Dzo kpo yi emenuwo dzi

Dzo kpo yi emenuawo dzi

Dɔwɔwɔwo 15:1-41

15  Eye ame aɖewo tso Yudea va, eye wote nufiafia nɔviawo be: “Ne wometso aʋa na mi le Mose ƒe kɔa nu o la, miate ŋu akpɔ ɖeɖe o.”  Gake esi menye nyaʋiʋli kple nyahehe vi aɖee wònye ɖo wo kpakple Paulo kple Barnaba dome o ta la, wowɔ ɖoɖo be Paulo kple Barnaba kpakple wo dometɔ aɖewo nayi apostoloawo kple hamemetsitsiawo gbɔ le Yerusalem le nyaʋiʋli sia ta.  Ale, esi hame la va ɖo wo ɖa vie vɔ la, ŋutsu siawo yi woƒe mɔzɔzɔa dzi to Foinike kple Samaria, eye wonɔ dukɔwo me tɔwo ƒe dzimetɔtrɔ ta kam tsitotsito, eye wona dzi dzɔ nɔviawo ŋutɔ.  Esi wova ɖo Yerusalem la, hame la kple apostoloawo kpakple hamemetsitsiawo xɔ wo nyuie, eye woka nu geɖe siwo Mawu wɔ to wo dzi la ta.  Ke hã, ame siwo tso Farisitɔwo ƒe kɔmama la me, siwo va xɔ se la, dometɔ aɖewo tso le woƒe ziwo dzi gblɔ be: “Ehiã be woatso aʋa na wo, eye woade se na wo be woawɔ Mose ƒe se la dzi.”  Eye apostoloawo kple hamemetsitsiawo va kpe ta, be yewoakpɔ nya sia me ɖa.  Ke esi woʋli nya la ʋuu la, Petro tso hegblɔ na wo be: “Ŋutsuwo, nɔviwo, mienyae nyuie be tso gɔmedzedzea me ke la, Mawu wɔ tiatia le mia dome be, dukɔwo me tɔwo nato nye nu dzi ase nya nyui la ƒe nya la ahaxɔ ase;  eye Mawu, ame si nya dziwo me la, ɖi ɖase esi wòna gbɔgbɔ kɔkɔe wo, abe ale si wòna míawo hã ene.  Eye mede vovototo aɖeke kura mía kpli wo dome o, ke boŋ ekɔ woƒe dzi ŋu to xɔse me. 10  Eya ta azɔ la, nu ka tae miele Mawu dom kpɔ, to kɔkuti si mía tɔgbuiwo alo mía ŋutɔwo míete ŋu tsɔ o la dede kɔ na nusrɔ̃laawo dzi? 11  Ke boŋ míeka ɖe edzi be woaɖe mí to mía Aƒetɔ Yesu ƒe amenuveve la dzi abe ame mawo ke ene.” 12  Ale ameha blibo la katã zi ɖoɖoe, eye woɖo to se ale si Barnaba kple Paulo gblɔ dzesi kple nukunu geɖe siwo Mawu wɔ to wo dzi le dukɔwo dome la ŋuti nya. 13  Esi wodzudzɔ nuƒoƒo la, Yakobo ɖo eŋu gblɔ be: “Ŋutsuwo, nɔviwo, miɖo tom. 14  Simeon gblɔe eme kɔ nyuie, ale si Mawu trɔ susu ɖe dukɔwo ŋu zi gbãtɔ, be yeaɖe dukɔ aɖe tso wo dome hena yeƒe ŋkɔ la. 15  Eye Nyagblɔɖilawo ƒe nyawo wɔ ɖeka kple esia, abe ale si tututu woŋlɔe ɖi ene be: 16  ‘Le nu siawo megbe la, matrɔ ava, eye magbugbɔ David ƒe agbadɔ si mu la atu; eye magbugbɔ aɖɔ eƒe gbagbãƒewo ɖo, eye magafɔe ɖe te, 17  ale be ame siawo dometɔ siwo susɔ la kple dukɔwo me tɔwo katã, ame siwo ŋu woyɔ nye ŋkɔ ɖo la, nadi Yehowa vevie; Yehowa, ame si le nu siawo wɔm, ye gblɔe, 18  nu siawo siwo wonya tso keke blema ke.’ 19  Eya ta nye nyametsotso lae nye be, míagaɖe fu na dukɔwo me tɔ siwo le tɔtrɔm ɖe Mawu ŋu la o, 20  ke boŋ be míaŋlɔ na wo be woatsri nu siwo trɔ̃wo ƒo ɖii, kple agbe gbegblẽ nɔnɔ, kple lã tsiʋumewo kpakple