Dɔwɔwɔwo 8:1-40

8  Le Saul gome la, enɔ asi dam ɖe eƒe wuwu la dzi. Le ŋkeke ma dzi la, yometiti gã aɖe fɔ ɖe te ɖe hame si nɔ Yerusalem la ŋu; wo katã woka hlẽ ɖe Yudea kple Samaria nutowo me, negbe apostoloawo ko.  Gake ŋutsu mawuvɔ̃la aɖewo kɔ Stefano yi ɖaɖi, eye wofae vevie.  Gake Saul ya te ŋkutɔtɔ hame la vevie. Egena ɖe aƒewo me ɖekaɖeka, eye wòhea ŋutsuwo kple nyɔnuwo siaa doa goe, eye wòdea wo gaxɔ me.  Ke hã, ame siwo woka hlẽ la nɔ tsatsam le anyigba la dzi, eye wonɔ nya la ŋuti nya nyui la gblɔm.  Filipo ya yi Samaria du la me, eye wòte gbeƒãɖeɖe Kristo la na wo.  Amehaawo tsɔ tame ɖeka nɔ to lém ɖe nya siwo gblɔm Filipo nɔ la ŋu, esime wonɔ to ɖom henɔ dzesi siwo wɔm wònɔ la kpɔm.  Elabena gbɔgbɔ makɔmakɔwo nɔ ame geɖewo me, eye gbɔgbɔawo doa ɣli sesĩe hedoa go. Gawu la, eda gbe le ame geɖe siwo nye lãmetututɔwo kple nuwɔametɔwo ŋu.  Ale dzidzɔ gã aɖe xɔ aƒe ɖe du ma me.  Ke ŋutsu aɖe nɔ dua me, si ŋkɔe nye Simon, eye do ŋgɔ na esia la, enɔ akunya wɔm wòwɔa nuku na Samaria dukɔa, eye wògblɔna be ŋusẽtɔ gã aɖee yenye. 10  Eye wo katã, tso ame tsɛwo dzi va ɖo ame ŋkutawo dzi, léa to ɖe eŋu hegblɔna be: “Ame siae nye Mawu Ƒe Ŋusẽ la, si woate ŋu ayɔ be Ŋusẽ Triakɔ.” 11  Ale woléa to ɖe eŋu, elabena tso ɣeaɖeɣi ke la, etoa eƒe akunyawɔwɔ dzi nana woƒe nu kuna. 12  Gake esi woxɔ Filipo, ame si nɔ Mawu fiaɖuƒe la kple Yesu Kristo ƒe ŋkɔ ŋuti nya nyuia gblɔm, la dzi se la, wona wonyrɔ wo, ŋutsuwo kple nyɔnuwo siaa. 13  Simon ŋutɔ hã va zu xɔsetɔ, eye esi wona nyɔnyrɔe vɔ megbe la, enɔ Filipo ŋu kplikplikpli; eye dzesiwo kple ŋusẽdɔ gã siwo nɔ eme vam wòkpɔ la wɔ nuku nɛ ŋutɔ. 14  Esi apostoloawo, siwo nɔ Yerusalem, se be Samaria xɔ Mawu ƒe nyaa la, wodɔ Petro kple Yohanes ɖe wo gbɔ; 15  eye ame siawo yi hedo gbe ɖa na wo, bene woaxɔ gbɔgbɔ kɔkɔe. 16  Elabena meva wo dometɔ aɖeke dzi haɖe o, gake Aƒetɔ Yesu ƒe ŋkɔ la me koe wonyrɔ wo le. 17  Eye woyi ɖada woƒe asiwo ɖe wo dzi, eye wote gbɔgbɔ kɔkɔe xɔxɔ. 18  Ke esi Simon kpɔ be, to apostoloawo ƒe asidada ɖe amewo dzi me la, wonɔ gbɔgbɔ la nam la, etsɔ ga vae na wo, 19  gblɔ be: “Mina ŋusẽ sia nye hã, bene ame sia ame si dzi mada nye asiwo ɖo la naxɔ gbɔgbɔ kɔkɔe.” 