Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Dɔwɔwɔwo 2:1-47

2  Ke esi Pentekoste ŋkekenyui la nɔ edzi yim la, wo katã wonɔ teƒe ɖeka,  eye kasia wose nane ƒe ɖiɖi tso dziƒo abe ya sesẽ aɖee ƒo ene, eye wòxɔ aƒe si me wonɔ la katã me.  Eye wokpɔ aɖe siwo le abe dzo ƒe aɖewo ene kaka ɖe wo dome, eye ɖeka dze ɖe wo dometɔ ɖe sia ɖe dzi,  eye gbɔgbɔ kɔkɔe yɔ wo katã taŋ, eye wote gbe bubuwo dodo, abe ale si gbɔgbɔ la na wo be woaƒo nui ene.  Ke Yudatɔwo, mawuvɔ̃lawo, tso dukɔ siwo katã le dziƒoa te la dometɔ ɖe sia ɖe me, nɔ Yerusalem ɣemaɣi.  Eya ta esi gbe sia ɖi la, ameha la ƒo zi va kpe ta, eye woƒe nu ku, elabena wo dometɔ ɖe sia ɖe see wonɔ ye ŋutɔ degbe dom.  Le nyateƒe me la, gbɔgblɔ bu ɖe wo, eye wotsi yaa hegblɔ be: “Kpɔ ɖa, Galileatɔwoe ame siawo katã, siwo le nu ƒom la nyee, alo?  Ke aleke wɔ mía dometɔ ɖe sia ɖe le ye ŋutɔ degbe, si me wodzii ɖo, la sem?  Partiatɔwo kple Mediatɔwo kpakple Elamtɔwo, kple ame siwo tso Mesopotamia, kple Yudea, kple Kapadokia, Ponto, kple Asia nuto me, 10  kple Frigia, kple Pamfilia, Egipte, kple Libia, si le Kirene gbɔ, ƒe teƒeteƒewo, kple ame siwo nye amedzrowo tso Roma, Yudatɔwo kple ame siwo trɔ dzi me zu Yudatɔwo siaa, 11  Kretatɔwo kple Arabiatɔwo, wole nu ƒom tso Mawu ƒe nu dzɔtsuwo ŋu le mía degbe me míele sesem.” 12  Ɛ̃, wo katã woƒe mo wɔ yaa, eye wotɔtɔ, eye wonɔ gbɔgblɔm na wo nɔewo be: “Nu sia gɔme ɖe?” 13  Ke hã, ame bubuwo ɖu fewu le wo ŋu hete gbɔgblɔ be: “Wain vivie le wo mum.” 14  Gake Petro kple ame wuiɖekɛawo tsi tsitre, eye wòkɔ eƒe gbe dzi ƒo nu gblɔ na wo be: “Yudea ŋutsuwo kple mi Yerusalem nɔlawo katã, esia nenɔ nyanya na mi, eye miɖo to nye nyawo. 15  Le nyateƒe me la, menye aha ame siawo mu, abe ale si miele esusum ene o, elabena ŋkekea ƒe gaƒoƒo etɔ̃lia* koe nye esia. 16  Ke boŋ nya si wogblɔ to nyagblɔɖila Yoel dzi ye nye esi: 17  ‘Mawu gblɔ be: “Le ŋkeke mamlɛawo me la, matrɔ nye gbɔgbɔ la ƒe ɖe akɔ ɖe ŋutilã ɖe sia ɖe ƒomevi dzi, eye mia viŋutsuwo kple mia vinyɔnuwo agblɔ nya ɖi, eye miaƒe ɖekakpuiwo akpɔ ŋutegawo, eye miaƒe amegã ɖeɖiwo aku drɔ̃ewo; 18  eye makɔ nye gbɔgbɔ la ƒe ɖe ɖe nye kluviŋutsuwo kple kluvinyɔnuwo kura gɔ̃ hã dzi le ŋkeke mawo me, eye woagblɔ nya ɖi. 19  Eye mana nukunuwo nadze le dziƒo afi mɛ kple dzesiwo le anyigba dzi afii, ʋu kple dzo kpakple dzudzɔbabla kɔtɔɔ; 20  ɣe atrɔ azu viviti, eye ɣleti atrɔ azu ʋu, hafi Yehowa ƒe ŋkeke gã, si nye atsyɔ̃ŋkeke la, nava ɖo. 21  Eye ame sia ame si yɔa Yehowa ƒe ŋkɔ la, woaɖee.”’ 