Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Dɔwɔwɔwo 27:1-44

27  Ke esi woɖoe be míaɖo tɔdziʋu ayi Italia ta la, wotsɔ Paulo kple gamenɔla bubu aɖewo de asrafomegã aɖe, si ŋkɔe nye Yulio, tso Augusto ƒe asrafoha me la si.  Eye esi míeɖo tɔdziʋu aɖe si tso Adramitio, si yina dzedze ge ɖe ʋudzeƒe vovovo siwo le Asia nutoa ƒe ƒu ta la, míeho, eye Aristarxo, si nye Makedoniatɔ tso Tesalonika, hã nɔ mía ŋu.  Eye le ŋkeke si kplɔe ɖo dzi la, míeɖi go ɖe Zidon, eye Yulio wɔ nu ɖe Paulo ŋu dɔmenyotɔe, eye wòɖe mɔ nɛ be wòayi exɔlɔ̃awo gbɔ, ne woakpɔ eƒe nu hiahiãwo gbɔ nɛ.  Eye esi míeho tso afi ma la, míetrɔ to teƒe si awɔe be Kipro naxe ya la na mí, elabena ya ƒo va nɔ mía kpem;  eye míeto ƒu la dzi le Kilikia kple Pamfilia ŋu, eye míedze ɖe Mira le Likia.  Gake asrafomegã la kpɔ tɔdziʋu aɖe le afi ma, si tso Aleksandria yina Italia, eye wòna míeɖoe.  Azɔ esi míezɔ blewu ŋkeke geɖe megbe, eye bebli hafi míeva ɖo Knido kasa, le esi ya la mena mɔ mí be míayi ŋgɔ o ta la, míetrɔ to teƒe si awɔe be Kreta naxe ya la na mí, eye míeva ɖo Salmone kasa,  eye bebli hafi míeto ƒugo ma ŋu va ɖo teƒe aɖe, si woyɔna be Ʋudzeƒe Nyui, si ŋu Lasea dua te ɖo.  Esi ŋkeke geɖe va yi, eye afɔku va nɔ ƒudzimɔzɔzɔ me, elabena avuléŋkeke la ƒe nutsitsidɔ la kura gɔ̃ hã va yi xoxo ta la, Paulo ɖo aɖaŋu 10  na wo gblɔ be: “Ŋutsuwo, mekpɔe be nu geɖewo le gbegblẽ ge, eye nu geɖewo abu le ƒudzimɔzɔzɔa me, menye le agbawo kple ʋua gome ko o, ke le míaƒe luʋɔwo hã gome.” 11  Ke hã, asrafomegã la xɔ tɔdziʋukula la kple ʋutɔ la dzi se wu nu siwo gblɔm Paulo nɔ. 12  Ke esi ʋudzeƒe la menyo be woanɔ le vuvɔŋɔli o ta la, ame akpa gãtɔ ɖo aɖaŋu be míaho adzo, kple susu be ɖewohĩ woate ŋu aɖo Foinike, si nye ʋudzeƒe aɖe le Kreta, eye wòdze ŋgɔ dzieheɣedzeƒe kple anyieheɣedzeƒe, bene míanɔ afi ma le vuvɔŋɔlia. 13  Gawu la, esi anyieheya nɔ ƒoƒom blewu ta la, wosusu be, yewoƒe tameɖoɖo la adze edzi, eye woɖe seke la de ʋua me, eye woho to Kreta ƒugo ŋu. 14  Gake eteƒe medidi kura o, ya sesẽ si woyɔna be Eurakilo la ƒo. 15  Esi wònɔ tɔdziʋu la nyamam vevie, eye ʋu la de ŋgɔ yi ge do kpoe ta la, míena mɔe, eye ya la kɔ mí ɖe nu. 16  Azɔ míetrɔ to teƒe si ana ƒukpo sue aɖe, si woyɔna be Klauda la, naxe ya la na mí, ke hã, bebli hafi míaƒe asi te ŋu ka tɔdziʋu sue si nɔ ʋua gɔme le megbe lɔƒo la. 17  Gake esi wohee de ʋua me vɔ la, wobla ʋua sesĩe, be wòagaʋanya o; eye esi wonɔ vɔvɔ̃m be ʋu la ava si ke le Sirte* la dzi ta la, woɖiɖi abala la, eye ale ya la kɔ mí ɖe nu. 18  Ke hã, esi ahom la nɔ mía nyamam vevie ta la, esi ŋu ke la, wote ʋua me nuwo fɔfɔ ƒu gbe; 19  eye le ŋkeke etɔ̃agbe la, woawo ŋutɔwo tsɔ woƒe asiwo fɔ ʋua me dɔwɔnuwo ƒu gbe. 20  Ke esi ɣe alo ɣletivi aɖeke medze o le ŋkeke geɖe megbe, eye menye ahom vie tu nɔ mía kpem o ta la, mɔkpɔkpɔ katã na míaƒe agbetsitsi te bubu mlɔeba. 