Dzo kpo yi emenuwo dzi

Dzo kpo yi emenuawo dzi

Dɔwɔwɔwo 17:1-34

17  Azɔ wozɔ mɔ to Amfipoli kple Apolonia, eye wova ɖo Tesalonika, afi si Yudatɔwo ƒe ƒuƒoƒe aɖe nɔ.  Eye abe ale si Paulo wɔna ɖaa ene la, eyi ɖe eme le wo gbɔ, eye wòdzro Ŋɔŋlɔawo me kpli wo sabat etɔ̃ sɔŋ,  eye wònɔ nu me ɖem heyɔa nyawo tsɔ ɖoa kpe edzi be, ehiã be Kristo la nakpe fu, eye wòafɔ tso ame kukuwo dome, eye wònɔ gbɔgblɔm be: “Yesu sia si ŋu nya gblɔm mele na mi la, eyae nye Kristo la.”  Eya ta wo dometɔ aɖewo va zu xɔsetɔwo, eye wowɔ ɖeka kple Paulo kpakple Sila, eye Helatɔ siwo dea ta agu na Mawu la ƒe ha gã aɖe kple nyɔnu ŋkutatɔwo, menye ame ʋɛ aɖe o, hã wɔe nenema.  Gake esi Yudatɔwo ʋã ŋu ta la, wokplɔ ame vɔ̃ɖi aɖewo tso dɔ aɖeke mawɔla siwo nɔa asi me la dome kpe ɖe wo ɖokuiwo ŋu, eye ale woɖo gbevuha aɖe hede zitɔtɔ dua me. Eye wodze Yason ƒe aƒe dzi, eye wonɔ didim be yewoakplɔ wo ayi na ameha la.  Esi womekpɔ wo o la, wohe Yason kple nɔvi aɖewo yi dua me dziɖulawo gbɔ, eye wonɔ ɣli dom be: “Ame siawo, siwo de zi anyigba dzi tɔwo katã me la, va ɖo afi sia hã,  eye Yason xɔ wo hewɔ amedzro na wo. Ame siawo katã wɔa nu tsia tsitre ɖe Kaisaro ƒe ɖoɖowo ŋu, hegblɔna be fia bubu aɖe li, si nye Yesu.”  Nyateƒee, wona dzika tso ameha la kple dua me dziɖulawo ƒo esi wose nya siawo;  Eye esi woxɔ megbedaga agbɔsɔsɔme si hiã le Yason kple ame bubuwo si vɔ hafi woɖe mɔ na wo wodzo. 10  Enumake nɔviawo ɖo Paulo kple Sila siaa ɖe Beroia le zã me, eye esi wova ɖo la, woyi Yudatɔwo ƒe ƒuƒoƒe la. 11  Ke ame siawo ɖɔ ʋu wu ame siwo le Tesalonika, elabena wotso dzi me lɔ̃ faa xɔ nya la, eye wonɔa Ŋɔŋlɔawo me dzrom tsitotsito gbe sia gbe be nya siawo le nenema hã. 12  Eya ta wo dometɔ geɖewo zu xɔsetɔwo, eye nenema kee Hela nyɔnu ŋkutatɔwo kple ŋutsuwo hã xɔe se, menye ame ʋɛ aɖe o. 13  Gake esi Yudatɔ siwo le Tesalonika la se be Paulo nɔ gbeƒã ɖem Mawu ƒe nya le Beroia hã la, wova afi ma hã, be yewoade adã tame na ameawo ahade zi wo me. 14  Eye nɔviawo na Paulo dzo yi keke ƒu gome ke; gake Sila kple Timoteo ya tsi afi ma. 15  Ke hã, ame siwo nɔ Paulo ɖom ɖa la kplɔe va keke Atene ke, eye esi wòdɔ wo ɖe Sila kple Timoteo gbɔ, be woava ye gbɔ kaba la, wodzo. 16  Ke esi Paulo nɔ wo lalam le Atene la, eƒe gbɔgbɔ bi dzi le eme esi wòkpɔ be du la me yɔ fũu kple legbawo. 17  Eya ta ete numedzodzro kple Yudatɔwo le ƒuƒoƒe la, kpakple ame bubu siwo subɔa Mawu, eye wòdzroa nu me le asi me* gbe sia gbe kple ame siwo wòkpɔna le afi ma la hã. 18  Gake xexemenunyala siwo woyɔna be Epikurotɔwo kple Stoatɔwo dometɔ aɖewo va nɔ glãka hem kplii, eye wo dometɔ aɖewo nɔ gbɔgblɔm be: “Nu kae nukpoloeƒola sia di be yeagblɔ?” Bubuawo be: “Ewɔ abe dutamawuwo ŋuti gbeƒãɖela aɖee wònye ene.” Nu si tae nye be enɔ Yesu kple tsitretsitsi ŋuti nya nyui la gblɔm. 