Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Dɔwɔwɔwo 18:1-28

18  Le nu siawo megbe la, edzo le Atene yi Korinto.  Eye wòkpɔ Yudatɔ aɖe si ŋkɔe nye Akwila, si nye Ponto vidzidzi, ame si tso Italia va eteƒe medidi o, kple Priskila, si nye srɔ̃a, le esi Klaudio de se be Yudatɔwo katã nadzo le Roma ta. Eya ta eyi wo gbɔ,  eye esi wònye dɔ ɖeka ƒomevie wowɔna ta la, edze woƒe aƒe me, eye wowɔa dɔ, elabena avɔgbadɔwɔlawoe wonye.  Ke hã, eƒoa nu le ƒuƒoƒe la le sabat ɖe sia ɖe dzi, eye wòna Yudatɔ kple Helatɔ geɖewo trɔ susu heva xɔ se.  Ke esi Sila kple Timoteo tso Makedonia va la, Paulo tsɔ nya la gbɔgblɔ ɖo dɔ koŋ, eye wònɔ ɖase ɖim na Yudatɔwo tsɔ ɖoa kpe edzi be Yesu ye nye Kristo la.  Gake esi woyi edzi nɔ tsitre tsim ɖe eŋu, eye wonɔa nya manyomanyowo gblɔm la, eʋuʋu eƒe awuwo, eye wògblɔ na wo be: “Miaƒe ʋu neva mia ŋutɔwo miaƒe ta dzi. Nye ya ŋutinye kɔ. Tso fifia heyina la, mayi dukɔwo me tɔwo gbɔ.”  Eya ta edzo le afi ma, eye wòyi ŋutsu aɖe si subɔa Mawu, si ŋkɔe nye Titio Yusto, si ƒe aƒe te ɖe ƒuƒoƒea ŋu la, ƒe aƒe me.  Gake Krispo, si nye ƒuƒoƒea dzi kpɔla la va xɔ Aƒetɔ la dzi se, eye eƒe aƒe blibo la hã xɔe se. Eye Korintotɔ geɖe siwo see la te edzixɔxɔse, eye wonyrɔ wo.  Gawu la, Aƒetɔ la gblɔ na Paulo le ŋutega me le zã me be: “Mègavɔ̃ o, ke boŋ yi edzi nànɔ nu ƒom, eye ɖoɖoe negazi le nuwò o, 10  elabena meli kpli wò, eye ame aɖeke madze dziwò be yeawɔ nuvevi wò o; elabena ame geɖewo le asinye le du sia me.” 11  Ale wònɔ afi ma ƒe ɖeka kple ɣleti ade, henɔ Mawu ƒe nya la fiam le wo dome. 12  Ke esime Galio nye nutomegãdziɖula le Axaya la, Yudatɔwo wɔ ɖeka tsi tsitre ɖe Paulo ŋu, eye wokplɔe yi ʋɔnudrɔ̃zikpui la gbɔ, 13  gblɔ be: “Ame sia wɔa nu tsia tsitre ɖe se la ŋu esi wònana amewo trɔa woƒe dzixɔse hesubɔa Mawu le mɔ bubu nu.” 14  Gake esi Paulo be yeake nu la, Galio gblɔ na Yudatɔwo be: “Oo, Yudatɔwo, ne nu gbegblẽ wɔwɔ alo nu tovo vɔ̃ɖi aɖee la, ekema magbɔ dzi ɖi asee na mi. 15  Gake ne nyawo kple ŋkɔwo kple miaƒe se la ŋuti nyaʋiʋliwoe la, ekema mia ŋutɔwo mikpɔ egbɔ. Nyemedi be manye nu siawo ƒe ʋɔnudrɔ̃la o.” 16  Ale wònya wo ɖa le ʋɔnudrɔ̃zikpui la gbɔ. 17  Tete wo katã wolé Sostene, si nye ƒuƒoƒea dzi kpɔla la, eye woƒoe le ʋɔnudrɔ̃zikpui la ŋgɔ. Gake Galio mede nu nya siawo katã me kura o. 18  Ke hã, le afi ma nɔnɔ ŋkeke aɖewo kpee megbe la, Paulo klã nɔviawo, eye wòɖo tɔdziʋu ɖo ta Siria, eye Priskila kple Akwila nɔ eŋu; ena wofɔ ɖa dzi nɛ le Kenxrea, le adzɔgbe aɖe si wòɖe ta. 19  Eye wova ɖo Efeso, eye wògblẽ wo ɖe afi ma; gake eya ŋutɔ ge ɖe ƒuƒoƒe la, eye wòdzro nu me kple Yudatɔwo. 20  Togbɔ be wonɔ kukuɖeɖe dzi nɛ be wòaganɔ yewo gbɔ vie hã la, melɔ̃ o, 21  ke boŋ eklã wo gblɔ be: “Ne Yehowa lɔ̃ la, magatrɔ ava mia gbɔ.” Eye wòɖo tɔdziʋu tso Efeso 22  eye wòva Kaisarea. Eye wòyi ɖado gbe na hame la, eye emegbe eyi Antioxia. 23  Eye esi wònɔ afi ma vie la, edzo yi Galatia nutoa kple Frigia ƒe teƒeteƒewo henɔ ŋusẽ dom nusrɔ̃lawo katã. 24  Ke Yudatɔ aɖe si ŋkɔe nye Apolo, si nye Aleksandria vidzidzi, si nye nuƒola bibi aɖe la va Efeso; eye wònya Ŋɔŋlɔawo nyuie. 25  Wofia nu ŋutsu sia le Yehowa ƒe mɔ la nu, eye esi gbɔgbɔ la yɔe fũu la, eyi ɖaƒo nu hefia nu tso Yesu ŋuti nyawo ŋu ɖe eteƒe tututu, gake Yohanes ƒe nyɔnyrɔnana ŋu nya koe wònya nyuie. 26  Eye ŋutsu sia te nuƒoƒo dzinɔameƒotɔe le ƒuƒoƒe la. Esi Priskila kple Akwila se eƒe nyawo la, wokplɔe ɖe wo ɖokui ŋu, eye woɖe Mawu ƒe mɔ la me nɛ nyuie wu. 27  Gawu la, esi wònɔ didim be yeayi Axaya ta la, nɔviawo ŋlɔ agbalẽ ɖo ɖe nusrɔ̃laawo, eye wode dzi ƒo na wo be woaxɔe nyuie. Ale, esi wòɖo afi ma la, ekpe ɖe ame siwo xɔe se le Mawu ƒe amenuveve ta la ŋu geɖe ŋutɔ; 28  elabena etsɔ ŋusẽ nɔ kpe ɖom edzi le dutoƒo be Yudatɔwo da ƒu, eye wòtsɔa Ŋɔŋlɔawo ɖenɛ fiana be Yesu ye nye Kristo la.

Etenuŋɔŋlɔ