Dɔwɔwɔwo 28:1-31

28  Eye esi míedo le eme dedie vɔ la, míeva nya be Melite ye woyɔna na ƒukpo la.  Eye dutagbedola mawo wɔ dɔmenyo manyagblɔ aɖe na mí, elabena wodo dzo, eye woxɔ mí katã hekpe ɖe mía ŋu, le tsi si nɔ dzadzam kple vuvɔ si nɔ wɔwɔm la ta.  Gake esi Paulo fɔ nake wuwlui aɖewo tsɔ de dzoa me la, dzakpata aɖe do tso wo me le dzoxɔxɔ la ta, eye wòxatsa ɖe eƒe asi ŋu.  Esi dutagbedola mawo ƒe ŋku kli lã sia, si nu aɖi le la, wòlé ɖe eƒe asi ŋu la, wote gbɔgblɔ na wo nɔewo be: “Amewula kokokoe ame sia nye, eye togbɔ be edo le ƒua me dedie hã la, nu vɔ̃ ŋuti tohehe meɖe mɔ nɛ be, wòayi edzi anɔ agbe o.”  Ke hã, eʋuʋu lã sia, si nu aɖi le, la ɖe dzoa me, eye nuvevi aɖeke mewɔe o.  Gake wonɔ mɔ kpɔm be atè, alo adze anyi aku enumake. Esi wolala ɣeyiɣi didi aɖe, eye wokpɔ be nuvevi aɖeke mewɔe o la, wotrɔ susu hegblɔ be mawu aɖee.  Ke anyigbawo nɔ ƒukpoa ƒe amegã, si ŋkɔe nye Publio si, si te ɖe afi ma ŋu; eye wòxɔ mí nyuie, eye wòna míedze egbɔ ŋkeke etɔ̃ sɔŋ.  Gake eva eme be, Publio fofo nɔ anyimlɔƒe, elabena asrã lée wònɔ kpeta dem, eye Paulo yi egbɔ hedo gbe ɖa, da eƒe asiwo ɖe edzi, eye wòyɔ dɔe.  Esi nu sia dzɔ megbe la, ame susɔe siwo nɔ ƒukpoa dzi, siwo ŋu dɔlélewo le, la de asi egbɔ vava me, eye wòda dɔ na wo. 10  Wobu mí hã geɖe ŋutɔ hena nu mí, eye esi míeɖo tɔdziʋu nɔ dzodzom la, wotsɔ nu siwo míahiã la de agba me na mí. 11  Le ɣleti etɔ̃ megbe la, míeɖo Aleksandria ʋu aɖe, si nɔ ƒukpoa dzi le vuvɔŋɔlia, eye dzesi si nɔ ʋua ŋu lae nye “Zeus Viwo.” 12  Eye esi míeva dze ɖe Sirakusa la, míenɔ afi ma ŋkeke etɔ̃, 13  eye tso afi ma míeƒo xlã godoo va ɖo Regio. Eye le ŋkeke ɖeka megbe la, anyieheya aɖe ƒo, eye míeva ɖo Puteoli le ŋkeke eveagbe. 14  Míekpɔ nɔvi aɖewo le afi sia, eye woɖe kuku na mí vevie be míanɔ yewo gbɔ ŋkeke adre; eye ale míeɖo ta Roma. 15  Eye esi nɔviawo se mía ŋkɔ la, wotso afi ma va kpe mí le keke Apio Si me, kple Amedzrodzeƒe Etɔ̃awo ke, eye esi Paulo ƒe ŋku kli wo la, eda akpe na Mawu, eye dzi ɖo eƒo. 16  Esi míege ɖe Roma mlɔeba la, woɖe mɔ na Paulo be wòanɔ eɖokui si, gake asrafo nanɔ eŋu dzɔm. 17  Ke hã, le ŋkeke etɔ̃ megbe la, eyɔ Yudatɔwo ƒe amegãwo vae. Esi wova ƒo ƒu la, egblɔ na wo be: “Ŋutsuwo, nɔviwo, togbɔ be nyemewɔ naneke, si tsi tsitre ɖe dukɔ la alo mía tɔgbuiwo ƒe kɔnuwo ŋu o hã la, wolém de gae le Yerusalem, eye wotsɔm de asi na Romatɔwo. 