Dzo kpo yi emenuwo dzi

Dzo kpo yi emenuawo dzi

Dɔwɔwɔwo 9:1-43

9  Gake Saul, si galé ŋɔdzidodo kple amewuwu ƒe gbɔgbɔtsixe ɖe ƒo kokoko ɖe Aƒetɔ la ƒe nusrɔ̃lawo ŋu la, yi nunɔlagã gbɔ,  eye wòbia agbalẽwoe hena ƒuƒoƒe siwo le Damasko, bene yeabla ame sia ame si yeakpɔ, si nɔ Mɔ La dzi la, ava Yerusalem, ŋutsuwo kple nyɔnuwo siaa.  Ke esi wònɔ mɔa dzi la, eva gogo Damasko, esime kekeli aɖe tso dziƒo klẽ ƒo xlãe enumake,  eye wòdze anyi, eye wòse gbe aɖe gblɔ nɛ be: “Saul, Saul, nu ka ŋuti nèle yonyeme tim?”  Egblɔ be: “Wò ame kae, Aƒetɔ?” Egblɔ be: “Nyee nye Yesu, ame si yome tim nèle la.  Ke hã, tso nàge ɖe dua me, eye woagblɔ nu si wòle be nàwɔ la na wò.”  Ke ame siwo nɔ mɔa zɔm kplii la tsi tsitre ɖi numaƒomaƒoe, ɛ̃, wonɔ gbe aɖe sem ya, gake womenɔ ame aɖeke kpɔm o.  Gake Saul fɔ le anyigba, eye togbɔ be eƒe ŋkuwo nɔ ʋuʋu hã la, menɔ naneke kpɔm o. Eya ta wolé eƒe alɔnu, eye wokplɔe yi Damasko.  Eye ŋkeke etɔ̃ sɔŋ mekpɔ nu o, meɖu naneke o, eye meno naneke hã o. 10  Nusrɔ̃la aɖe nɔ Damasko, si ŋkɔe nye Anania, eye Aƒetɔ la gblɔ nɛ le ŋutega aɖe me be: “Anania!” Egblɔ be: “Nyee nye esi, Aƒetɔ.” 11  Aƒetɔ la gblɔ nɛ be: “Tso, yi mɔ si woyɔna be Dzɔdzɔe la dzi, eye le Yuda ƒe aƒe me la, di ŋutsu aɖe si ŋkɔe nye Saul, tso Tarso. Elabena kpɔ ɖa! Ele gbe dom ɖa, 12  eye wòkpɔ ŋutsu aɖe si ŋkɔe nye Anania le ŋutega me wòva heda eƒe asiwo ɖe eyama dzi, be wòagakpɔ nu.” 13  Gake Anania ɖo eŋu be: “Aƒetɔ, mese nya tso ame geɖewo nu le ame sia ŋuti, ale si wòwɔ vɔ̃ geɖe ɖe wò ame kɔkɔewo ŋu le Yerusalem. 14  Eye le afi sia la, exɔ ŋusẽ tso nunɔlawo ƒe tatɔwo gbɔ, be wòabla ame siwo katã yɔa wò ŋkɔ la.” 15  Gake Aƒetɔ la gblɔ nɛ be: “Heyi, elabena ŋutsu sia nye dɔwɔnu tiatia aɖe nam, be wòatsɔ nye ŋkɔ la ayi na dukɔwo kple fiawo kpakple Israel viwo. 16  Elabena mafia nu siwo gbegbe ƒe fu wòle be wòakpe le nye ŋkɔ ta lae eme nakɔ nɛ.” 17  Ale Anania dze mɔ yi, eye wòge ɖe aƒea me, eye wòda eƒe asiwo ɖe eyama dzi gblɔ be: “Saul, nɔvi, Aƒetɔ la, Yesu si ɖe eɖokui fia wò le mɔ si nèto gbɔna la dzi, ye dɔm ɖa, bene nàgakpɔ nu, eye gbɔgbɔ kɔkɔe nayɔ wò fũu.” 18  Eye enumake nanewo ge tso eƒe ŋkuwo dzi abe tsrowo ene, eye wògakpɔ nu; eye wòtso, eye wonyrɔe, 19  eye wòɖu nu hekpɔ ŋusẽ. Enɔ nusrɔ̃lawo gbɔ le Damasko ŋkeke aɖewo, 20  eye enumake wòte gbeƒãɖeɖe Yesu le ƒuƒoƒewo, be Ame siae nye Mawu ƒe Vi la. 21  Ke ame siwo katã nɔ eƒe nyawo sem la ƒe mo wɔ yaa, eye wonɔ gbɔgblɔm be: “Alo menye ame siae ti ame siwo yɔa ŋkɔ sia le Yerusalem la yome kutɔkutɔe, eye wòva afi sia hã le susu ma ke ta, be yeabla wo akplɔ ayi na nunɔlawo ƒe tatɔwo oa?” 22  Gake Saul nɔ ŋu sẽm ɖe edzi wu tsã, eye ale si wòna kpeɖodzi siwo me susu le be ame siae nye Kristo la me kɔ ale gbegbe be, Yudatɔ siwo nɔ Damasko la ƒe nu koe ku. 23  Ke esi ŋkeke geɖe va yi la, Yudatɔwo de adaŋu, be yewoawui. 