Dɔwɔwɔwo 5:1-42

5  Ke hã, ŋutsu aɖe, si ŋkɔe nye Anania, tsɔ nunɔamesi aɖe dzra, woa kple Safira, si nye srɔ̃a,  eye wòtsɔ ga la ƒe ɖe ɣla, srɔ̃a hã nya nu tso eŋu, eye wòtsɔ eƒe ɖe ko va da ɖe apostoloawo ƒe afɔ nu.  Gake Petro gblɔ be: “Anania, nu ka tae Satana na nèdo dzi da alakpa na gbɔgbɔ kɔkɔe la, eye nètsɔ anyigbaa ƒe ga la ƒe ɖe ɣla?  Zi ale si wòkpɔtɔ nɔ asiwò la, menye tɔwò ko wònye oa, eye esi nèdzrae vɔ la, ɖe mèkpɔ mɔ azã ga la ale si nèdi oa? Nu ka tae nèɖo nuwɔna sia ƒe tame le wò dzi me? Menye amewoe nèda alakpa na o, ke boŋ Mawue.”  Esi Anania se nya siawo la, emu dze anyi, eye eƒe agbe nu tso. Eye vɔvɔ̃ gã aɖe ɖo ame siwo katã see la.  Ke ɖekakpuiawo tsi tsitre, eye woblae ɖe avɔwo me, eye wokɔe do goe yi ɖaɖi.  Ke anɔ abe gaƒoƒo etɔ̃ ene megbe la, srɔ̃a ge ɖe eme, gake menya nu si dzɔ o.  Petro gblɔ nɛ be: “Gblɔe nam, ga home siae mi ame evea miedzra anyigba laa?” Egblɔ be: “Ɛ̃, home siae.”  Eya ta Petro gblɔ nɛ be: “Nu ka tae mi ame evea miewɔ ɖeka be miado Yehowa ƒe gbɔgbɔ la kpɔ? Kpɔ ɖa! Ame siwo ɖi srɔ̃wò la ƒe afɔwo le ʋɔtrua nu, eye woakɔ wò hã ado goe.” 10  Enumake emu dze anyi ɖe eƒe afɔ nu, eye eƒe agbe nu tso. Esi ɖekakpuiawo ge ɖe eme la, wokpɔe be eku, eye wokɔe do go yi ɖaɖi ɖe srɔ̃a xa. 11  Ale vɔvɔ̃ gã aɖe va dze hame blibo la katã kple ame siwo katã se nya siawo la dzi. 12  Gawu la, dzesi kple nukunu geɖewo nɔ eme vam le dukɔ la dome to apostoloawo ƒe asi dzi; eye wotsɔ tame ɖeka nɔ Salomo ƒe akpata la me. 13  Nyateƒee, dzi menɔ ame susɔeawo dometɔ ɖeka pɛ hã ƒo be wòawɔ ɖeka kpli wo o; ke hã, ameawo nɔ wo kafum. 14  Gawu la, wotsɔ ame siwo xɔ Aƒetɔ la dzi se la nɔ wo kpem, ŋutsu kple nyɔnu gbogbo aɖewo; 15  ale be wokɔa dɔnɔwo va dana ɖe ablɔwo kura gɔ̃ hã me, eye wotsɔa wo mlɔa abati suewo kple abawo dzi le afi ma, be ne Petro va yina la, eƒe vɔvɔli ya teti nadze wo dometɔ aɖe dzi. 16  Eye ame gbogbo aɖewo, siwo tso du siwo ƒo xlã Yerusalem me la, nɔa vavam, eye wokɔa dɔnɔwo kple ame siwo gbɔgbɔ makɔmakɔwo nɔ fu ɖem na la vanɛ, eye wodaa gbe le wo katã ŋu. 17  Gake nunɔlagã la kple ame siwo katã nɔ eŋu, siwo nye Zadukitɔwo ƒe kɔmama si nɔ anyi ɣemaɣi, la tso, eye woyɔ fũu kple ŋuʋaʋã, 18  eye woɖo asi apostoloawo dzi hede wo dua ƒe gaxɔ me. 19  Gake le zã me la, Yehowa ƒe dɔla ʋu gaxɔ la ƒe ʋɔtruwo, kplɔ wo do goe hegblɔ be: 20  “Miheyi, eye ne mietsi tsitre ɖe gbedoxɔa me la, miyi edzi mianɔ agbe sia ŋu nyawo katã gblɔm na ameawo.” 