Dzo kpo yi emenuwo dzi

Dzo kpo yi emenuawo dzi

Dɔwɔwɔwo 10:1-48

10  Ke le Kaisarea la, ŋutsu aɖe nɔ anyi, si ŋkɔe nye Kornelio, ame si nye asrafoha si woyɔna be Italia srafoha la ƒe aʋafia,  edoa vevie mawusubɔsubɔ, eye wòvɔ̃a Mawu kple eƒe aƒe blibo la, eye wònaa nu geɖewo ame dahewo, eye wònɔa kokoƒoƒo dzi na Mawu ɣesiaɣi.  Le ŋkekea ƒe gaƒoƒo asiekelia* lɔƒo me la, ekpɔ mawudɔla aɖe gaglãa le ŋutega me wòva egbɔ gblɔ nɛ be: “Kornelio!”  Ŋutsu la kpɔe gãa, eye esi vɔvɔ̃ ɖoe la, egblɔ be: “Nu kae, Aƒetɔ?” Egblɔ nɛ be: “Wò gbedodoɖawo kple wò nunana ame dahewo ɖo Mawu gbɔ abe ŋkuɖodzinu ene.  Eya ta dɔ ŋutsuwo ɖo ɖe Yopa ne woayɔ Simon, si wogayɔna be Petro la avae.  Ŋutsu sia dze Simon aɖe, si nye lãgbalẽwɔla, si ƒe aƒe le ƒua nu, la gbɔ.”  Esi mawudɔla si ƒo nu kplii la dzo teti ko la, eyɔ eƒe aƒemesubɔvi eve kpe ɖe asrafo siwo dzɔa eŋu ɣesiaɣi la dometɔ ɖeka si doa vevie mawusubɔsubɔ la ŋu,  eye wòka nya sia nya ta na wo hedɔ wo ɖo ɖe Yopa.  Esime wonɔ woƒe mɔzɔzɔa dzi, eye wogogo dua le ŋkeke si kplɔe ɖo dzi la, Petro yi xɔ ta le gaƒoƒo adelia* lɔƒo me, be yeado gbe ɖa. 10  Gake dɔ nɔ ewum vevie, eye wòdi be yeaɖu nu. Esime wonɔ eɖam la, ekpɔ ŋutega aɖe, 11  eye wòkpɔ dziƒo nu ʋu, eye wonɔ agba ƒomevi aɖe ɖiɖim ɖe anyi abe aklala gã aɖe si ƒe to eneawo wolé nɔ ɖiɖim ɖe anyigba ene; 12  eye lãfɔne ƒomeviwo katã kple nu siwo tana le anyigba dzi kpakple dziƒoxewo nɔ eme. 13  Eye gbe aɖe va nɛ be: “Petro, tso, wu wo nàɖu!” 14  Gake Petro gblɔ be: “Gbeɖe, Aƒetɔ, elabena nyemeɖu nu makɔmakɔ kple nu ƒoɖi aɖeke kpɔ o.” 15  Eye gbea gagblɔ nɛ zi evelia be: “Wò la, dzudzɔ nu siwo ŋuti Mawu kɔ la yɔyɔ be nu makɔmakɔ.” 16  Nu sia dzɔ zi etɔ̃lia, eye enumake wokɔ agba la dzoe yi dziƒo. 17  Ke esi Petro tɔtɔ le eɖokui me le nu si ŋutega si wòkpɔ la ate ŋu afia ŋu la, kpɔ ɖa! Ŋutsu siwo Kornelio dɔ la bia Simon ƒe aƒe ta se, eye wova tɔ ɖe agboa nu. 18  Eye wokɔ gbe dzi yɔ hebia be ɖe Simon si wogayɔna be Petro la dze afi ma hã. 19  Esi Petro nɔ tame bum tso ŋutega la ŋu la, gbɔgbɔ la gblɔ be: “Kpɔ ɖa! Ŋutsu etɔ̃ le diwòm. 20  Wò ya tso, ɖi, eye nàyi kpli wo, mègake ɖi kura o, elabena nyee dɔ wo.” 21  Ale Petro ɖi yi ŋutsuawo gbɔ gblɔ be: “Kpɔ ɖa! Nyee nye ame si dim miele. Nu ka tae mieva ɖo?” 22  Wogblɔ be: “Mawudɔla kɔkɔe aɖe na Mawu ƒe mɔfiame aʋafia Kornelio, ame si nye ame dzɔdzɔe kple mawuvɔ̃la, eye Yuda dukɔ blibo la ƒoa nu nyui tso eŋu la be, wòadɔ ame ɖe gbɔwò be nàva yeƒe aƒe me, ne wòase nya siwo nàgblɔ.” 23  Eya ta ena woge ɖe eme, eye wòwɔ amedzro na wo. Le ŋkeke si kplɔe ɖo dzi la, etso heyi kpli wo, eye nɔvi siwo le Yopa la dometɔ aɖewo yi kplii. 24  Le ŋkeke si gakplɔe ɖo dzi la, ege ɖe Kaisarea. Kornelio ya nɔ mɔ kpɔm na wo, eye wòyɔ eƒe ƒometɔwo kple xɔlɔ̃ veviwo ƒo ƒu. 25  Esi Petro ge ɖe eme la, Kornelio va kpee, eye wòdze klo ɖe eƒe afɔ nu hebɔbɔ nɛ. 26  Gake Petro fɔe ɖe dzi gblɔ be: “Tso; nye ŋutɔ hã amee menye.” 