnɔ kple makɔmakɔnyenye ƒomevi aɖeke alo ŋukeklẽ ŋkɔ teti gɔ̃ hã le mia dome o, abe ale si ko wòdze ame kɔkɔewo ene;  kple ŋukpenanuwɔwɔ alo bometsinyagbɔgblɔ, alo fefenya madzeto, nu siwo mesɔ o, ke akpedada boŋ.  Elabena mienya esia, le nyateƒe me la, miawo ŋutɔwo mienyae nyuie, be domenyinyi aɖeke meli na agbe gbegblẽ nɔla alo ame makɔmakɔ alo ŋuklẽla—si fia be ame nye trɔ̃subɔla—le Kristo la kple Mawu ƒe fiaɖuƒe la me o.  Migana ame aɖeke natsɔ nya ƒuƒluwo able mi o, elabena nu siwo meyɔ do ŋgɔ la tae Mawu ƒe dziku gbɔna tomaɖomaɖo ƒe viwo dzi ɖo.  Eya ta migade ha kpli wo o;  elabena tsã la, mienye viviti, ke azɔ la, mienye kekeli le Aƒetɔ la me. Miyi edzi mianɔ zɔzɔm abe kekeli ƒe viwo ene,  elabena kekeli la ƒe kutsetse ye nye nyuiwɔwɔ kple dzɔdzɔenyenye kpakple nyateƒe ɖe sia ɖe ƒomevi. 10  Miyi edzi mianɔ nuwo dom kpɔ, be wodze Aƒetɔ la ŋu hã; 11  eye midzudzɔ gomekpɔkpɔ kpli wo le dɔwɔwɔ matseku siwo nye viviti la ƒe dɔwo me, ke boŋ minɔ nya hem ɖe wo ŋu kura gɔ̃ hã, 12  elabena nu siwo wowɔna le ɣaɣlaƒe la, enye ŋukpe be woagblɔ wo ŋu nya kura gɔ̃ hã. 13  Ke nu siwo katã ŋu wole nya hem ɖo la, kekeli la ɖea wo ɖe go, elabena nu sia nu si woɖe ɖe go la, enye kekeli. 14  Esia tae wògblɔ be: “Oo, alɔ̃dɔla, nyɔ, eye nàfɔ tso ame kukuwo dome, eye Kristo la aklẽ ɖe dziwò.” 15  Eya ta mikpɔ nyuie, be ale si miezɔna la naganye abe numanyalawo ene o, ke boŋ abe nunyalawo ene, 16  eye miƒle ɣeyiɣi si sɔ la na mia ɖokui, elabena ŋkekeawo nye vɔ̃. 17  Esia ta midzudzɔ ame masenugɔmewo zuzu, ke boŋ miyi edzi miakpɔ nu si nye Yehowa ƒe lɔlɔ̃nu adze sii. 18  Eye miganɔ wain mum, si me nu baɖabaɖa wɔwɔ le la o, ke boŋ mina gbɔgbɔ la nanɔ mia yɔm fũu, 19  eye mitsɔ psalmowo kple Mawu kafukafu nyawo kpakple gbɔgbɔmehawo ƒo nu na mia nɔewo, miadzi ha, eye miaƒo ha le miaƒe dziwo me na Yehowa, 20  eye minɔ akpe dam na mía Mawu kple Fofo la le nuwo katã ŋuti ɣesiaɣi le mía Aƒetɔ Yesu Kristo ƒe ŋkɔ me. 21  Mibɔbɔ mia ɖokui na mia nɔewo le Kristo vɔvɔ̃ me. 22  Srɔ̃nyɔnuwo nebɔbɔ wo ɖokuiwo na wo srɔ̃wo, abe ale si woabɔbɔ na Aƒetɔ la ene, 23  elabena ŋutsue nye ta na srɔ̃a, abe ale si Kristo la hã nye ta na hame la ene, eye eyae nye ŋutilã sia ɖela. 24  Le nyateƒe me la, abe ale si hame la bɔbɔa eɖokui na Kristo la ene la, srɔ̃nyɔnuwo hã nebɔbɔ wo ɖokuiwo na wo srɔ̃wo le nu sia nu me. 25  Srɔ̃ŋutsuwo, miyi edzi mialɔ̃ mia srɔ̃wo, abe ale si ko Kristo la hã lɔ̃ hame la, eye wòtsɔ eɖokui na ɖe eta la ene, 26  bene wòakɔ eŋuti, aklɔ eŋuti to tsiléle nɛ me to nya la dzi, 27  bene wòatsɔ hame la aɖo ye ŋutɔ ŋkume le eƒe atsyɔ̃ɖoɖo me, esime ɖi, alo ayiléle, alo nu siawo tɔgbi aɖeke manɔ eŋu o, ke boŋ bene wòanɔ kɔkɔe, eye kpɔtsɔtsɔ aɖeke naganɔ eŋu o. 28  Alea wòle be srɔ̃ŋutsuwo nanɔ wo srɔ̃wo lɔ̃m abe woawo ŋutɔwo ƒe ŋutilãwo ene. Ŋutsu si lɔ̃a srɔ̃a la, elɔ̃a eɖokui, 29  elabena ame aɖeke melé fu ye ŋutɔ ƒe ŋutilã kpɔ o; ke boŋ enyinɛ, eye wòléa be nɛ nyuie, abe ale si Kristo la hã wɔna na hame la ene, 30  elabena eƒe ŋutilã ƒe ŋutinuwo míenye. 31  “Esia tae ŋutsu agblẽ fofoa kple dadaa ɖi, eye wòalé ɖe srɔ̃a ŋu, eye woa kple eve la woazu ŋutilã ɖeka.” 32  Nya ɣaɣla kɔkɔe sia lolo. Ke Kristo kple hame la ŋue mele nu ƒom le. 33  Ke hã, mia dome ŋutsu ɖe sia ɖe hã nelɔ̃ srɔ̃a abe ale si wòlɔ̃a eɖokui ene; ke ele be srɔ̃nyɔnu hã nade bubu deto srɔ̃a ŋu.

Etenuŋɔŋlɔ