Dzo kpo yi emenuwo dzi

Dzo kpo yi emenuawo dzi

Dɔwɔwɔwo 16:1-40

16  Ale wòva ɖo Derbe kple Listra hã. Eye kpɔ ɖa! Nusrɔ̃la aɖe nɔ afi ma, si ŋkɔe nye Timoteo, Yuda nyɔnu aɖe si nye xɔsetɔ la ƒe viŋutsu, gake fofoa nye Helatɔ,  eye nɔvi siwo le Listra kple Ikonio la ƒo nu nyui tso eŋu.  Paulo ɖee gblɔ be yedi be ame sia nayi kpli ye, eye wòxɔe hetso aʋa nɛ le Yudatɔ siwo le teƒe mawo ta, elabena wo katã wonya be Helatɔe fofoa nye.  Ke esi wonɔ duawo me tom la, wotsɔa nyametsotso siwo apostoloawo kple hamemetsitsi siwo le Yerusalem wɔ la ŋuti ɖoɖoawo naa wo, be woalé wo me ɖe asi.  Ale, le nyateƒe me la, hameawo yi edzi sẽ ŋu le xɔse me, eye woƒe xexlẽme nɔ dzidzim ɖe edzi tso ŋkeke yi ŋkeke.  Gawu la, woto Frigia kple Galatia nuto me, elabena gbɔgbɔ kɔkɔe la gbe na wo be woagagblɔ nya la le Asia nutoa me o.  Eye esi wova ɖo Misia la, wodze agbagba be yewoayi Bitinia, gake Yesu ƒe gbɔgbɔ la meɖe mɔ na wo o.  Eya ta woto Misia ŋu yi Troa.  Eye le zã me la, Paulo kpɔ ŋutega aɖe: Makedonia ŋutsu aɖe nɔ tsitre nɔ kuku ɖem nɛ vevie be: “Tso ƒu va Makedonia, ne nàkpe ɖe mía ŋu.” 10  Ke esi wòkpɔ ŋutega la teti ko la, míedi be míayi Makedonia, elabena míeƒo nya ta be Mawue yɔ mí be míagblɔ nya nyui la na wo. 11  Eya ta míeɖo tɔdziʋu tso Troa, eye míezɔ tẽe va Samotrake, gake le ŋkeke si kplɔe ɖo dzi la, míeva Neapoli, 12  eye tso afi ma míeva Filipi, si nye du aɖe si le Roma te, eye wònye Makedonia nutoa ƒe du vevitɔ. Míenɔ du sia me ŋkeke aɖewo. 13  Eye le sabat ŋkeke dzi la, míedo go tso agboa nu yi tɔsisi aɖe to, afi si míesusu be gbedoɖaƒe aɖe le; eye míenɔ anyi hete nuƒoƒo na nyɔnu siwo va ƒo ƒu la. 14  Eye nyɔnu aɖe si ŋkɔe nye Lidia, si nye aɖabɛdzrala, tso Tiatira dua me, eye wònye mawusubɔla la, nɔ to ɖom, eye Yehowa ʋu eƒe dzi gbadzaa be wòalé to ɖe nya siwo gblɔm Paulo nɔ la ŋu. 15  Ke esi eya kple eƒe aƒe la xɔ nyɔnyrɔ la, eɖe kuku vevie gblɔ be: “Ne miebum be menye nyateƒetɔ na Yehowa la, ekema miva aƒenye me, eye miatsi afi ma.” Eye wòƒoe ɖe mía nu míege ɖe eme. 16  Eye wòva eme be, esi míenɔ gbedoɖaƒe la yim la, dɔlanyɔnuvi aɖe si me gbɔgbɔ aɖe, si nye afakaka ƒe gbɔgbɔ vɔ̃ aɖe, nɔ la va kpe mí. Etoa eƒe nukaka la dzi wɔa ga geɖe na eƒe aƒetɔwo. 17  Nyɔnuvi sia nɔ mía kple Paulo yome, eye wònɔ ɣli dom nɔ gbɔgblɔm be: “Ame siawo nye Mawu Dziƒoʋĩtɔ la ƒe kluviwo, siwo le xɔxɔmɔ la gblɔm fia mi.” 18  Enɔ esia wɔwɔ dzi ŋkeke geɖe. Mlɔeba eva glo Paulo, eye wòtrɔ hegblɔ na gbɔgbɔ la be: “Mele gbe ɖem na wò le Yesu Kristo ƒe ŋkɔ me be nàdo go le eme.” Eye wòdo go le gaƒoƒo ma tututu dzi. 19  Ke esi eƒe aƒetɔwo kpɔ be yewobu yewoƒe gakpɔmɔnua