Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Efesotɔwo 1:1-23

1  Paulo, Kristo Yesu ƒe apostolo to Mawu ƒe lɔlɔ̃nu me, le esia ŋlɔm na ame kɔkɔe siwo le Efeso, kple nuteƒewɔla siwo le ƒomedodo me kple Kristo Yesu:  Amenuveve kple ŋutifafa, si tso Mawu mía Fofo kple Aƒetɔ Yesu Kristo gbɔ la, woana mi.  Woayra mía Aƒetɔ Yesu Kristo ƒe Mawu si nye Fofoa, elabena etsɔ gbɔgbɔmeyayra ɖe sia ɖe si le dziƒonutowo me yra mí, be míanɔ ƒomedodo me kple Kristo,  abe ale si wòtia mí do ŋgɔ na xexea ƒe gɔmeɖoanyiɣi, be míanɔ ƒomedodo me kplii ene, bene míanɔ kɔkɔe, eye ɖiƒoƒo aɖeke naganɔ mía ŋu o le eŋkume le lɔlɔ̃ me.  Elabena eɖoe ɖi do ŋgɔ be yeaxɔ mí abe ye ŋutɔ ye viwo ene to Yesu Kristo dzi, le ye ŋutɔ ƒe didi kple lɔlɔ̃nu nu,  bene woakafu eƒe ŋutikɔkɔe ƒe amenuveve, si wòna mí dɔmenyotɔe to eƒe lɔlɔ̃vi la dzi.  To eyama dzi wotsɔ tafea ɖe mí to eƒe ʋu la dzi, ɛ̃, míaƒe vodadawo ƒe tsɔtsɔke, le eƒe amenuveve ƒe agbɔsɔsɔ geɖe la nu.  Ena esia sɔ gbɔ na mí le nunya kple susuŋudɔwɔwɔ nyui me,  esi wòna míenya eƒe lɔlɔ̃nu ƒe nya ɣaɣla kɔkɔe la. Nya ɣaɣla kɔkɔe sia wɔ ɖeka kple didi si ƒe tame wòɖo ɖi le eɖokui me, 10  hena nuwo gbɔ kpɔkpɔ le ɣeyiɣi ɖoɖiawo ƒe dede keŋkeŋ me, si nye be wòagaƒo nuwo katã nu ƒu ɖekae ake ɖe Kristo la me, nu siwo le dziƒowo kple nu siwo le anyigba dzi. Ɛ̃, ɖe eyama me, 11  eye wotia mí be míanye domenyilawo kplii, esi woɖo mía tiatia la ɖi do ŋgɔ, le ame si wɔa nuwo katã le eƒe lɔlɔ̃nu ƒe aɖaŋuɖoɖo nu la, ƒe tameɖoɖo la nu, 12  bene míasubɔ hena eƒe ŋutikɔkɔe ƒe kafukafu, mí ame siwo si mɔkpɔkpɔ nɔ le Kristo la me gbã la. 13  Gake esime miese nyateƒenya, si nye mia xɔxɔ ŋuti nya nyui la vɔ megbe la, mɔkpɔkpɔ nɔ miawo hã mia si le eyama me. Ame sia dzi kee woto tsɔ gbɔgbɔ kɔkɔe si ŋugbe wodo la tre mia nu esime miexɔe se vɔ megbe, 14  gbɔgbɔ kɔkɔe si nye míaƒe domenyinu la ƒe kpeɖodzi sue aɖe si do ŋgɔ, hena Mawu ŋutɔ tɔwo ɖeɖe to tafe aɖe dzi, hena eƒe ŋutikɔkɔe ƒe kafukafu. 15  Esia tae nye hã, tso esime mese xɔse si le mia si ɖe Aƒetɔ Yesu ŋu, kple ale si mieɖe esia fiae ɖe ame kɔkɔeawo katã ŋuti, ŋu nya la, 16  nyemedzudzɔ akpedada ɖe mia ta o. Mele mia ŋkɔ yɔyɔ dzi le nye gbedodoɖawo me, 17  bene mía Aƒetɔ Yesu Kristo ƒe Mawu, si nye ŋutikɔkɔe Fofo la, nana nunya kple nyaɖeɖefia ƒe gbɔgbɔ mi le eŋuti sidzedze vavãtɔ me; 18  eye esi miaƒe dzi me ŋkuwo dzi kɔ la, bene mianya mɔkpɔkpɔ si gbɔ wòyɔ mi vae, nu si ŋutikɔkɔe ƒe kesinɔnu siwo wòdzra ɖo ɖi abe domenyinu ene na ame kɔkɔewo la nye, 19  kple nu si eƒe ŋusẽ ƒe gãnyenye, si ƒo nu sia nu ta la, nye na mí xɔsetɔwo. Gãnyenye sia dze le eƒe ŋutete ƒe ŋusẽ gã la me, 20  esi wòzã le Kristo la gome esime wòfɔe ɖe tsitre tso ame kukuwo dome, eye wòna wòbɔbɔ nɔ eƒe ɖusi me le dziƒonutowo me, 21  wòƒo dziɖuɖu ɖe sia ɖe kple amegãnyenye kple ŋusẽ kple aƒetɔnyenye kpakple ŋkɔ sia ŋkɔ si woyɔna la ta sãsãsã, menye le nuɖoanyi sia ɖeɖe ko me o, ke le esi ava va hã me. 22  Etsɔ nuwo katã de eƒe afɔ te hã, eye wòtsɔe ɖo ta na nuwo katã hena hame la, 23  si nye eƒe ŋutilã, si nye eyama ƒe blibonyenye, si yɔa nuwo katã fũu le ye katã me.

Etenuŋɔŋlɔ