Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Dɔwɔwɔwo 20:1-38

20  Ke esi hoowɔwɔa nu tso la, Paulo na woyɔ nusrɔ̃lawo vae, eye esi wòde dzi ƒo na wo heklã wo vɔ la, edze mɔ ɖo ta Makedonia.  Esi wòto nuto mawo me hede dzi ƒo na ame siwo nɔ afi ma kple nya geɖewo vɔ la, eva Hela nyigba dzi.  Eye esi wònɔ afi ma ɣleti etɔ̃ la, eɖoe be yeatrɔ ato Makedonia adzo, le Yudatɔwo ƒe nugbeɖoɖo ɖe eŋu esime wònɔ dzadzram ɖo be yeaɖo tɔdziʋu ayi Siria ta.  Ame siwo nɔ eɖom ɖa lae nye: Sopatre, si nye Beroiatɔ Piro ƒe viŋutsu, Aristarxo kple Sekundo, siwo tso Tesalonikatɔwo dome, kple Gayo si tso Derbe, kple Timoteo, kpakple Tixiko kple Trofimo, tso Asia nuto me.  Ame siawo do ŋgɔ heva nɔ mía lalam le Troa;  gake míeɖo tɔdziʋu tso Filipi le abolo maʋãmaʋã ƒe ŋkekeawo megbe, eye le ŋkeke atɔ̃ me la, míeva tu wo le Troa; eye míenɔ afi ma ŋkeke adre.  Le kwasiɖa ƒe ŋkeke gbãtɔ dzi, esi míeƒo ƒu be míaɖu nu la, Paulo te nuƒoƒo na wo, elabena eɖoe be yeadzo le ŋkeke si kplɔe ɖo dzi; eye wòdidi eƒe nuƒoa ɖe edzi va se ɖe zãtiƒe ke.  Eya ta akaɖi geɖe nɔ xɔ si me míeƒo ƒu ɖo le dziƒoxɔa dzi la me.  Ðekakpui aɖe si ŋkɔe nye Eutixo la nɔ anyi ɖe fesre nu, eye wòdɔ alɔ̃ yi eme ʋĩi esime Paulo nɔ eƒe nuƒoa dzi, eye esi alɔ̃ mui la, ege tso dzisasrã etɔ̃lia dzi, eye esi woyi ɖakɔe la, wokpɔ be eku. 10  Gake Paulo ɖi yi anyigba, tsyɔ akɔ ɖe edzi hekɔe gblɔ be: “Midzudzɔ hoowɔwɔ, elabena eƒe luʋɔ* le eme.” 11  Azɔ egalia yi dziƒoxɔa dzi, eye wòŋe abolo hete eɖuɖu, eye esi wògaɖo dze kpli wo vie, va se ɖe esime ŋu te keke la, edzo mlɔeba. 12  Ale wokplɔ ŋutsuvi la dzoe agbagbe, eye akɔfafa si wokpɔ la wu gbɔgblɔ. 13  Azɔ míedo ŋgɔ yi ɖe tɔdziʋua me, eye míeho yina Aso, afi si míeɖoe be míakɔ Paulo le, elabena esi wòna mɔfiame tso esia ŋu vɔ la, eya ŋutɔ ɖoe be yeato afɔ. 14  Ale, esi wòva tu mí le Aso la, míexɔe ɖe ʋua me, eye míeyi Mitilene; 15  eye esi míeho tso afi ma le ŋkeke si kplɔe ɖo dzi la, míeva ɖo Xio kasa, gake esi ŋu gake la, míeva tɔ ɖe Samo vie, eye le ŋkeke si kplɔe ɖo dzi la, míeva ɖo Mileto. 16  Elabena Paulo ɖoe be yeato Efeso ŋu ayi, bene yemagagblẽ ɣeyiɣi aɖeke le Asia nutoa me o; elabena enɔ kplakplakpla dzi, be ne yeate ŋui la, yeaɖo Yerusalem le Pentekoste ŋkekenyui la dzi. 17  Ke hã, le Mileto la, edɔ woyi Efeso ɖayɔ hamemetsitsi siwo le hamea me la vae. 18  Esi wova egbɔ la, egblɔ na wo be: “Mienya nyuie be tso ŋkeke gbãtɔ si meɖo afɔ Asia nutoa me la, menɔ mia gbɔ ɣeawokatãɣi, 19  hetsɔ ɖokuibɔbɔ gãtɔ kekeake kple aɖatsiwo kpakple