Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Efesotɔwo 2:1-22

2  Gawu la, miawoe Mawu gbɔ agbee, togbɔ be mienye ame kukuwo le miaƒe vodadawo kple nu vɔ̃wo me tsã hã,  esiwo me miezɔna le tsã le xexe sia ƒe nuɖoanyi la nu, le fia si kpɔ ŋusẽ ɖe ya, si nye gbɔgbɔ si le dɔ wɔm le tomaɖomaɖo ƒe viwo me fifia dzi la, ƒe lɔlɔ̃nu nu.  Ɛ̃, mí katã míenɔ agbe le wo dome tsã le míaƒe ŋutilã ƒe nudzodzrowo nu, eye míenɔ nu siwo ŋutilã la kple tamesusuwo di la wɔm, eye míenye dziku ƒe viwo tso dzɔdzɔme abe ame susɔeawo ke ene tsã.  Gake Mawu, ame si nye kesinɔtɔ le nublanuikpɔkpɔ me la, le lɔlɔ̃ gã si wòtsɔ lɔ̃ mí ŋuti la,  egbɔ agbe mí kpe ɖe Kristo ŋu, esime míeku le vodadawo me kura gɔ̃ hã—amenuveve ye na woɖe mi—  eye wòfɔ mí ɖe tsitre ɖekae hena míebɔbɔ nɔ anyi ɖekae le dziƒonutowo me kple Kristo Yesu,  bene le nuɖoanyi siwo gbɔna me la, woaɖe eƒe amenuveve ƒe kesinɔnu siwo ƒo nu sia nu ta sãsãsã la afia le eƒe dɔmekɔkɔ ɖe mí, ame siwo le ƒomedodo me kple Kristo Yesu, la me.  Le nyateƒe me la, amenuveve siae na woɖe mi to xɔse me; eye menye mia gbɔe esia tso o, Mawu ƒe nunana ye.  Ao, metso dɔwɔwɔwo me o, bene naneke naganɔ anyi, si ta ame aɖe naƒo adegbe ɖo o. 10  Elabena eƒe dɔwɔwɔ me tsonu ye míenye, eye wowɔ mí míele ƒomedodo me kple Kristo Yesu hena dɔ nyuiwo, esiwo Mawu dzra ɖo ɖi do ŋgɔ na mí be míazɔ le wo me la, wɔwɔ. 11  Eya ta nenɔ susu me na mi ɣesiaɣi be tsã la, mienye dukɔwo me tɔwo le ŋutilã nu; nu si woyɔna be “aʋatsotso,” si wotsɔ asi wɔ le ŋutilã me la, yɔa mi be “aʋamatsomatso”— 12  be Kristo menɔ mia si le ɣeyiɣi ma tututu me o, eye mienɔ adzɔge na Israel dukɔa henye ame tutɔwo na ŋugbedodo ƒe nubablaawo, eye mɔkpɔkpɔ aɖeke menɔ mia si o, eye Mawu menɔ mia si le xexea me o. 13  Gake fifia miele ƒomedodo me kple Kristo Yesu, mi ame siwo nɔ adzɔge ʋĩi tsã la, mieto Kristo la ƒe ʋu la dzi te va. 14  Elabena eyae nye míaƒe ŋutifafa, eya si na akpa eveawo va zu ɖeka, eye wòmu gli, si ma wo dome la ɖa. 15  Eto eƒe ŋutilã dzi ɖe fuléle la, si nye Se si me sededewo kple ɖoɖowo nɔ la ɖa, bene wòatsɔ dukɔ eve la awɔ ame yeye ɖeka le ƒomedodo me kplii ahawɔ ŋutifafa; 16  eye be wòadzra dukɔ eveawo dome ɖo le ŋutilã ɖeka me na Mawu to fuwɔameti la dzi, elabena eto eɖokui dzi wu fuléle la. 17  Eye wòva gblɔ ŋutifafa ƒe nya nyui la na mi ame siwo le adzɔge ʋĩi, kple ŋutifafa na ame siwo le kpuiƒe, 18  elabena to eyama dzi mí dukɔ eveawo siaa míete ɖe Fofo la ŋu to gbɔgbɔ ɖeka dzi. 19  Eya ta mieganye ame tutɔwo kple amedzro siwo le dukɔ aɖe me ko o, ke boŋ mienye ame kɔkɔewo ƒe hati dumeviwo kple Mawu ƒe aƒe la me tɔwo, 20  eye wotu mi ɖe apostoloawo kple nyagblɔɖilawo ƒe gɔmeɖoanyi dzi, esi Kristo Yesu ŋutɔ nye dzogoedzikpe la. 21  Xɔ blibo si wotu kpe ɖo nyuie la le tsitsim le ƒomedodo me kplii le gbedoxɔ kɔkɔe zum na Yehowa. 22  Wole mi ame siwo le ƒomedodo me kplii la hã tum ɖekae, be miazu nɔƒe si Mawu ato gbɔgbɔ dzi anɔ.

Etenuŋɔŋlɔ