21  Eye esi wonɔ anyi eteƒe didi numaɖumaɖui la, Paulo tsi tsitre le wo dome hegblɔ be: “Ŋutsuwo, ɖe wòle be miaɖo to nye aɖaŋuɖoɖo la hafi, be miagaho tso Kreta o, eye anye ne nu magblẽ le mía ŋu, eye míabu nu geɖewo alea o. 22  Ke azɔ la, mele dzi dem ƒo na mi be miaƒe dzi nedze eme, elabena mia dometɔ aɖeke ƒe luʋɔ mabu o, negbe tɔdziʋua ko. 23  Elabena le zã sia me la, Mawu si tɔ menye, si mewɔa subɔsubɔdɔ kɔkɔe na la, ƒe dɔla aɖe nɔ tsitre ɖe gbɔnye, 24  gblɔ be: ‘Paulo, mègavɔ̃ o. Ele be nàtsi tsitre ɖe Kaisaro ŋkume, eye kpɔ ɖa! Mawu tsɔ ame siwo katã ɖo ʋua kpli wò la ke wò.’ 25  Eya ta ŋutsuwo, miaƒe dzi nedze eme; elabena mexɔ Mawu dzi se, be ava eme pɛpɛpɛ abe ale si wogblɔe nam ene. 26  Ke hã, ele be míaɖi go ɖe ƒukpo aɖe dzi.” 27  Ke esi zã wuienelia do, eye ya nɔ mía nyamam le Adria ƒua dzi la, le zãtiƒe la, ʋua me dɔwɔlawo susu be, yewonɔ anyigba aɖe gogom. 28  Eye woda dzidzeka ɖe ƒua me, eye wokpɔ meta blaetɔ̃ vɔ ade; eya ta wogate yi ŋgɔ vie, eye wogada dzidzeka ake hekpɔ meta blaeve vɔ adre. 29  Eye esi wonɔ vɔvɔ̃m be, míava dze go ɖe kpewo dzi ta la, woda seke ene to ʋua gɔme le megbe lɔƒo, henɔ mɔ kpɔm vevie be ŋu nake. 30  Gake esi ʋua me dɔwɔlawo nɔ didim be yewoasi le ʋua me, eye woɖiɖi tɔdziʋu sue la ɖe ƒua me, abe seke da gee woyina ɖe ʋua ƒe ŋgɔ hã ene la, 31  Paulo gblɔ na asrafomegã la kple asrafoawo be: “Ne ame siawo mele ʋua me o la, miate ŋu akpɔ ɖeɖe o.” 32  Eya ta asrafoawo tso tɔdziʋu sue la ƒe kawo, eye wona wòdze ƒua me. 33  Ke esi ŋu nɔ kekem la, Paulo te dzidedeƒo na wo katã be woadi nane aɖu, gblɔ be: “Egbee nye ŋkeke wuieneagbe miedɔ alɔ̃ o, eye mietsi dɔ, naneke maɖumaɖui. 34  Eya ta mele dzi dem ƒo na mi be miadi nane aɖu, elabena miaƒe nyonyo tae; elabena mia dometɔ aɖeke ƒe taɖa ɖeka kura gɔ̃ hã mabu o.” 35  Esi wògblɔ esia vɔ la, eya ŋutɔ hã tsɔ abolo, eye wòda akpe na Mawu ɖe eta le wo katã ŋkume, eye wòŋe eme hede asi eɖuɖu me. 36  Eya ta wo katã ƒe dzi dze eme, eye woawo ŋutɔwo hã wote nuɖuɖu. 37  Ke mí katã, mí luʋɔ siwo nɔ tɔdziʋua me la, míenɔ alafa eve kple blaadre vɔ ade. 38  Esi woɖu nu ɖi ƒo vɔ la, wote lugba si wodo ɖe ʋua me la fɔfɔ ƒu gbe ɖe ƒua me, bene ʋua nazu wodzoe. 39  Mlɔeba esi ŋu ke la, womete ŋu dze si anyigba la o, gake wonɔ adɔ̃ aɖe si ŋu ƒu ta le la kpɔm ɖaa, eye woɖoe be, ne yewoate ŋui la, yewoaku ʋu la ayi afi ma. 40  Eya ta esi wotso sekeawo la, wona wodze ƒua me, eye wotu kuɖɔkawo hã zi ɖeka, eye esi wodo abala la kpe yae la, woɖo ta ƒu ta. 41  Esi wodze ɖe teƒe lebii aɖe, si yi ɖe ƒua me la, wona ʋu la si ke, eye eƒe tagbɔ xaxa hetsi maʋamaʋa, gake eƒe gɔme le megbe lɔƒo ya te gbagbã kakɛkakɛe. 42  Eya ta asrafoawo ɖoe kplikpaa be, yewoawu gamenɔlawo, ale be ame aɖeke nagaƒu tsi asi o. 43  Gake asrafomegã la di be yeakpɔ Paulo ta dedie, eye wòxe mɔ na woƒe tameɖoɖo la. Eye wòɖe gbe na ame siwo ate ŋu aƒu tsi la be, woadzo adze ƒua me, ne woayi gota gbã, 44  eye be ame susɔeawo hã nanɔ ʋuƒowo alo tɔdziʋua ƒe kakɛwo dzi ayi gota. Eye aleae wòdzɔe be, wo katã wode gota dedie.

Etenuŋɔŋlɔ

Esia nye bateƒe gã aɖe le Lybia ƒu ta, le  Dziehe Afrika, afi si atsiaƒua ge ɖe anyigba me le.