Dzo kpo yi emenuwo dzi

Dzo kpo yi emenuawo dzi

Dɔwɔwɔwo 19:1-41

19  Emegbe esi Apolo nɔ Korinto la, Paulo va Efeso, gake meto ƒutamɔ o, eye wòkpɔ nusrɔ̃la aɖewo;  eye wòbia wo be: “Esi miezu xɔsetɔwo la, miexɔ gbɔgbɔ kɔkɔe laa?” Wogblɔ nɛ be: “Ne gbɔgbɔ kɔkɔe aɖe li hã la, míese eŋu nya gɔ̃ hã kpɔ o.”  Eye wògabia be: “Ekema nu ka mee wonyrɔ mi ɖo?” Wogblɔ be: “Ðe Yohanes ƒe nyɔnyrɔnana la me.”  Paulo gblɔ be: “Yohanes nyrɔ amewo wònye dzesi na dzimetɔtrɔ, eye wògblɔ na wo be woaxɔ ame si gbɔna le ye yome, si nye Yesu, la dzi ase.”  Esi wose esia la, wona wonyrɔ wo le Aƒetɔ Yesu ƒe ŋkɔ la me.  Eye esi Paulo da eƒe asiwo ɖe wo dzi la, gbɔgbɔ kɔkɔe la va wo dzi, eye wote gbegbɔgblɔ bubuwo dodo henɔ nya gblɔm ɖi.  Wo katã woanɔ ŋutsu wuieve.  Evaa ƒuƒoƒea, eye wòtsɔ dzideƒo ƒo nui ɣleti etɔ̃ sɔŋ, eye wònɔ nu ƒom henɔ agbagba dzem be yeatrɔ woƒe susu ɖe Mawu fiaɖuƒe la ŋu.  Gake esi wo dometɔ aɖewo sẽ dzi me, eye womexɔe se o, eye wonɔ nya manyomanyo gblɔm ɖe Mɔ La ŋu le ameha gã la ŋkume la, edzo le wo gbɔ, eye wòɖe nusrɔ̃laawo ɖa le wo dome, eye wònɔ nu ƒom le Tirano ƒe sukuxɔ la me gbe sia gbe. 10  Enɔ esia wɔwɔ dzi ƒe eve sɔŋ, ale be ame siwo katã le Asia nutoa me la se Aƒetɔ la ƒe nya la, Yudatɔwo kple Helatɔwo siaa. 11  Eye Mawu yi edzi nɔ ŋusẽdɔ wɔnukuwo wɔm to Paulo ƒe asi dzi, 12  ale be wotsɔa eƒe takuviwo kple akɔtawuiwo yina na dɔnɔwo, eye dɔléleawo dzona le wo dzi, eye gbɔgbɔ vɔ̃wo doa go. 13  Gake Yudatɔ aɖewo, siwo nɔ tsatsam tso du me yi du me, siwo nyaa gbɔgbɔ vɔ̃wo doa goe la, hã yɔ Aƒetɔ Yesu ŋkɔ ɖe ame siwo me gbɔgbɔ vɔ̃wo nɔ la dzi, gblɔ be: “Mele gbe ɖem na mi le Yesu si Paulo ɖea gbeƒãe la ƒe ŋkɔ me.” 14  Ke Yudatɔ aɖe, si nye nunɔlawo ƒe tatɔ, si ŋkɔe nye Skeva la, ƒe viŋutsu adre ye nɔ nu sia wɔm. 15  Gake gbɔgbɔ vɔ̃ la ɖo eŋu gblɔ na wo be: “Menya Yesu, eye medze si Paulo; gake ame kawoe miawo ya mienye?” 16  Ale ame si me gbɔgbɔ vɔ̃a le la dzo dze wo dzi, eye wòkpe wo dzi ɖekaɖeka, eye wòɖu wo dzi, eye wòde abi wo ŋu, ale be wosi dzo le aƒe ma me amamae. 17  Amewo katã se nya sia, Yudatɔ kple Helatɔ siwo nɔ Efeso la siaa; eye vɔvɔ̃ dze wo katã dzi, eye woyi edzi nɔ Aƒetɔ Yesu ƒe ŋkɔ la dom ɖe dzi. 18  Eye ame siwo va zu xɔsetɔwo la dometɔ geɖewo vana ʋua woƒe nuwɔnawo me hegblɔa wo le dutoƒo. 19  Ɛ̃, akunyawɔlawo dometɔ gbogbo aɖewo tsɔ woƒe agbalẽwo katã vae, eye wotɔ dzo wo le amewo katã ŋkume. Eye wobu woƒe home, eye wokpɔe be ede klosalo akpe blaatɔ̃. 