Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Dɔwɔwɔwo 6:1-15

6  Ke le ŋkeke siawo me, esi nusrɔ̃lawo nɔ agbɔ sɔm ɖe edzi la, liʋiliʋilili ɖo Yudatɔ siwo doa Helagbe la dome ɖe Yudatɔ siwo doa Hebrigbe la ŋu, elabena wonɔ woƒe ahosiwo gblẽm ɖi le gbe sia gbe nuɖuɖu la mama me.  Eya ta ame wuieveawo yɔ nusrɔ̃lawo ƒe ha la vae hegblɔ be: “Mele dzi dzɔm na mí be, míagblẽ Mawu ƒe nya la ɖi anɔ nuɖuɖu mam le kplɔ̃ ŋu o.  Eya ta nɔviwo, mia ŋutɔwo midi ŋutsu adre siwo dzi mieka ɖo la tso mia dome, ame siwo gbɔgbɔ kple nunya yɔ fũu, ne míaɖo wo dɔ vevi sia nu;  ke mía ŋutɔwo míalé fɔ ɖe gbedodoɖa kple nya la ƒe subɔsubɔdɔ la ŋu.”  Eye nya si wogblɔ la dze ameha blibo la katã ŋu, eye wotia Stefano, ame si xɔse kple gbɔgbɔ kɔkɔe yɔ fũu, kple Filipo, Prokoro kple Nikanora kple Timona kple Parmena kple Nikolao, si tso Antioxia, eye wòtrɔ dzi me zu Yudatɔ;  eye wotsɔ wo ɖo apostoloawo ŋkume, eye esi wodo gbe ɖa vɔ la, woda woƒe asiwo ɖe wo dzi.  Ale Mawu ƒe nya la yi edzi nɔ ta kekem, eye nusrɔ̃lawo ƒe xexlẽme yi edzi nɔ dzidzim ɖe edzi ŋutɔ le Yerusalem; eye nunɔlawo ƒe ha gã aɖe hã va te toɖoɖo xɔse la.  Ke Stefano, ame si dɔmekɔkɔ kple ŋusẽ yɔ fũu la, nɔ nukunu kple dzesi gãwo wɔm le ameawo dome.  Gake ŋutsu aɖewo tsi tsitre le ƒuƒoƒe si woyɔna be Ablɔɖexɔlawo Ƒe Ƒuƒoƒe la me tɔwo, Kirenetɔwo, Aleksandriatɔwo, kple ame siwo tso Kilikia kple Asia, la dome, be yewoahe nya kple Stefano; 10  ke hã, womete ŋu nɔ te ɖe nunya kple gbɔgbɔ si wòtsɔ nɔ nu ƒom la nu o. 11  Eya ta wode nya ŋutsu aɖewo nu le adza me be woagblɔ be: “Míesee wònɔ busunyawo gblɔm ɖe Mose kple Mawu ŋu.” 12  Eye wode zi ameha la kple amegãwo kpakple agbalẽfialawo me, eye esi wova do ɖe edzi le vo me la, wolée sesẽe hekplɔe yi Sanhedrin la. 13  Eye wokplɔ aʋatsoɖasefowo vae, ame siwo gblɔ be: “Ame sia medzudzɔ nuƒoƒo ɖe teƒe kɔkɔe sia kple Se la ŋu o. 14  Le kpɔɖeŋu me, míesee wògblɔ be, Yesu Nazaretetɔ sia agbã teƒe sia, eye wòatrɔ kɔnu siwo Mose tsɔ de asi na mí la.” 15  Eye esi ame siwo katã bɔbɔ nɔ anyi ɖe Sanhedrin la me fɔ ŋku ɖe edzi gãa la, wokpɔe be eƒe mo nɔ abe mawudɔla ƒe mo ene.

Etenuŋɔŋlɔ