tetekpɔ siwo va dzinye le Yudatɔwo ƒe nugbeɖoɖowo ta la, nɔ dɔ wɔm na Aƒetɔ la abe kluvi ene; 20  esi nyemegbe nu siwo ŋu viɖe le la dometɔ aɖeke gbɔgblɔ na mi o, eye nyemegbe nufiafia mi le dutoƒo kple aƒe me yi aƒe me hã o. 21  Ke boŋ meɖi ɖase na Yudatɔwo kple Helatɔwo siaa tsitotsito tso dzimetɔtrɔ yi Mawu gbɔ kple mía Aƒetɔ Yesu dzi xɔxɔse ŋu. 22  Eye azɔ, kpɔ ɖa! Mele babla le gbɔgbɔ la me yina Yerusalem, togbɔ be nyemenya nu siwo adzɔ ɖe dzinye le afi ma o hã, 23  nu si menya koe nye be le du sia du me la, gbɔgbɔ kɔkɔe la ɖia ɖase nam enuenu, esi wògblɔna be bablawo kple xaxawo le lalayem. 24  Ke hã, nyemebu nye luʋɔ nu xɔasi aɖeke na ɖokuinye o; nu si le vevie nam la koe nye be mawu nye duɖimekeke kple subɔsubɔdɔ si mexɔ tso Aƒetɔ Yesu gbɔ la nu, be maɖi ɖase tso Mawu ƒe amenuveve nya nyui la ŋu tsitotsito. 25  “Eye azɔ, kpɔ ɖa! Menyae be mi ame siwo katã dome meɖe gbeƒã fiaɖuƒea le la, miegale nye ŋkume kpɔ ge azɔ o. 26  Eya tae meyɔ mi be mianye ɖasefowo nam egbeŋkeke sia, be ŋutinye kɔ tso amewo katã ƒe ʋu me, 27  elabena nyemegbe Mawu ƒe aɖaŋuɖoɖo blibo la katã gbɔgblɔ na mi o. 28  Mikpɔ mia ɖokui kple alẽha blibo la dzi nyuie, alẽha si dome gbɔgbɔ kɔkɔe la ɖo mi dzikpɔlawo le, bene miakplɔ Mawu ƒe hame, si wòtsɔ ye ŋutɔ Via ƒe ʋu ƒle la. 29  Menya be le nye dzodzo megbe la, amegãxi nyanyrawo age ɖe mia dome, eye womawɔ nu ɖe alẽha la ŋu le lɔlɔ̃ me o, 30  eye le mia ŋutɔwo dome la, ame aɖewo atsi tsitre, eye woagblɔ nya totrowo, be woahe nusrɔ̃lawo ɖe wo ɖokuiwo ŋu. 31  “Eya ta minɔ ŋudzɔ, eye miɖo ŋku edzi be ƒe etɔ̃ sɔŋ, zã kple keli, nyemedzudzɔ nuxɔxlɔ̃ mia dometɔ aɖeke kple aɖatsiwo o. 32  Eye azɔ la, metsɔ mi le asi dem na Mawu kple eƒe amenuvevenya, si ate ŋu atu mi ɖo ahana domenyinu mi le ame siwo katã ŋu wokɔ dome la. 33  Nyemebiã ŋu ame aɖeke ƒe klosalo alo sika alo nudodo o. 34  Mia ŋutɔwo mienya be asi siawoe metsɔ kpɔ nye nu hiahiãwo kple ame siwo nɔ ŋunye la tɔwo gbɔ. 35  Le nu sia nu me la, meɖee fia mi be ele be miakpe ɖe ame siwo gbɔdzɔ la ŋu to dɔwɔwɔ alea dzi, eye be Aƒetɔ Yesu ƒe nya siawo nanɔ susu me na mi, esime eya ŋutɔ gblɔ be: ‘Dzidzɔ geɖe le nunana me wu nuxɔxɔ.’” 36  Eye esi wògblɔ nya siawo la, woa kpli wo katã wodze klo, eye wodo gbe ɖa. 37  Nyateƒee, wo katã wofa avi ŋutɔ, eye wodze Paulo ƒe kɔ dzi hegbugbɔ nu nɛ lɔlɔ̃tɔe, 38  elabena nya si wògblɔ be womegale yeƒe ŋkume kpɔ ge azɔ o la koŋ na wose veve. Eye woɖoe ɖa va se ɖe tɔdziʋua gbɔ.

Etenuŋɔŋlɔ

Alo “agbe.” Kpɔ Nya Bubuwo, Akpa 7 lia.