Dɔwɔwɔwo 25:1-27

25  Eya ta esi Festo va ɖo nutoa ƒe dziɖuƒea la, etso Kaisarea yi Yerusalem le ŋkeke etɔ̃ megbe;  eye nunɔlawo ƒe tatɔwo kple Yudatɔwo dome ame ŋkutawo tso Paulo nu nɛ. Eya ta wote kukuɖeɖe nɛ vevie,  hebia amenuveve tso egbɔ, be wòadɔ ame woakplɔ ŋutsu la ava Yerusalem, elabena wode xa ɖe mɔa dzi be yewoawui.  Ke hã, Festo ɖo eŋu be ele be Paulo nanɔ Kaisarea, eye be ye ŋutɔ hã yele afi ma yi ge kpuie.  Eye wògblɔ be: “Eya ta amegã siwo le mia dome la nayi kplim, eye ne ŋutsu la wɔ nu tovo aɖe la, ne woatso enu.”  Eye esi wònɔ wo dome mewu ŋkeke enyi alo ewo o la, eyi Kaisarea, eye le ŋkeke si kplɔe ɖo dzi la, ebɔbɔ nɔ ʋɔnudrɔ̃zikpui la dzi, eye wòɖe gbe be woakplɔ Paulo avae.  Esi wòva ɖo la, Yudatɔ siwo tso Yerusalem va la tsi tsitre ƒo xlãe, eye wonɔ enu tsom kple nya vevi geɖewo, evɔ womete ŋu nɔ kpe ɖom nutsotsoawo dzi o.  Gake Paulo ʋli eɖokui ta gblɔ be: “Nyemewɔ nu vɔ̃ aɖeke ɖe Yudatɔwo ƒe Se la alo gbedoxɔ la alo Kaisaro ŋu o.”  Festo, si nɔ didim be yeƒe nu nadze Yudatɔwo ŋu la, ɖo eŋu na Paulo gblɔ be: “Èdi be yeayi Yerusalem, ne woadrɔ̃ ʋɔnu wò le afi ma le nu siawo ŋuti le ŋkunyemea?” 10  Gake Paulo gblɔ be: “Kaisaro ƒe ʋɔnudrɔ̃zikpui la ŋgɔe metsi tsitre ɖo, eye afi siae wòle be woadrɔ̃ ʋɔnum le. Nyemeda vo aɖeke ɖe Yudatɔwo ŋu o, abe ale si wò ŋutɔ hã nèle ekpɔm kɔtɛ ene. 11  Ne nu gbegblẽ wɔlae menye vavã, eye mewɔ nu si dze ku la, nyemegbe ku o; gake ne nu siwo ta ame siawo le nunye tsom ɖo la dometɔ aɖeke mele eme o la, ekema ame aɖeke mate ŋu atsɔm ade asi na wo, be yeadze wo ŋu o. Kaisaro negbugbɔ nye nya la drɔ̃ nam!” 12  Eye esi Festo lé nya la kpɔ kple adaŋudelawo vɔ la, eɖo eŋu be: “Èbe Kaisaro negbugbɔ nya la drɔ̃ na ye; eya ta àyi Kaisaro gbɔ.” 13  Ke esi ŋkeke aɖewo va yi la, Agripa Fia la kple Bernike va Kaisarea, be yewoado gbe na Festo. 14  Eye esi wonɔ afi ma ŋkeke geɖe ta la, Festo tsɔ nya si ku ɖe Paulo ŋu la ɖo fia la ŋkume be: “Felike gblẽ ŋutsu aɖe ɖe ga me, 15  eye esi meyi Yerusalem la, nunɔlawo ƒe tatɔwo kple Yudatɔwo ƒe amegãwo tso enu hebia be mabu fɔe. 16  Gake meɖo eŋu na wo be, menye Romatɔwo ƒe ɖoɖo be woatsɔ ame aɖe ade asi, kple susu be woadze ame ŋu, hafi ame si nu wotso la kple enutsolawo nakpe ŋkume kple ŋkume, ne wòaʋli eɖokui ta le nutsotso la ŋuti o. 17  Eya ta esi wova ƒo ƒu ɖe afi sia la, nyemehe ɖe megbe kura o, ke boŋ le ŋkeke si kplɔe ɖo dzi la, mebɔbɔ nɔ ʋɔnudrɔ̃zikpui la dzi heɖe gbe be woakplɔ ŋutsua avae. 18  Esi enutsolawo tsi tsitre la, wometso enu le nya vɔ̃, siwo mesusu le eŋu la, ƒe ɖeke ŋuti o. 19  Ðeko wohe nya aɖewo kplii ku ɖe woawo ŋutɔwo ƒe mawu la subɔsubɔ kple Yesu aɖe si ku, gake Paulo ya yi edzi le gbɔgblɔm be ele agbe, la ŋuti. 20  Ke esi metɔtɔ le nya siawo ŋu nyahehe la ŋuti ta la, mebiae be edi be yeayi Yerusalem, ne woadrɔ̃ ʋɔnui tso nya siawo ŋu le afi ma hã. 21  Gake esi Paulo bia be yeanɔ anyi alala Bubutɔ La ƒe nyametsotso ta la, mede se be woana wòanɔ anyi, va se ɖe esime maɖoe ɖe Kaisaro.” 22  Eye Agripa gblɔ na Festo be: “Nye ŋutɔ hã madi be mase ŋutsua ƒe numegbe.” Egblɔ be: “Etsɔ la, àse eƒe nya.” 23  Eya ta le ŋkeke si kplɔe ɖo dzi la, Agripa kple Bernike va kple atsyɔ̃ɖoɖo kpeɖii, eye woge ɖe takpeƒe la kple aʋafiagãwo kpakple ame ŋkuta siwo le dua me, eye esi Festo ɖe gbe la, wokplɔ Paulo va eme. 24  Eye Festo gblɔ be: “Fia Agripa kple mi ame siwo katã le mía gbɔ afi sia, ŋutsu sia, si kpɔm miele la tae Yudatɔwo ƒe ha gã blibo la katã va do ɖe dzinye le Yerusalem kple afi sia, henɔ ɣli dom be medze be wòaganɔ agbe o. 25  Gake mekpɔe dze sii be, mewɔ naneke si dze ku o. Eya ta esi ŋutsu sia ŋutɔ bia be Bubutɔ La nagbugbɔ yeƒe nya la adrɔ̃ na ye la, metso nya me be maɖoe ɖee. 26  Gake nya gbagbe aɖeke mele asinye maŋlɔ tso eŋu aɖo ɖe nye Aƒetɔ la o. Eya ta mekplɔe va mia ŋkume, vevietɔ va wò, Fia Agripa ŋkume, be ne míedzro nya la me le ʋɔnua vɔ la, ɖewohĩ makpɔ nane aŋlɔ. 27  Elabena mekpɔe be susu mele eme be woaɖo gamenɔla aɖe ɖa, evɔ womagblɔ nutsotso siwo wotsɔ ɖe eŋu la kpe ɖe eŋu o.”

Etenuŋɔŋlɔ