Dzo kpo yi emenuwo dzi

Dzo kpo yi emenuawo dzi

Dɔwɔwɔwo 11:1-30

11  Ke apostoloawo kple nɔvi siwo nɔ Yudea la se be dukɔwo me tɔwo hã xɔ Mawu ƒe nya la.  Eya ta esi Petro va Yerusalem la, aʋatsotso dzi delawo te nyahehe kplii,  gblɔ be eyi ame siwo wometso aʋa na o la ƒe aƒe me, eye wòɖu nu kpli wo.  Tete Petro dze egɔme heɖe nya bliboa me na wo, gblɔ be:  “Menɔ Yopa dua me nɔ gbe dom ɖa, eye le ŋutega me la, mekpɔ wonɔ agba ƒomevi aɖe ɖiɖim ɖe anyi abe aklala gã aɖe si ƒe to eneawo wolé nɔ ɖiɖim tso dziƒo ɖe anyigba ene, eye wòzɔ tẽe va gbɔnye.  Esi mekpɔ eme la, menɔ ŋku lém ɖe eŋu, eye mekpɔ anyigba dzi lãfɔnewo kple lã wɔadãwo kple nu siwo tana kpakple dziƒoxewo.  Mese gbe aɖe hã wògblɔ nam be: ‘Petro, tso, wu wo nàɖu!’  Gake megblɔ be: ‘Gbeɖe, Aƒetɔ, elabena nu makɔmakɔ kple nu ƒoɖi aɖeke mege ɖe nye nu me kpɔ o.’  Gbe si tso dziƒo la ɖo eŋu zi evelia gblɔ be: ‘Wò la, dzudzɔ nu siwo ŋuti Mawu kɔ la yɔyɔ be nu makɔmakɔ.’ 10  Nu sia gadzɔ zi etɔ̃lia, eye wogahe nu sia nu dzoe yi dziƒo. 11  Eye kpɔ ɖa! Le ɣeyiɣi ma tututu me la, ŋutsu etɔ̃ nɔ tsitre ɖe aƒe si me míenɔ la nu; wodɔ wo tso Kaisarea ɖe gbɔnye. 12  Eya ta gbɔgbɔ la gblɔ nam be mayi kpli wo, be magake ɖi kura o. Gake nɔvi ade siawo hã yi kplim, eye míege ɖe ŋutsua ƒe aƒe me. 13  “Eka eta na mí, ale si wòkpɔ mawudɔla la wòtsi tsitre ɖe eƒe aƒe me gblɔ be: ‘Dɔ ame ɖo ɖe Yopa, ɖe Simon si wogayɔna be Petro la gbɔ, 14  eye agblɔ nu siwo ana mia kple wò aƒe blibo la miakpɔ ɖeɖe la na wò.’ 15  Gake esi mete nuƒoƒo la, gbɔgbɔ kɔkɔe la va wo dzi, abe ale si wòva míawo hã dzi le gɔmedzedzea mee ene. 16  Esia na meɖo ŋku Aƒetɔ la ƒe nya dzi, ale si wòlɔ̃a gbɔgblɔ be: ‘Yohanes tsɔ tsi na nyɔnyrɔe, gake woanyrɔ miawo ya ɖe gbɔgbɔ kɔkɔe me.’ 17  Eya ta ne Mawu tsɔ nunana faa ma ke na woawo hã, abe ale si wòna mí ame siwo xɔ Aƒetɔ Yesu Kristo dzi se la hã ene ɖe, ame kae menye, be maxe mɔ na Mawu?” 18  Ke esi wose nya siawo la, wolɔ̃ ɖe edzi, eye wodo Mawu ɖe dzi gblɔ be: “Ekema Mawu na mɔnukpɔkpɔ dukɔwo me tɔwo hã be woatrɔ dzi me, hena agbekpɔkpɔ.” 19  Eya ta ame siwo ka hlẽ le xaxa si va le Stefano ta la yi keke Foinike kple Kipro kpakple Antioxia ke, gake womenɔ nya la gblɔm na ame aɖeke o, negbe Yudatɔwo ɖeɖe ko. 20  Ke hã, ame aɖewo le wo dome siwo tso Kipro kple Kirene va Antioxia, eye wote nuƒoƒo na Helagbe dolawo, eye wonɔ Aƒetɔ Yesu ƒe nya nyui la gblɔm. 21  Gawu la, Yehowa ƒe asi nɔ kpli wo, eye ame geɖe siwo va zu xɔsetɔwo la trɔ ɖe Aƒetɔ la ŋu. 22  Wo ŋuti nya ɖo hame si nɔ Yerusalem la ƒe to me, eye wodɔ Barnaba ɖo ɖe keke Antioxia ke. 23  Esi wòva ɖo hekpɔ Mawu ƒe amenuvevea la, dzi dzɔe ŋutɔ, eye wòte dzidedeƒo na wo katã be woayi edzi aɖoe kplikpaa le woƒe dzi me be yewoanɔ Aƒetɔ la me; 24  elabena ame nyui wònye, eye wòyɔ fũu kple gbɔgbɔ kɔkɔe kpakple xɔse. Eye wotsɔ ameha gã aɖe kpe ɖe Aƒetɔ la ŋu. 25  Eye wòdzo yi Tarso yi Saul di ge tsitotsito, 26  eye esi wòkpɔe la, ekplɔe va Antioxia. Ale wòdzɔe be ƒe ɖeka sɔŋ woƒo ƒu kpli wo le hamea me, eye wofia nu ameha gã aɖe, eye Antioxia ye Mawu na woyɔ nusrɔ̃lawo le zi gbãtɔ be Kristotɔwo. 27  Ke le ŋkeke mawo me la, nyagblɔɖilawo tso Yerusalem va Antioxia. 28  Wo dometɔ ɖeka, si ŋkɔe nye Agabo la, tsi tsitre, eye wògblɔ to gbɔgbɔ la dzi be eteƒe madidi o, dɔ gã aɖe ato le anyigba blibo la katã dzi; eye esia va eme vavã le Klaudio ƒe ɣeyiɣia me. 29  Eya ta nusrɔ̃lawo ɖoe kplikpaa, wo dometɔ ɖe sia ɖe ale si wòate ŋui, be yewoawɔ kpekpeɖeŋudɔ to nane ɖoɖo ɖe nɔvi siwo le Yudea la dzi; 30  nu siae wowɔ, eye woɖoe ɖe hamemetsitsiawo to Barnaba kple Saul si me.

Etenuŋɔŋlɔ