21  Esi wose esia la, woge ɖe gbedoxɔa me esime ŋu te keke, eye wode asi nufiafia me. Ke esi nunɔlagã la kple ame siwo nɔ eŋu la va ɖo la, woyɔ Sanhedrin blibo la kple Israel viwo ƒe amegãwo ƒe ha blibo la katã ƒo ƒu, eye wodɔ amewo ɖe gaxɔa me be woakplɔ wo avae. 22  Gake esi atikplɔtɔawo ɖo afi ma la, womekpɔ wo le gaxɔa me o. Eya ta wotrɔ gbɔ va ka nya la ta, 23  gblɔ be: “Míekpɔ gaxɔ la wònɔ tutu nyuie, eye dzɔlawo hã nɔ tsitre ɖe ʋɔtruawo nu, gake esi míeʋui la, míekpɔ ame aɖeke le eme o.” 24  Ke esi gbedoxɔa dzi kpɔlawo ƒe amegã kple nunɔlawo ƒe tatɔwo se nya siawo la, wotɔtɔ le nya siawo ŋu le nu si ava do tso eme la ŋu. 25  Gake ame aɖe va ka eta na wo be: “Mise ɖa! Ŋutsu siwo miede gaxɔ me la le gbedoxɔa me, eye wole tsitre le nu fiam ameawo.” 26  Ale dzikpɔlawo ƒe amegã la zɔ kple eƒe atikplɔtɔawo yi wo kplɔ ge avae, gake menye kple sesẽ o, elabena wonɔ vɔvɔ̃m be ameawo ava ƒu kpe yewo. 27  Eye wokplɔ wo va tsi tsitre ɖe Sanhedrin kpata la me. Eye nunɔlagã la bia gbe wo 28  hegblɔ be: “Míede se na mi eme kɔ nyuie be miagayi edzi anɔ nu fiam le ŋkɔ sia me o, gake kpɔ ɖa! Mietsɔ miaƒe nufiafia yɔ Yerusalem, eye mieɖoe kplikpaa be yewoahe ŋutsu sia ƒe ʋu ava mía dzi.” 29  Petro kple apostolo bubuawo ɖo eŋu gblɔ be: “Ele be míaɖo to Mawu abe dziɖula ene wu amewo. 30  Mía tɔgbuiwo ƒe Mawu la fɔ Yesu, ame si miawo miewu ŋutasesẽtɔe esi miehee ɖe ati ŋu la, ɖe tsitre. 31  Mawu do ame sia ɖe dzi le eƒe ɖusi me wònye Kplɔla Vevitɔ kple Xɔla, be wòana dzimetɔtrɔ Israel kple nu vɔ̃wo ƒe tsɔtsɔke. 32  Eye míawoe nye nya siawo ŋuti ɖasefowo, eye nenema kee nye gbɔgbɔ kɔkɔe, si Mawu na ame siwo ɖoa toe abe dziɖula ene, la hã.” 33  Esi wose esia la, dzi ku wo vevie, eye wonɔ didim be yewoawu wo. 34  Ke ŋutsu aɖe tsi tsitre le Sanhedrin la me, si nye Farisitɔ aɖe si ŋkɔe nye Gamaliel, eye wònye sefiala si ŋu ameawo katã dea bubui, eye wòde se be woakplɔ ŋutsuawo ado goe vie. 35  Eye wògblɔ na wo be: “Israel ŋutsuwo, mikpɔ mia ɖokui dzi nyuie le nu si mieɖo ɖe tame be yewoawɔ ame siawo la ŋu. 36  Le kpɔɖeŋu me, hafi ŋkeke siawo naɖo la, Teuda tsi tsitre nɔ gbɔgblɔm be yenye ame aɖe, eye ame aɖewo, abe alafa ene ene, wɔ ɖeka kple eƒe ha la. Gake wowui, eye woka ame siwo katã nɔ to ɖomee la hlẽ, eye wo nu va yi. 37  Le eya megbe la, Yuda, Galileatɔ la, tsi tsitre le ŋkɔŋɔŋlɔ ƒe ŋkekeawo me, eye wòhe amewo ɖe eɖokui ŋu. Ke hã, ŋutsu ma ku, eye woka ame siwo katã nɔ to ɖomee la hlẽ. 38  Eya ta le ale si nɔnɔmeawo le fifia nu la, mele egblɔm na mi be: Migade nu ame siawo ƒe nya me o, ke boŋ miɖe asi le wo ŋu; (elabena ne amewo gbɔe ɖoɖo sia alo dɔ sia tso la, ekema eme ava gblẽ; 39  gake ne Mawu gbɔe wòtso la, ekema miate ŋu agblẽ wo dome o;) ne menye nenema o la, ɖewohĩ woava kpɔ mi be miele avu wɔm kple Mawu ŋutɔ.” 40  Ale woɖo toe, eye woyɔ apostoloawo vae, ƒo wo, hede se na wo be woadzudzɔ nuƒoƒo le Yesu ƒe ŋkɔ me, eye wona wodzo. 41  Ke hã, ame siawo dzo le Sanhedrin la ŋkume, eye wonɔ dzidzɔ kpɔm, elabena wobui be yewodze be woado vlo yewo le eƒe ŋkɔ la ta. 42  Eye gbe sia gbe, le gbedoxɔa me kple aƒe me yi aƒe me la, woyi edzi nɔ nu fiam henɔ nya nyui la gblɔm le Kristo la, si nye Yesu, ŋu madzudzɔmadzudzɔe.

Etenuŋɔŋlɔ