Dzo kpo yi emenuwo dzi

Dzo kpo yi emenuawo dzi

Dɔwɔwɔwo 4:1-37

4  Ke esi ame eveawo nɔ nu ƒom na ameawo la, nunɔlawo ƒe tatɔwo kple gbedoxɔa dzi kpɔlawo ƒe amegã kpakple Zadukitɔwo va do ɖe wo dzi  kple dziku, elabena wonɔ nu fiam ameawo, eye wonɔ tsitretsitsi tso ame kukuwo dome gblɔm nɔ fiafiam gaglãa le Yesu ŋuti;  eye woɖo woƒe asiwo wo dzi, eye wode wo gaxɔ me va se ɖe esime ŋu ke, elabena fiẽsi ɖo xoxo.  Ke hã, ame siwo se nuƒoa la dometɔ geɖewo xɔe se, eye ŋutsuawo ƒe xexlẽme va nɔ abe akpe atɔ̃ ene.  Esi ŋu ke la, eva eme le Yerusalem be, woƒe dziɖulawo kple amegãwo kpakple agbalẽfialawo kpe ta,  (nunɔlawo ƒe tatɔ Ana kple Kayafa kple Yohanes kple Aleksandro kpakple ame siwo katã tso nunɔlawo ƒe tatɔ la ƒe ƒomea me hã)  eye wona wotsi tsitre ɖe wo dome, eye wote wo biabia be: “Ŋusẽ ka dzi alo ame ka ƒe ŋkɔ me ye miewɔ nu sia le?”  Tete Petro, ame si gbɔgbɔ kɔkɔe yɔ fũu la, gblɔ na wo be: “Mi dukɔ la ƒe dziɖulawo kple amegãwo,  ne wole nya biam mí egbea, le dɔ nyui si míewɔ na dɔnɔ aɖe ta, be ame ka dzie woto na ŋutsu sia haya hã la, 10  ekema nenɔ nyanya na mia kple Israel dukɔ blibo la katã be, Yesu Kristo, Nazaretetɔ la, ame si miawo miehe ɖe ati ŋu, ame si Mawu ya fɔ ɖe tsitre tso ame kukuwo dome la, ame sia ƒe ŋkɔ mee ŋutsu sia le tsitre le lãmesẽ me le mia ŋkume le. 11  Esiae nye ‘kpe si mi xɔtulawo miebu ɖe naneke me o la, si va zu dzogoedzikpe la.’ 12  Gawu la, xɔxɔ la mele ame bubu aɖeke me o, elabena ŋkɔ bubu aɖeke mele dziƒoa te, si wona ame aɖe le amegbetɔwo dome, si dzi wòle be míato akpɔ xɔxɔ o.” 13  Ke esi wokpɔ Petro kple Yohanes ƒe dzinɔameƒo, evɔ wonya be ame manyagbalẽwo kple ame tsɛwo ye wonye la, woƒe mo wɔ yaa. Eye ale wokpɔe dze sii le wo ŋu be wonɔ Yesu ŋu; 14  eye esi wonɔ ame si woda dɔ na la kpɔm wòle tsitre ɖe wo gbɔ ta la, nya aɖeke menɔ wo si woagblɔ atsɔ aɖo eŋu o. 15  Eya ta woɖe gbe na wo be woado le Sanhedrin kpata la me, eye wote nya la léle kpɔ le wo nɔewo dome, 16  gblɔ be: “Nu ka míawɔ ŋutsu siawo? Elabena vavãe, dzesi gã aɖee va eme to wo dzi, si Yerusalem nɔlawo katã kpɔ; eye míate ŋu asẽ nu le eŋu o. 17  Ke hã, be wòagakaka ɖe edzi geɖe wu le dukɔ la dome o la, mina míado ŋɔdzi na wo vevie be, woagaƒo nu le ŋkɔ sia dzi na ame aɖeke azɔ gbeɖe o.” 18  Ale woyɔ wo vae, eye wode se na wo be woagagblɔ nya aɖeke alo afia nu hã le Yesu ƒe ŋkɔ la dzi le afi aɖeke akpɔ gbeɖe o. 