18  Eye esi ame siawo ku nya la me vɔ la, wodi be yewoaɖe asi le ŋunye, elabena nyemewɔ naneke si dze ku o. 19  Gake esi Yudatɔwo yi edzi nɔ nu ƒom tsi tsitre ɖe nyametsotsoa ŋu ta la, esia ƒoe ɖe nunye be, mabia be Kaisaro nagbugbɔ nye nya la adrɔ̃ nam, ke hã, menye abe ɖe metsɔ nya ɖe nye dukɔ la ŋu ene o. 20  Nu sia tututu tae meɖe kuku vevie be woana makpɔ mi, eye maƒo nu na mi ɖo, elabena mɔkpɔkpɔ si le Israel si la tae kɔsɔkɔsɔ sia le ŋunye ɖo.” 21  Wogblɔ nɛ be: “Míexɔ agbalẽ aɖeke tso Yudea le ŋuwò o, eye nɔvi siwo va ɖo la dometɔ aɖeke hã meƒo nu alo gblɔ nya vɔ̃ aɖeke tso ŋuwò o. 22  Gake míekpɔe be, esɔ be míase nu si susum nèle la tso gbɔwò, elabena le nyateƒe me la, míenyae be woƒoa nu tsia tsitre ɖe kɔmama sia ŋu le afi sia afi.” 23  Eya ta woɖo ŋkeke nɛ, eye ame siwo va egbɔ le afi si wòdze la sɔ gbɔ fifia wu tsã. Eye wòɖe nya la me na wo to ɖaseɖiɖi tsitotsito le Mawu fiaɖuƒe la ŋu, kple kpeɖodziwo nana tso Mose ƒe se la kple Nyagblɔɖilawo me dzi, tso ŋdi va se ɖe fiẽ, be yeana woatrɔ ɖe Yesu ŋu. 24  Eye wo dometɔ aɖewo te nya siwo wògblɔ la dzi xɔxɔse; bubuawo mexɔ wo dzi se o. 25  Eye esi woƒe nu mesɔ o ta la, wote dzodzo, esi Paulo gblɔ nya ɖeka sia be: “Gbɔgbɔ kɔkɔe la gblɔe nyuie to Yesaya nyagblɔɖila la dzi na mia tɔgbuiwo 26  be: ‘Yi dukɔ sia gbɔ nàgblɔ be: “Esese ya, miasee, gake miase egɔme akpɔ o; eye ekpɔkpɔ ya, miakpɔe, gake miadze sii akpɔ o. 27  Elabena dukɔ sia ƒe dzi ku atri, wosee kple woƒe towo, gake womewɔ edzi o, eye womia woƒe ŋkuwo; bene woagakpɔ nu kple woƒe ŋkuwo, eye woase nu kple woƒe towo, eye woatsɔ woƒe dziwo ase egɔme, be woatrɔ, ne mada gbe le wo ŋu o.”’ 28  Eya ta nenɔ nyanya na mi be nu sia, si dzi Mawu tona ɖea ame la, woɖoe ɖe dukɔwo; woawo ya woaɖo toe godoo.” 29  * —— 30  Ale wònɔ xɔ si eya ŋutɔ haya la me ƒe eve blibo, eye wòxɔa ame siwo vaa egbɔ la nyuie, 31  henɔ gbeƒã ɖem Mawu fiaɖuƒe la na wo, eye wònɔ nu siwo ku ɖe Aƒetɔ Yesu Kristo ŋu la fiam kple dzideƒo blibo, eye ame aɖeke mexea mɔ nɛ o.

Etenuŋɔŋlɔ