20  Ale Yehowa ƒe nya la yi edzi nɔ tsitsim henɔ ŋusẽ kpɔm. 21  Ke esi wowu nu siawo nu vɔ la, Paulo ɖoe le eƒe gbɔgbɔ me be, ne yeyi ɖato Makedonia kple Axaya vɔ la, yeazɔ mɔ ayi Yerusalem, hegblɔ be: “Ne meɖo afi ma la, ele be mayi aɖakpɔ Roma hã ɖa.” 22  Eya ta edɔ ame siwo nɔ kpekpem ɖe eŋu la dometɔ eve, siwo nye Timoteo kple Erasto, ɖe Makedonia, gake eya ŋutɔ gatsi Asia nutoa me hena ɣeyiɣi vi aɖe. 23  Menye zitɔtɔ vi aɖee va le Mɔ La ŋu le ɣeyiɣi ma tututu me o. 24  Elabena ŋutsu aɖe si ŋkɔe nye Demetrio, si nye klosalonutula la, tsɔa klosalo wɔa Artemis ƒe trɔ̃xɔ suewo, si na be menye viɖe vi aɖee aɖaŋudɔwɔlawo kpɔna tso eme o; 25  eye wòƒo woa kple ame siwo wɔa dɔ sia ƒomevi la nu ƒu, eye wògblɔ be: “Ŋutsuwo, mienya nyuie be dɔwɔɖui siae na míele dzidzedze kpɔm. 26  Eye miekpɔe, eye miesee hã, be menye Efeso ɖeɖe koe Paulo sia na ameha gã aɖe xɔ edzi se, hetrɔ woƒe susu le o, ke Asia nuto blibo la katã kloe mee, eye wòle gbɔgblɔm be menye mawuwoe esiwo wotsɔ asi wɔ la nye o. 27  Gawu la, afɔku li be menye míaƒe dɔwɔɖui sia ɖeɖe koe wogbɔna gbɔ ɖi gee o, womegagbɔna mawunɔ gã Artemis ƒe gbedoxɔa hã bu ge ɖe naneke me o, eye eƒe atsyɔ̃ si Asia nuto blibo la katã kple anyigba dzi tɔwo katã subɔna la hã ava zu nu gbɔlo.” 28  Esi ŋutsuawo se nya sia, eye woyɔ fũu kple dɔmedzoe la, wote ɣlidodo nɔ gbɔgblɔm be: “Efesotɔwo ƒe Artemis lae nye gã!” 29  Ale zi tɔ le du blibo la katã me, eye wo katã wotsɔ tame ɖeka ƒu du yi fefewɔƒe la, eye wokplɔ Gayo kple Aristarxo, Makedoniatɔ, siwo nye Paulo hati mɔzɔlawo, la yi sesẽe. 30  Paulo ŋutɔ hã nɔ didim be yeayi ameha la dome, gake nusrɔ̃lawo meɖe mɔ nɛ o. 31  Azãwo kple hoʋiʋliwo dzi kpɔlawo dometɔ aɖewo kura gɔ̃ hã, siwo wɔa nu ɖe eŋu nyuie la, dɔ ame ɖe egbɔ, eye wote kukuɖeɖe nɛ be wòagatsɔ eɖokui ade afɔku me ava fefewɔƒea o. 32  Nya lae nye be, ame aɖewo nɔ ɣli dom be ale, eye bubuwo hã be ale; elabena zi tɔ le ƒuƒoƒe la, eye wo dometɔ akpa gãtɔ menya susu si ta wova ƒo ƒu ɖo o. 33  Eya ta wokplɔ Aleksandro do goe le ameha la dome, eye Yudatɔwo tu asii do ɖe ŋgɔ; eye Aleksandro wɔ asi na wo henɔ didim be yeaʋli ye ɖokui ta le ameawo ŋkume. 34  Gake esi wokpɔe dze sii be Yudatɔe wònye la, wo katã wonɔ ɣli dom anɔ gaƒoƒo eve sɔŋ be: “Efesotɔwo ƒe Artemis lae nye gã!” 35  Esi mlɔeba dudzikpɔla la na ameha la zi ɖoɖoe la, egblɔ be: “Efesotɔwo, ame kae le xexe sia me, si menya be Efesotɔwo ƒe du lae nye Artemis gã la kple nɔnɔmetata si ge tso dziƒo la ƒe gbedoxɔ dzi kpɔla o? 36  Eya ta esi ame aɖeke mate ŋu atsi tsitre ɖe nya siawo ŋu o ta la, esɔ be miadze akɔ anyi, eye miagawɔ naneke tamemabumabutɔe o. 37  Elabena miekplɔ ŋutsu siawo vae, ame siwo menye gbedoxɔmedzodalawo alo busunyagblɔlawo ɖe míaƒe mawunɔ la ŋu o. 38  Eya ta ne nya aɖe le Demetrio kple aɖaŋudɔwɔla siwo le eŋu la si ɖe ame aɖe ŋu la, nyadrɔ̃gbewo li, eye nutomegãdziɖulawo hã li; mina woatsɔ wo nɔewo nutsonyawo avae. 39  Gake ne nu bubu aɖe dimee miele la, ekema ƒuƒoƒe si le se nu lae atso nya me le eŋu. 40  Elabena afɔku li be, woate ŋu atsɔ nya ɖe mía ŋu be míehe zitɔtɔ va dua me le nya si dzɔ egbea ta, eye nya aɖeke meli si míate ŋu atsɔ aɖe mía ɖokui nu, le zitɔtɔ manyatalenu sia ŋuti o.” 41  Eye esi wògblɔ nya siawo la, ena ƒuƒoƒo la kaka.

Etenuŋɔŋlɔ