20  Gake Petro gblɔ nɛ be: “Wò klosalo la natsrɔ̃ kpli wò, elabena èbu xaa be to ga dzi Mawu ƒe nunana faa la asu ye si. 21  Gome alo domenyinyi aɖeke meli na wò le nya sia me o, elabena wò dzi medzɔ le Mawu ŋkume o. 22  Eya ta trɔ dzi me tso wò vɔ̃ɖinyenye sia me, eye ƒo koko na Yehowa, be ne anya wɔ la, woatsɔ tame vɔ̃ si nèɖo le dzi me la ake wò; 23  elabena mekpɔe be aɖi veve kple madzɔmadzɔnyenye ƒe babla nènye.” 24  Simon ɖo eŋu gblɔ be: “Mia ŋutɔwo miƒo koko na Yehowa ɖe tanye, bene nu siwo miegblɔ la ƒe ɖeke nagadzɔ ɖe dzinye o.” 25  Eya ta esi woɖi ɖase tsitotsito hegblɔ Yehowa ƒe nya la vɔ la, wotrɔ yi Yerusalem, eye le mɔa dzi la, wonɔ nya nyui la gblɔm na Samaria ƒe kɔƒe geɖewo me tɔwo. 26  Ke hã, Yehowa ƒe dɔla ƒo nu na Filipo gblɔ be: “Tso, eye nàyi anyiehe gome le mɔ, si tso Yerusalem yi Gaza, la dzi.” (Mɔ sia to gbedadaƒo.) 27  Ale wòtso heyi, eye kpɔ ɖa! Etiopiatɔwo ƒe amegã aɖe, si nye ŋutsu aɖe le Etiopia fianyɔnu Kandake ƒe ŋusẽ te, eye wònye eƒe nu xɔasiwo katã dzi kpɔla, lae nye si. Eyi Yerusalem va de ta agu, 28  ke etrɔ gbɔna, eye wòbɔbɔ nɔ eƒe tasiaɖam me henɔ nyagblɔɖila Yesaya xlẽm wònɔ ɖiɖim. 29  Eya ta gbɔgbɔ la gblɔ na Filipo be: “Te ɖe tasiaɖam sia ŋu, eye nànɔ eŋu.” 30  Filipo ƒu du yi egbɔ, eye wòsee ŋutsua nɔ Yesaya nyagblɔɖila la xlẽm wònɔ ɖiɖim, eye wòbiae be: “Èle nu si xlẽm nèle la gɔme sem ŋutɔŋutɔa?” 31  Egblɔ be: “Aleke mawɔ ase egɔme, ne ame aɖeke mefiam o?” Eye wòɖe kuku na Filipo vevie be wòaɖo tasiaɖam la anɔ anyi ɖe ye gbɔ. 32  Ke Ŋɔŋlɔa ƒe akpa si xlẽm wònɔ wònɔ ɖiɖim lae nye esi: “Wokplɔe abe alẽ ene yina lãwuƒe, eye abe alẽvi, si zia kpi le ame si le fu kom nɛ la ŋkume ene la, meke nu o. 33  Esime wobɔbɔe ɖe anyi la, womedrɔ̃ ʋɔnu dzɔdzɔe nɛ o. Ame kae agblɔ eƒe dzidzime ŋu nya afia tsitotsito? Elabena woɖe eƒe agbe ɖa le anyigba dzi.” 34  Amegã la bia Filipo be: “Meɖe kuku na wò: Ame ka ŋu nya gblɔmee nyagblɔɖila la le? Ye ŋutɔ ɖokuie loo alo ame bubu aɖea?” 35  Filipo ke nu, eye wòdze egɔme tso Ŋɔŋlɔ sia dzi gblɔ Yesu ŋu nya nyui la nɛ. 36  Ke esi wonɔ mɔa dzi yina la, wova ɖo tsi aɖe gbɔ, eye amegã la gblɔ be: “Kpɔ ɖa! Tsie nye si; nu kae xe mɔ na nye nyɔnyrɔxɔxɔ?” 37  * —— 38  Ale wòna wotɔ tasiaɖam la, eye woa kple evea woɖi yi tsi la me, Filipo kple amegã la siaa; eye wònyrɔe. 39  Esi wofɔ tso tsia te vɔ la, Yehowa ƒe gbɔgbɔ kplɔ Filipo dzoe enumake, eye amegã la megakpɔe o, elabena eyi eƒe mɔ la zɔzɔ dzi kple dzidzɔ. 40  Gake wokpɔ Filipo le Asdod, eye wònɔ tsatsam le nutoa me godoo nɔ nya nyui la gblɔm na duawo katã va se ɖe esime wòɖo Kaisarea.

Etenuŋɔŋlɔ