22  “Israel ŋutsuwo, mise nya siawo: Yesu, Nazaretetɔ la, ame si Mawu ɖe fia mi gaglãa to ŋusẽdɔ kple nukunu kpakple dzesi siwo Mawu wɔ to edzi le mia dome la dzi, abe ale si mia ŋutɔwo mienyae ene, 23  ame sia, si wode asi le Mawu ƒe tameɖoɖo kple nunyanya do ŋgɔ la nu la, mieto sedzimawɔlawo ƒe asi dzi hee ɖe ati ŋu, eye mieɖee ɖa. 24  Gake Mawu fɔe ɖe tsitre esi wòtu ku ƒe vevewo, elabena mete ŋu yi edzi lée ɖi o. 25  Elabena David gblɔ le eŋu be: ‘Mena Yehowa le ŋkunyeme ɖaa; elabena ele nye nuɖusi me, bene naneke nagaʋuʋum o. 26  Esia tae nye dzi kpɔ dzidzɔ, eye nye aɖe tso aseye. Gawu la, nye ŋutilã kura gɔ̃ hã anɔ mɔkpɔkpɔ me; 27  elabena màgblẽ nye luʋɔ ɖe Hades* o, eye màɖe mɔ be ame si wɔa nuteƒe na wò la nakpɔ nyunyɔ o. 28  Èna menya agbemɔwo, àtsɔ dzidzɔ aɖi ƒo nam le ŋkuwòme.’ 29  “Ŋutsuwo, nɔviwo, mɔɖeɖe li be woatsɔ dzideƒo aƒo nu na mi tso ƒome ƒe tɔgbui David ŋu, be eku, eye woɖii, eye eƒe yɔdo le mía dome va se ɖe egbegbe. 30  Eya ta esi wònye nyagblɔɖila, eye wònya be Mawu do ŋugbe na ye heka atam tsɔ ɖo kpe edzi be, yeatsɔ yeƒe alimeviwo dometɔ ɖeka aɖo eƒe fiazikpui dzi la, 31  ekpɔ Kristo la ƒe tsitretsitsi la do ŋgɔ, eye wòƒo nu tso eŋu, be womegblẽe ɖe Hades o, eye eƒe ŋutilã hã mekpɔ nyunyɔ o. 32  Yesu sia la, Mawu fɔe ɖe tsitre, nu si ƒe ɖasefowo mí katã míenye. 33  Eya ta esi wodoe ɖe dzi wòyi ɖale Mawu ƒe nuɖusi me, eye wòxɔ gbɔgbɔ kɔkɔe si ŋugbe wodo la tso Fofo la gbɔ ta la, ekɔ nu sia si kpɔm miele hele sesem la ɖi. 34  Le nyateƒe me la, David melia yi dziƒowo o, ke boŋ eya ŋutɔ gblɔ be: ‘Yehowa gblɔ na nye Aƒetɔ be: “Bɔbɔ nɔ anyi ɖe nye nuɖusi me, 35  va se ɖe esime matsɔ wò futɔwo awɔ wò afɔɖodzinui.”’ 36  Eya ta Israel ƒe aƒe blibo la nanyae be, Mawu ɖo Yesu sia si miehe ɖe ati ŋu la wòzu Aƒetɔ kple Kristo.” 37  Ke esi wose esia la, etɔ woƒe dzi me vevie, eye wogblɔ na Petro kple apostolo susɔeawo be: “Ŋutsuwo, nɔviwo, nu kae wòle be míawɔ?” 38  Petro gblɔ na wo be: “Mitrɔ dzi me, eye mina woanyrɔ mia dometɔ ɖe sia ɖe ɖe Yesu Kristo ƒe ŋkɔ me hena nu vɔ̃wo ƒe tsɔtsɔke, eye miaxɔ gbɔgbɔ kɔkɔe ƒe nunana faa la. 39  Elabena mia kple mia viwo kpakple ame siwo katã le adzɔge ʋĩi, ame geɖe ale si nu Yehowa, mía Mawu la ayɔ va eɖokui gbɔ, lae wodo ŋugbea na.” 40  Eye wògagblɔ nya bubu geɖewo tsɔ ɖi ɖase na wo tsitotsito, eye wòyi edzi xlɔ̃ nu wo gblɔ be: “Mina woaɖe mi tso dzidzime gɔglɔ̃ sia me.” 41  Ale ame siwo xɔ eƒe nya la kple dzi blibo la, wonyrɔ wo, eye le ŋkeke ma dzi wotsɔ luʋɔ abe akpe etɔ̃ ene kpee. 42  Eye woyi edzi lé fɔ ɖe apostoloawo ƒe nufiafiawo ŋu vevie, womaa woƒe nuwo kple wo nɔewo, woɖua nu ɖekae, eye wonɔa gbedodoɖa dzi ɣesiaɣi. 43  Nyateƒee, luʋɔ ɖe sia ɖe te vɔvɔ̃, eye nukunu kple dzesi geɖewo te dzɔdzɔ to apostoloawo dzi. 44  Ame siwo katã va zu xɔsetɔwo la nɔ afi ɖeka, eye wowɔa nuwo katã ɖe du, 45  eye wodzraa woƒe anyigbawo kple woƒe nunɔamesiwo, eye womaa nu siwo wokpɔ la na wo katã, ame sia ame ɖe eƒe hiahiã nu. 46  Eye wonɔa gbedoxɔa me gbe sia gbe kple tame ɖeka, eye wotsɔa dzidzɔ geɖe kple dzimekɔkɔ ɖua nu le wo nɔewo ƒe aƒewo me, 47  nɔa Mawu kafum, eye amewo katã kpɔa ŋudzedze ɖe wo ŋu. Le ɣeyiɣi ma ke me la, Yehowa yi edzi tsɔ ame siwo ɖem wonɔ la nɔ kpekpem ɖe wo ŋu tso ŋkeke yi ŋkeke.

Etenuŋɔŋlɔ

Ŋdi ga 9 lɔƒo.
Kpɔ Nya Bubuwo, Akpa 8 lia.