27  Eye esi wònɔ dze ɖom kplii la, ege ɖe eme, eye wòkpɔ ame gbogbo aɖewo ƒo ƒu ɖi, 28  eye wògblɔ na wo be: “Mia ŋutɔwo mienyae nyuie, ale si mele se nu be Yudatɔ nawɔ ɖeka kple dukɔ bubu me tɔ alo ate ɖe eŋu o; ke hã, Mawu ɖee fiam be mele be mayɔ ame aɖeke be ame makɔmakɔ alo ame ƒoɖi o. 29  Esia tae esi wodɔ ame ɖem la, nyemeʋli nya aɖeke hafi va o. Eya ta medi be manya susu si ta miedɔ ame ɖem ɖo.” 30  Eye Kornelio gblɔ be: “Ne mebui tso gaƒoƒo sia dzi la, ke egbee nye ŋkeke eneagbe, esi menɔ gbe dom ɖa le nye aƒe me le gaƒoƒo asiekelia* dzi, eye kasia, ŋutsu aɖee nye ema le awu siwo le dzo dam me tsi tsitre ɖe ŋgɔnye, 31  eye wògblɔ be: ‘Kornelio, wose wò gbedodoɖa, eye Mawu ɖo ŋku wò nunana ame dahewo dzi. 32  Eya ta dɔ ame ɖe Yopa ne woayɔ Simon si wogayɔna be Petro la avae. Ŋutsu sia dze Simon si nye lãgbalẽwɔla ƒe aƒe me le ƒua nu.’ 33  Eya ta medɔ ame ɖe wò enumake, eye èwɔe nyuie be nèva. Eya ta fifia mí katã míele afii le Mawu ŋkume, be míase nu siwo katã ƒe se Yehowa de na wò be nàgblɔ.” 34  Tete Petro ke nu gblɔ be: “Vavãe, mekpɔe dze sii be Mawu mekpɔa ame ŋkume o, 35  ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu. 36  Eɖo nya la ɖe Israel viwo be woagblɔ ŋutifafa nya nyui la na wo to Yesu Kristo dzi: Ame siae nye ame bubuwo katã ƒe Aƒetɔ. 37  Mienya nu si ŋu nya gblɔm wonɔ le Yudea blibo la, si gɔme wodze tso Galilea le Yohanes ƒe gbeƒãɖeɖe nyɔnyrɔxɔxɔ vɔ megbe, 38  si ku ɖe Yesu si tso Nazaret ŋu, ale si Mawu tsɔ gbɔgbɔ kɔkɔe kple ŋusẽ si ami nɛ, eye wòyi ɖato anyigba blibo la katã dzi nɔ nyui wɔm henɔ dɔ dam na ame siwo katã Abosam te ɖe anyi la; elabena Mawu nɔ kplii. 39  Eye míawoe nye nu siwo katã wòwɔ le Yudatɔwo ƒe dukɔa kple Yerusalem siaa me la ŋuti ɖasefowo; gake wowui hã to ehehe ɖe ati ŋu me. 40  Mawu fɔ Ame sia ɖe tsitre le ŋkeke etɔ̃agbe, eye wòna mɔnukpɔkpɔe be wòɖe eɖokui fia, 41  menye na amewo katã o, ke boŋ ɖasefo siwo Mawu tia do ŋgɔ, mí, ame siwo ɖu nu heno nu kplii le eƒe fɔfɔ tso ame kukuwo dome la megbe. 42  Ede se hã na mí be míaɖe gbeƒã na amewo, eye míaɖi ɖase tsitotsito be Ame sia ye Mawu ɖo be wòanye agbagbeawo kple kukuawo siaa ƒe ʋɔnudrɔ̃la. 43  Eyama ŋutie nyagblɔɖilawo katã ɖi ɖase le, be ame sia ame si xɔa edzi sena la kpɔa nu vɔ̃wo ƒe tsɔtsɔke to eƒe ŋkɔ me.” 44  Esi Petro ganɔ nu ƒom tso nu siawo ŋu la, gbɔgbɔ kɔkɔe la va ame siwo katã nɔ nya la sem la dzi. 45  Eye nyateƒetɔ siwo kplɔ Petro ɖo va, siwo tso aʋatsotsotɔwo dome la ƒe nu ku, elabena wonɔ gbɔgbɔ kɔkɔe ƒe nunana faa la kɔm ɖe dukɔwo me tɔwo hã dzi. 46  Elabena wosee wonɔ gbe bubuwo dom henɔ Mawu dom ɖe dzi. Tete Petro gblɔ be: 47  “Ðe ame aɖe ate ŋu axe mɔ ɖe tsi nu, be woaganyrɔ ame siawo, siwo hã xɔ gbɔgbɔ kɔkɔe la abe míawo ke ene, la oa?” 48  Ale wòde se be woanyrɔ wo le Yesu Kristo ƒe ŋkɔ me. Eye woɖe kuku nɛ be wòanɔ yewo gbɔ ŋkeke aɖewo.

Etenuŋɔŋlɔ

Ŋdɔ ga 3 lɔƒo.
Ŋdɔ ga 12 lɔƒo.
Ŋdɔ ga 3 lɔƒo.