ʋu. 21  Elabena tso blema ke la, amewo nɔ Mose si le du sia du me, siwo ɖea gbeƒãe, elabena woxlẽnɛ wosena le ƒuƒoƒewo le sabat ɖe sia ɖe dzi.” 22  Tete apostoloawo kple hamemetsitsiawo kpakple hame blibo la katã da asi ɖe edzi be yewoatia ŋutsuwo tso yewo dome akpe ɖe Paulo kple Barnaba ŋu aɖo ɖe Antioxia; ame siawoe nye Yuda si wogayɔna be Barsaba kple Sila, siwo nye ŋgɔxɔlawo le nɔviawo dome; 23  eye woŋlɔ de wo si be: “Apostoloawo kple hamemetsitsiawo, siwo nye mia nɔviwo, le agbalẽ sia ŋlɔm na mi nɔvi siwo le dukɔwo dome le Antioxia kple Siria kpakple Kilikia: Míedo gbe na mi! 24  Esi míese be ame aɖewo tso mía dome tsɔ nya aɖewo va tɔtɔ mi, eye wonɔ didim be yewoanyama miaƒe luʋɔwo, evɔ míena mɔfiame aɖeke wo o, ta la, 25  mí katã míelɔ̃ ɖe edzi, eye míeda asi ɖe edzi be míatia ŋutsu aɖewo akpe ɖe míaƒe lɔlɔ̃tɔ siwo nye Barnaba kple Paulo ŋu aɖo ɖe mi, 26  ŋutsu siwo tsɔ woƒe luʋɔwo na ɖe mía Aƒetɔ Yesu Kristo ƒe ŋkɔ la ta. 27  Eya ta míele Yuda kple Sila dɔm ɖe mia gbɔ, bene woawo hã woagblɔ nya mawo ke na mi kple nu. 28  Elabena gbɔgbɔ kɔkɔe la kple mía ŋutɔwo hã míeda asi ɖe edzi be míagatsɔ agba bubuwo akpee na mi, wu nu siawo siwo le vevie la ko o: 29  be miayi edzi atsri nu siwo wotsɔ sa vɔ na trɔ̃wo, kple ʋu kple lã tsiʋumewo kpakple agbe gbegblẽ nɔnɔ. Ne miekpɔ mia ɖokui dzi nyuie le nu siawo ŋu la, ekema eme anyo na mi. Minɔ anyi sesĩe!” 30  Ale, esi wodo mɔ ŋutsu siawo la, woyi Antioxia, eye woƒo ameha gã la nu ƒu ɖekae, eye wotsɔ agbalẽ la na wo. 31  Esi woxlẽe vɔ la, wokpɔ dzidzɔ le dzideƒonya sia ta. 32  Eye esi wònye Yuda kple Sila ŋutɔ hã nye nyagblɔɖilawo ta la, woƒo nuƒo geɖe tsɔ de dzi ƒo na nɔviawo, eye wodo ŋusẽ wo. 33  Eya ta esi wonɔ afi ma ɣeyiɣi aɖe megbe la, nɔviawo do mɔ wo le ŋutifafa me be woatrɔ ayi ame siwo dɔ wo ɖa la gbɔ. 34  * —— 35  Ke hã, Paulo kple Barnaba yi edzi nɔ Antioxia ɣeyiɣi aɖe, nɔ nu fiam, eye woa kple ame bubu geɖewo nɔ Yehowa ƒe nya la ŋuti nya nyui la gblɔm. 36  Ke le ŋkeke aɖewo megbe la, Paulo gblɔ na Barnaba be: “Na míadze agbagba godoo atrɔ ayi aɖasrã nɔviawo kpɔ le du sia du si me míeɖe gbeƒã Yehowa ƒe nya le la me, ne míakpɔ ale si wole ɖa.” 37  Barnaba ya ɖoe kplikpaa be yewoakplɔ Yohanes, si woyɔna be Marko, hã ɖe asi. 38  Gake Paulo ya mebui be esɔ be yewoakplɔ ame sia ɖe asi o, elabena etrɔ le wo yome le Pamfilia, eye meyi ɖawɔ dɔ kpli wo o. 39  Ale woʋli nya kpli wo nɔewo dzikutɔe, si wɔe be woma le wo nɔewo ŋu; ale Barnaba kplɔ Marko ɖe asi, eye woɖo tɔdziʋu yi Kipro. 40  Paulo ya tia Sila, eye esi nɔviawo tsɔe de Yehowa ƒe amenuveve la si vɔ la, edzo. 41  Gake eyi ɖato Siria kple Kilikia, nɔ ŋusẽ dom hameawo.

Etenuŋɔŋlɔ