la, wolé Paulo kple Sila, eye wohe wo yi asi me* ɖe dziɖulawo gbɔ, 20  eye esi wokplɔ wo yi dumegãwo gbɔ la, wogblɔ be: “Ame siawo le zitɔtɔ hem va míaƒe dua me ŋutɔ; Yudatɔwo wonye, 21  eye wole nu ƒom tso kɔ siwo se meɖe mɔ na mí be míaxɔ alo anyi o la ŋu, le esi wònye Romatɔwo ye míenye ta.” 22  Eye ameha la tsi tsitre ɖe wo ŋu ɖekae; eye esi dumegãwo vuvu woƒe awudziwuiwo le wo ŋu vɔ la, woɖe gbe be woaƒo wo kple ati. 23  Esi woƒo wo vevie vɔ la, wode wo gaxɔ me, eye wode se na gaxɔdzikpɔla la be wòadzɔ wo ŋu nyuie. 24  Esi wode se nɛ alea ta la, etsɔ wo de gaxɔ ememetɔ la me, eye wòde ga woƒe afɔwo ɖe atikpo siwo me woɖe do ɖo la me sesĩe. 25  Gake le zã titina lɔƒo la, Paulo kple Sila nɔ gbe dom ɖa henɔ ha dzim nɔ Mawu kafum; ɛ̃, gamenɔlawo nɔ wo ŋkɔ sem. 26  Kasia anyigba ʋuʋu sesĩe, ale be gaxɔa ƒe anyinɔwo ʋuʋu. Gawu la, ʋɔtruawo katã ʋu enumake, eye wo katã ƒe bablawo tu. 27  Esi gaxɔdzikpɔla la nyɔ tso alɔ̃ me hekpɔ be gaxɔa ƒe ʋɔtruwo nɔ ʋuʋu la, eɖe eƒe yi be yeawu ye ɖokui, elabena esusu be gamenɔlaawo si. 28  Gake Paulo do ɣli gblɔ be: “Mègawɔ nuvevi ɖokuiwò o, elabena mí katã míele afii!” 29  Eya ta ebia be woatsɔ akaɖiwo avae, eye wòƒu du ge ɖe eme, eye wònɔ ƒoƒom kpakpakpa va bɔbɔ ɖe Paulo kple Sila ŋkume. 30  Eye wòkplɔ wo do goe gblɔ be: “Aƒetɔwo, nu kae wòle be mawɔ be makpɔ ɖeɖe?” 31  Wogblɔ be: “Xɔ Aƒetɔ Yesu dzi se, eye mia kple wò aƒe la miakpɔ ɖeɖe.” 32  Eye wogblɔ Yehowa ƒe nya la na eya kple ame siwo katã le eƒe aƒe me. 33  Eye wòkplɔ wo le zã ƒe gaƒoƒo ma me, eye wòklɔ woƒe abiawo; eye wonyrɔ wo katã, eya kple etɔwo, heheɖemegbe manɔmee. 34  Eye wòkplɔ wo va eƒe aƒe me, eye wòɖo kplɔ̃ na wo, eye wòkpɔ dzidzɔ geɖe kple eƒe aƒe blibo la le esi wòxɔ Mawu dzi se azɔ ta. 35  Esi ŋu ke la, dumegãwo dɔ atikplɔtɔwo ɖa be woagblɔ be: “Ðe asi le ame mawo ŋu.” 36  Eya ta gaxɔdzikpɔla la va gblɔ woƒe nyawo na Paulo be: “Dumegãwo dɔ ame ɖa be maɖe asi le mi ame evea ŋu. Eya ta azɔ la, mido go, eye midzo yi le ŋutifafa me.” 37  Gake Paulo gblɔ na wo be: “Woƒo mí, ame siwo nye Romatɔwo, le dutoƒo evɔ womedrɔ̃ ʋɔnu mí hebu fɔ mí hafi o, eye wode mí gaxɔ me; eye azɔ ɖe wole asi ɖem le mía ŋu le adza mea? Gbeɖe! Ke boŋ woawo ŋutɔwo neva kplɔ mí do goe.” 38  Eya ta atikplɔtɔawo yi ɖaka nya siawo ta na dumegãwo. Vɔvɔ̃ ɖo ame siawo esi wose be Romatɔwoe ameawo nye. 39  Eya ta wova, eye woɖe kuku na wo vevie, eye esi wokplɔ wo do goe vɔ la, wobia tso wo si be woadzo le dua me. 40  Gake wodo go le gaxɔa me, eye woyi Lidia ƒe aƒe me, eye esi wokpɔ nɔviawo la, wode dzi ƒo na wo, eye wodzo.

Etenuŋɔŋlɔ

Eganye afi si hã amewo va kpea ta le.