Dzo kpo yi emenuwo dzi

Dzo kpo yi emenuawo dzi

Dɔwɔwɔwo 21:1-40

21  Ke esi míete ŋu va dzo le wo gbɔ mlɔeba, eye míeɖo tɔdziʋua la, míezɔ tẽe va Kos, gake le ŋkeke si kplɔe ɖo dzi la, míeva Rodo, eye tso afi ma míeyi Patara.  Eye esi míekpɔ tɔdziʋu aɖe si va yina Foinike la, míeɖoe, eye míeho dzo.  Esi míenɔ Kipro ƒukpoa kpɔm ɖaa la, míeɖee ɖe megbe le mia me, eye míeho yi Siria heva ɖi go ɖe Tiro, elabena afi mae tɔdziʋua yina eƒe agbawo ɖe ge ɖo.  Míedi nusrɔ̃lawo hekpɔ wo, eye míenɔ afi ma ŋkeke adre. Gake wogblɔ na Paulo enuenu to gbɔgbɔ la dzi be, negaɖo afɔ Yerusalem o.  Eya ta esi míewu ŋkekeawo nu la, míedo go hedze mɔ; gake wo katã, hekpe ɖe nyɔnuwo kple ɖeviwo ŋu, ɖo mí ɖa va se ɖe keke dua godo ke. Eye esi míedze klo ɖe ƒua ta la, míedo gbe ɖa,  eye míeklã mía nɔewo, eye míeɖo tɔdziʋua, gake woawo ya wotrɔ yi woƒe aƒewo me.  Ale míewu ƒudzimɔzɔzɔ si dze egɔme tso Tiro la nu, eye míeva ɖo Ptolemai, eye míeyi ɖado gbe na nɔviawo henɔ wo gbɔ ŋkeke ɖeka.  Esi ŋu ke la, míedzo, eye míeva ɖo Kaisarea, eye míege ɖe nya nyui gblɔla Filipo, si nye ame adreawo dometɔ ɖeka, ƒe aƒe me, eye míetsi egbɔ.  Vinyɔnuvi ene nɔ ŋutsu sia si, siwo menya ŋutsu o, eye wogblɔa nya ɖi. 10  Gake esi míenɔ wo gbɔ ŋkeke geɖe la, nyagblɔɖila aɖe si ŋkɔe nye Agabo la tso Yudea va, 11  eye wòva mía gbɔ hetsɔ Paulo ƒe alidziblanu bla ye ŋutɔ ƒe afɔwo kple asiwo hegblɔ be: “Ale gbɔgbɔ kɔkɔe la gblɔe nye si: ‘Ŋutsu si tɔ alidziblanu sia nye la, Yudatɔwo ablae alea le Yerusalem, eye woatsɔe ade asi na dukɔwo me tɔwo.’” 12  Esi míese nya sia la, mía kple ame siwo nɔ afi ma míete kukuɖeɖe nɛ vevie be wòagayi Yerusalem o. 13  Ke Paulo ɖo eŋu be: “Nu kae nye esia wɔm miele, le avi fam hele dzi gbãm nam? Mika ɖe edzi be mele klalo, menye be woablam ɖeɖe ko o, ke be maku le Yerusalem le Aƒetɔ Yesu ƒe ŋkɔ ta hã.” 14  Esi wògbe míaƒe nyawo sese la, míelɔ̃ ɖe edzi nɛ hegblɔ be: “Yehowa ƒe lɔlɔ̃nu neva eme.” 15  Ke le ŋkeke siawo megbe la, míedzra ɖo na mɔzɔzɔa, eye míedze mɔ ɖo ta Yerusalem. 16  Gake nusrɔ̃la aɖewo hã tso Kaisarea yi kpli mí, be woakplɔ mí ayi ŋutsu si ƒe aƒe me wòle be míadze la gbɔ, si nye Mnason aɖe tso Kipro, eye wònye nusrɔ̃la gbãtɔwo dometɔ ɖeka. 17  Esi míeɖo Yerusalem la, nɔviawo xɔ mí kple dzidzɔ. 18  Gake le ŋkeke si kplɔe ɖo dzi la, Paulo yi Yakobo gbɔ kpli mí; eye hamemetsitsiawo katã hã nɔ afi ma. 19  Eye wòdo gbe na wo hete nu siwo Mawu wɔ le dukɔwo dome to eƒe subɔsubɔdɔa dzi la ŋuti nyawo gbɔgblɔ na wo tsitotsito. 