24  Ke hã, nugbe si woɖo ɖe Saul ŋu la va nɔ nyanya nɛ. Gake wonɔ agboawo hã nu dzɔm nyuie zã kple keli, bene woawui. 25  Eya ta eƒe nusrɔ̃lawo kɔe de kusi me le zã me heɖiɖii to do aɖe si le gli me la nu ɖe anyigba. 26  Esi wòva ɖo Yerusalem la, edze agbagba be yeawɔ ɖeka kple nusrɔ̃laawo; gake wo katã wonɔ vɔvɔ̃m nɛ, elabena womexɔe se be nusrɔ̃lae wònye o. 27  Eya ta Barnaba kpe ɖe eŋu, eye wòkplɔe yi apostoloawo gbɔ, eye wògblɔ ale si wòkpɔ Aƒetɔ la le mɔa dzi, eye be eƒo nu nɛ, kpakple ale si wòƒo nu dzinɔameƒotɔe le Yesu ƒe ŋkɔ me le Damasko, la na wo tsitotsito. 28  Eye wònɔ wo gbɔ, yina gbɔna le Yerusalem, eye wònɔ nu ƒom dzinɔameƒotɔe le Aƒetɔ la ƒe ŋkɔ me; 29  eye wònɔa nu ƒom na Yudatɔ siwo doa Helagbe henɔa nya me dzrom kpli wo. Gake woawo ya wonɔ didim be yewoawui. 30  Esi nɔviawo kpɔ esia dze sii la, wokplɔe yi Kaisarea, eye woɖoe ɖe Tarso. 31  Azɔ hame si le Yudea blibo la kple Galilea kpakple Samaria la ɖo ŋutifafa ƒe ɣeyiɣi aɖe me henɔ tutuɖo kpɔm; eye esi wònɔ zɔzɔm le Yehowa vɔvɔ̃ kple gbɔgbɔ kɔkɔe la ƒe akɔfafa me ta la, eyi edzi nɔ dzidzim ɖe edzi. 32  Ke esi Petro nɔ tsatsam le nutoa katã me la, eɖi va ame kɔkɔe siwo le Lida la hã gbɔ. 33  Ekpɔ ŋutsu aɖe le afi ma, si ŋkɔe nye Ainea, ame si tsi aba dzi ƒe enyie nye ema, elabena lãmetututɔe wònye. 34  Eye Petro gblɔ nɛ be: “Ainea, Yesu Kristo da gbe le ŋuwò. Tso nàɖo wò aba.” Eye wòtso enumake. 35  Eye ame siwo katã nɔ Lida kple Saron tagba la kpɔe, eye wotrɔ ɖe Aƒetɔ la ŋu. 36  Ke le Yopa la, nusrɔ̃la aɖe nɔ anyi, si ŋkɔe nye Tabita, si gɔmee nye Dorkas.* Dɔ nyui siwo wòwɔna kple eƒe nunana ame dahewo sɔ gbɔ. 37  Gake le ŋkeke mawo me la, edze dɔ, eye wòku. Eya ta wole tsi nɛ, eye wotsɔe mlɔ xɔ me le dziƒoxɔ aɖe dzi. 38  Ke esi Lida te ɖe Yopa ŋu ta la, esi nusrɔ̃lawo se be Petro nɔ du sia me la, wodɔ ame eve ɖo ɖe egbɔ, be woaɖe kuku nɛ vevie be: “Míeɖe kuku, mègahe ɖe megbe le mía gbɔ vava ŋu o.” 39  Ale Petro tso heyi kpli wo. Eye esi wòɖo la, wokplɔe yi xɔa me le dziƒoxɔa dzi; eye ahosiawo katã va egbɔ nɔ avi fam hetsɔ awutewui kple awudziwui geɖe siwo Dorkas wɔ esime wònɔ wo gbɔ la nɔ fiafiam. 40  Gake Petro na ame sia ame do go, eye esi wòdze klo la, edo gbe ɖa, eye esi wòtrɔ ɖe ame kukua ŋu la, egblɔ be: “Tabita, tsi tsitre!” Eʋu eƒe ŋkuwo, eye esi eƒe ŋku kli Petro la, efɔ bɔbɔ nɔ anyi. 41  Eye wòlé eƒe alɔnu wòtsi tsitre, eye wòyɔ ame kɔkɔeawo kple ahosiawo vae, eye wòtsɔe ɖo wo ŋkume agbagbee. 42  Nu sia kaka ɖe Yopa blibo la katã, eye ame geɖewo va xɔ Aƒetɔ la dzi se. 43  Enɔ Yopa ŋkeke ʋɛ aɖewo le Simon aɖe, si nye lãgbalẽwɔla gbɔ.

Etenuŋɔŋlɔ

Alo “zi.”