Dzo kpo yi emenuwo dzi

Dzo kpo yi emenuawo dzi

Dɔwɔwɔwo 22:1-30

22  “Ŋutsuwo, nɔviwo kple fofowo, miɖo to miase ale si mele ɖokuinye ta ʋli gee azɔ.”  (Eye esi wose be ele nu ƒom na wo le Hebrigbe me la, wogazi ɖoɖoe wu tsã, eye wògblɔ be:)  “Yudatɔe menye, wodzim le Tarso le Kilikia, gake du sia mee wofia num le, le Gamaliel ƒe afɔ nu, eye wofia mía tɔgbuiwo ƒe Se lam tsitotsito, eye mewɔ Mawu ƒe dɔ la kple veviedodo abe ale si mi katã miele ewɔm egbea ene.  Eye meti Mɔ sia yome va se ɖe ku me ke, eye meblaa ŋutsuwo kple nyɔnuwo siaa va dea gaxɔ me,  abe ale si nunɔlagã la kple amegãwo katã ate ŋu anye ɖasefowo nam le eŋuti ene. Mexɔ agbalẽwo hã tso wo gbɔ na nɔvi siwo le Damasko, eye menɔ mɔ dzi yina be mabla ame siwo nɔ afi ma la hã akplɔ ava Yerusalem, be woahe to na wo.  “Gake esi menɔ mɔa dzi gogo Damasko la, le ŋdɔ ga wuieve lɔƒo me la, kasia kekeli sesẽ aɖe klẽ tso dziƒo ƒo xlãm,  eye medze anyi hese gbe aɖe wògblɔ nam be: ‘Saul, Saul, nu ka ŋuti nèle yonyeme tim?’  Meɖo eŋu be: ‘Wò ame kae, Aƒetɔ?’ Eye wògblɔ nam be: ‘Nyee nye Yesu, Nazaretetɔ la, ame si yome tim nèle la.’  Nyateƒee, ame siwo nɔ mɔa zɔm kplim la kpɔ kekeli la, gake womese ame si nɔ nu ƒom nam la ƒe gbe o. 10  Ale megblɔ be: ‘Nu kae wòle be mawɔ, Aƒetɔ?’ Aƒetɔ la gblɔ nam be: ‘Tso, dze mɔ nàyi Damasko, eye woagblɔ nu sia nu si meɖo be nàwɔ la na wò le afi ma.’ 11  Gake esi nyemete ŋu nɔ naneke kpɔm o le kekeli la ƒe ŋutikɔkɔe ta la, ame siwo nɔ ŋunye lae lé nye alɔnu, hafi mete ŋu va ɖo Damasko. 12  “Ke Anania, ŋutsu aɖe si vɔ̃a Mawu le Se la nu, si ŋu Yudatɔ siwo katã nɔ afi ma la ƒo nu nyui le la, 13  va gbɔnye, eye esi wòtsi tsitre ɖe gbɔnye la, egblɔ nam be: ‘Saul, nɔvi, gakpɔ nu!’ Eye le gaƒoƒo ma tututu dzi la, mefɔ mo dzi kpɔe. 14  Egblɔ be: ‘Mía tɔgbuiwo ƒe Mawu la tia wò be, nàva nya yeƒe lɔlɔ̃nu, eye nàkpɔ Dzɔdzɔetɔ la, eye nàse eƒe numegbe, 15  elabena ele be nànye eƒe ɖasefo le amewo katã ŋkume le nu siwo nèkpɔ hese la ŋu. 16  Eye azɔ nu ka tae nèle hehem ɖe megbe? Tso, na woanyrɔ wò, eye woaklɔ wò nu vɔ̃wo ɖa to eƒe ŋkɔ la yɔyɔ me.’ 17  “Gake esi metrɔ va Yerusalem, eye menɔ gbe dom ɖa le gbedoxɔa me la, mekpɔ ŋutega aɖe, 18  eye mekpɔe wònɔ gbɔgblɔm nam be: ‘Netsɔ, do go le Yerusalem kaba, elabena womalɔ̃ ɖe ɖase si ɖim nèle tso ŋunye la dzi o.’ 19  Eye megblɔ be: ‘Aƒetɔ, woawo ŋutɔwo nyae nyuie be, medea ame siwo xɔ dziwò se la gaxɔ me, eye meƒoa wo le ƒuƒoƒe sia ƒuƒoƒe; 20  eye esi wonɔ wò ɖasefo Stefano ƒe ʋu kɔm ɖi la, nye ŋutɔ hã metɔ ɖe afi ma heda asi ɖe edzi, eye menɔ ame siwo wui la ƒe awudziwuiwo dzi kpɔm.’ 21  Ke hã, egblɔ nam be: ‘Heyi, elabena madɔ wò ɖe dukɔ siwo le didiƒe ʋĩi la gbɔ.’” 22  Ke wonɔ to ɖomee va se ɖe nya sia dzi, eye wokɔ woƒe gbewo dzi gblɔ be: “Miɖe ame sia ɖa le anyigba dzi, elabena medze anɔ agbe o!” 23  Eye esi wonɔ ɣli dom henɔ woƒe awudziwuiwo dam, eye wonɔ ke hlẽm ɖe ya me ta la, 24  aʋafiagã la ɖe gbe be woakplɔe ayi asrafowo ƒe nɔƒe la, eye wògblɔ be woaƒoe kple atam ne wòato nyateƒe, bene yeanya nu si tututu tae wonɔ ɣli dom ɖe eta nenema ɖo. 25  Gake esi wohe Paulo be woaƒoe la, egblɔ na asrafomegã si tɔ ɖe afi ma la be: “Ðe wòle se nu be miaƒo ame si nye Romatɔ, si womebu fɔ o la kple atam mahã?” 26  Ke esi asrafomegã la se nya sia la, eyi aʋafiagã la gbɔ, eye wòka eta nɛ gblɔ be: “Nu kae nèɖo ɖe tame be yeawɔ? Romatɔe ŋutsu sia nye lo!” 27  Eya ta aʋafiagã la te ɖe eŋu gblɔ nɛ be: “Gblɔe nam, Romatɔe nènyea?” Eɖo eŋu be: “Ɛ̃.” 28  Aʋafiagã la gblɔ nɛ be: “Ga gbogbo aɖee metsɔ ƒle dukɔmevinyenye ƒe gomenɔamesi siawo.” Paulo gblɔ be: “Gake nye ya ɖe wodzim ɖe wo me.” 29  Eya ta ame siwo di be yewoawɔ fui ne wòato nyateƒe la dzo le egbɔ enumake; eye vɔvɔ̃ ɖo aʋafiagã la ŋutɔ, esi wòva nya be Romatɔe wònye hafi yeblae. 30  Eya ta esi ŋu ke, eye wònɔ didim be yeanya nu si tututu ta Yudatɔwo nɔ enu tsom ɖo la, ena wotui, eye wòɖe gbe be nunɔlawo ƒe tatɔwo kple Sanhedrin blibo la naƒo ƒu. Eye wòkplɔ Paulo ɖi va anyi, eye wòna wòtsi tsitre ɖe wo dome.

Etenuŋɔŋlɔ