20  Esi wose esia la, wode asi Mawu dodo ɖe dzi me, eye wogblɔ nɛ be: “Nɔvi, èkpɔe be xɔsetɔ akpe geɖe le Yudatɔwo dome; eye wo katã wodoa vevie Se la. 21  Gake wose le ŋutiwò be, èle nu fiam Yudatɔ siwo le dukɔwo dome la be woatrɔ le Mose yome, si nye xɔsegbegbe, eye nèle gbɔgblɔm na wo be, woagatso aʋa na wo viwo alo azɔ le kɔnu siwo woɖo ɖi la nu o. 22  Ekema nu kae míawɔ le nya sia ŋu? Godoo la, wole sese ge be èva. 23  Eya ta wɔ nu sia, si míagblɔ na wò: Ŋutsu ene le mía si, siwo dzi adzɔgbeɖeɖe aɖe le. 24  Kplɔ ame siawo ɖe asi, eye nàkɔ ɖokuiwò ŋu le kɔa nu kpe ɖe wo ŋu, eye nàxe nu siwo woazã la ŋuti fewo, ne woalũ ta na wo. Eye ale ame sia ame anya be nya siwo wogblɔ na wo tso ŋuwò la dometɔ aɖeke mele eme o, ke boŋ be èle zɔzɔm ɖe ɖoɖo la nu, eye be wò ŋutɔ hã èle Se la dzi wɔm. 25  Ke le xɔsetɔ siwo le dukɔwo me gome la, míewɔ míaƒe nyametsotso heɖoe ɖe wo, be ele be woakpɔ wo ɖokuiwo dzi tso nu siwo wotsɔ sa vɔ na trɔ̃wo, kple ʋu kple lã tsiʋumewo kpakple agbe gbegblẽ nɔnɔ ŋu.” 26  Ale, esi ŋu ke la, Paulo kplɔ ŋutsuawo kpe ɖe eɖokui ŋu, eye wòkɔ eɖokui ŋu le kɔa nu kpe ɖe wo ŋu, eye wòyi gbedoxɔa me, be yeana woanya ŋkeke siwo ŋutikɔkɔ le kɔa nu axɔ, va se ɖe esime woana vɔsanu ɖe wo dometɔ ɖe sia ɖe ta. 27  Ke esi wòsusɔ vie ŋkeke adreawo nawu enu la, esi Yudatɔ siwo tso Asia la kpɔe le gbedoxɔa me la, wode zi ameha blibo la katã me, eye woɖo woƒe asiwo edzi, 28  henɔ ɣli dom be: “Israel ŋutsuwo, miva xɔ na mí loo! Ŋutsu si le nu fiam amewo katã le afi sia afi be woatsi tsitre ɖe dukɔ la kple Se la kpakple teƒe sia ŋu lae nye esia, eye gawu la, ekplɔ Helatɔwo va gbedoxɔa me kura gɔ̃ hã, eye wòƒo ɖi teƒe kɔkɔe sia.” 29  Elabena wokpɔ woa kple Trofimo, Efesotɔ la, le dua me va yi, eye wonɔ susum be Paulo kplɔe va gbedoxɔa me. 30  Eye du blibo la katã tɔ zi, eye amewo ƒu du kplikplikpli; eye wolé Paulo hehee do goe le gbedoxɔa me. Eye enumake wotu ʋɔtruawo. 31  Eye esi wonɔ didim be yewoawui la, nya la ɖo asrafoha la ƒe kplɔla gbɔ be Yerusalem dua tɔ zi; 32  eye enumake wòkplɔ asrafowo kple asrafomegãwo, eye woƒu du yi wo gbɔ. Esi woƒe ŋku kli aʋafiagã la kple asrafoawo la, wodzudzɔ Paulo ƒoƒo. 33  Tete aʋafiagã la te ɖe wo ŋu, eye wòlée heɖe gbe be woatsɔ kɔsɔkɔsɔ eve ablae; eye wòte biabia be ame kae wònye, eye be nu kae wòwɔ hã. 34  Gake ameha la me tɔ aɖewo te ɣlidodo be ale, bubuwo hã be ale. Eya ta esi eya ŋutɔ mete ŋu nya nu si koŋ ye dzɔ o le zitɔtɔ la ta la, eɖe gbe be woakplɔe ava asrafowo nɔƒe la. 35  Gake esi wòɖo atrakpuiawo dzi la, nɔnɔmea va bia be asrafoawo nakɔe, le ameha la ƒe ŋutasẽnuwɔwɔ ta; 36  elabena ameha la me tɔ gbogboawo kplɔ wo ɖo nɔ ɣli dom be: “Bu mo nɛ!” 37  Eye esi wokplɔ Paulo yina asrafowo nɔƒea ɖo ge teti la, egblɔ na aʋafiagã la be: “Mɔɖeɖe li be magblɔ nya aɖe na wòa?” Egblɔ be: “Èse Helagbea? 38  Ãa, ke menye wòe nye Egiptetɔ si na wodze aglã ɖe dziɖuɖu ŋu le ŋkeke siawo me, eye wòkplɔ amewula akpe ene yi gbedadaƒo, la oa?” 39  Tete Paulo gblɔ be: “Le nyateƒe me la, Yudatɔe menye tso Tarso le Kilikia; du mafeŋu aɖe me tɔ menye. Eya ta meɖe kuku na wò, ɖe mɔ nam maƒo nu na ameawo.” 40  Esi wòɖe mɔ na Paulo la, etsi tsitre ɖe atrakpuiawo dzi, eye wòwɔ asi na ameawo. Esi ɖoɖoe zi toŋtoŋtoŋ la, eƒo nu na wo le Hebrigbe me gblɔ be:

Etenuŋɔŋlɔ