19  Eya ta wolée, eye wokplɔe yi Areopago la hegblɔ be: “Àte ŋu ana míanya nu si nufiafia yeye sia si ŋu nya gblɔm nèle la nye nyuiea? 20  Elabena èle nane siwo míaƒe towo mese kpɔ o la gblɔm. Eya ta míedi vevie be míanya nu si tututu nu siawo nye la nyuie.” 21  Le nyateƒe me la, Atenetɔwo kple amedzro siwo vaa afi ma la mezãa woƒe vovoɣiwo ɖe naneke ŋu tsɔ wu be woanɔ nya yeyewo gblɔm alo anɔ wo sem o. 22  Azɔ Paulo tsi tsitre ɖe Areopago la titina, eye wògblɔ be: “Atenetɔwo, mekpɔe be le nu sia nu me la, edze abe mievɔ̃a mawuwo ŋutɔ wu ame bubuwo ene. 23  Le kpɔɖeŋu me, esi menɔ tsa ɖim henɔ ŋku lém ɖe nu siwo miesubɔna ŋu nyuie la, mekpɔ vɔsamlekpui aɖe hã si ŋu woŋlɔ ɖo be ‘Mawu Si Womenya O La Tɔe.’ Eya ta nu si mienya o, hafi tsɔ mia ɖokui le enam la, eya ke ŋu nya gblɔm mele na mi. 24  Mawu si wɔ xexea kple nu siwo katã le eme, esi wònye dziƒo kple anyigba ƒe Aƒetɔe Ame sia nye ta la, menɔa gbedoxɔ siwo wotsɔ asi wɔ la me o, 25  eye menye ame ƒe asiwo hã wotsɔna subɔnɛ, abe ɖe nane le ehiãm ene o, elabena eya ŋutɔe naa agbe kple agbegbɔgbɔ kpakple nuwo katã ame sia ame. 26  Eye wòwɔ amewo ƒe dukɔ sia dukɔ tso ame ɖeka me, be woanɔ anyigba blibo la dzi, eye wòɖo ɣeyiɣi ɖoɖiwo kple amegbetɔwo nɔƒewo ƒe liƒowo ɖi, 27  bene woadi Mawu, ne ɖe woatsa asi adii kura gɔ̃ hã, ne woake ɖe eŋu vavã, togbɔ be le nyateƒe me la, mele adzɔge tso mía dometɔ aɖeke gbɔ hafi o. 28  Elabena eya dzie míeto le agbe, eye míeʋãna, eye míeli, abe ale si mia dome hakpanyaŋlɔla aɖewo kura gɔ̃ hã gblɔe ene be: ‘Elabena eƒe viwoe míawo hã míenye.’ 29  “Eya ta esi míenye Mawu ƒe viwo ta la, mele be míasusu be mawunyenye la le abe sika alo klosalo alo kpe ene o, eye mele abe nane si ƒe nɔnɔme wokpa to amegbetɔ ƒe aɖaŋu kple tamesusu dzi la ene o. 30  Nyateƒee, Mawu ŋe aɖaba ƒu numanyamanya ƒe ɣeyiɣi mawo dzi, gake azɔ la, ele gbɔgblɔm na amegbetɔwo le afi sia afi be ele be wo katã woatrɔ dzi me. 31  Elabena eɖo ŋkeke aɖe ɖi, si dzi wòɖo tame be yeadrɔ̃ ʋɔnu anyigba dzi tɔwo katã le dzɔdzɔenyenye me to ŋutsu aɖe si wòɖo la dzi, eye wòna eŋuti kpeɖodzi amewo katã to efɔfɔ ɖe tsitre tso ame kukuwo dome me.” 32  Ke esi wose tsitretsitsi tso ame kukuwo dome ŋuti nya la, wo dometɔ aɖewo te fewuɖuɖu, gake bubuwo gblɔ be: “Míagase nu le nya sia ŋu tso gbɔwò ɣebubuɣi.” 33  Ale Paulo dzo le wo dome, 34  gake ŋutsu aɖewo va wɔ ɖeka kplii, eye wozu xɔsetɔwo; ame siawo dometɔ aɖewoe nye Dionisio, si nye ʋɔnudrɔ̃la le Areopago la, kple nyɔnu aɖe si ŋkɔe nye Damaris, kpakple ame bubu siwo kpe ɖe wo ŋu.

Etenuŋɔŋlɔ

Eganye afi si hã amewo va kpea ta le.