19  Gake Petro kple Yohanes ɖo eŋu na wo gblɔ be: “Ne edzɔ le Mawu ŋkume be, míaɖo to miawo wu Mawu la, mia ŋutɔwo mibu eŋu kpɔ. 20  Gake míawo ya la, míate ŋu adzudzɔ nuƒoƒo tso nu siwo míekpɔ hese la ŋu o.” 21  Eya ta esi wogado ŋɔdzi na wo ɖe edzi vɔ la, woɖe asi le wo ŋu, elabena womekpɔ naneke si dzi woanɔ te ɖo ahe to na wo o, kple ameha la hã ta, le esi wo katã wonɔ Mawu dom ɖe dzi le nu si dzɔ ta la ŋuti; 22  elabena ame si wowɔ dzesi sia tsɔ da dɔ na la xɔ wu ƒe blaene. 23  Esi woɖe asi le wo ŋu vɔ la, woyi wo tɔwo gbɔ, eye woka nya siwo nunɔlawo ƒe tatɔwo kple amegãwo gblɔ na wo la ta na wo. 24  Esi wose esia la, wo katã wokɔ gbe dzi na Mawu ɖekae gblɔ be: “Aƒetɔ Dziɖulagã, wòe nye Ame si wɔ dziƒo kple anyigba kple atsiaƒu kple nu siwo katã le wo me, 25  eye nèto gbɔgbɔ kɔkɔe la dzi gblɔ to mía tɔgbui David wò dɔla ƒe nu me be: ‘Nu ka tae dukɔwo dze agbo, eye amewo le ŋugble dem le nu dzodzrowo ŋu? 26  Anyigba dzi fiawo tso, eye dziɖulawo ƒo ƒu ɖekae ɖe Yehowa kple eƒe amesiamina la ŋu.’ 27  Le nyateƒe me la, Herodes kple Pontio Pilato kpakple dukɔwo me tɔwo kple Israel dukɔwo ƒo ƒu ɖekae ŋutɔŋutɔ le du sia me ɖe wò dɔla kɔkɔe Yesu, si nèsi ami na la ŋu, 28  bene woawɔ nu si wò asi kple lɔlɔ̃nu ɖo ɖi do ŋgɔ be wòadzɔ la. 29  Ke azɔ Yehowa, kpɔ woƒe ŋɔdzidodoawo ɖa, eye nàna wò kluviwo nayi edzi agblɔ wò nya la kple dzideƒo katã, 30  esime nèdo wò asi ɖa hena dɔdada, eye dzesiwo kple nukunuwo le dzɔdzɔm to wò dɔla kɔkɔe Yesu ƒe ŋkɔ me.” 31  Eye esi woƒo koko vevie vɔ la, teƒe si woƒo ƒu ɖo la ʋuʋu; eye gbɔgbɔ kɔkɔe la yɔ wo katã fũu, eye wonɔ Mawu ƒe nya la gblɔm kple dzideƒo. 32  Gawu la, ame gbogbo siwo xɔe se la ƒe dzi kple luʋɔ nɔ ɖeka, eye wo dometɔ ɖeka pɛ hã megblɔna be nu siwo le ye si la nye ye ŋutɔ tɔ o; ke boŋ wowɔa nuwo katã ɖe du. 33  Eye apostoloawo tsɔ ŋusẽ gã yi edzi nɔ ɖase ɖim tso Aƒetɔ Yesu ƒe tsitretsitsi la ŋu; eye amenuveve nɔ wo katã dzi geɖe. 34  Nyateƒee, naneke mehiã wo dometɔ aɖeke o; elabena ame siwo katã si anyigbawo alo aƒewo le la dzraa wo, eye wotsɔa nu siwo wodzra la ƒe home vanɛ, 35  eye wotsɔa wo va dana ɖe apostoloawo ƒe afɔ nu. Azɔ womanɛ na ame sia ame, le eƒe hiahiã nu. 36  Ale Yosef, si apostoloawo gayɔna be Barnaba, si gɔmee nye “Akɔfafavi,” eye wònye Lewitɔ, Kipro vidzidzi, 37  si si anyigba aɖe nɔ la, dzrae, eye wòtsɔ ga la va da ɖe apostoloawo ƒe afɔ nu.

Etenuŋɔŋlɔ