Dzo kpo yi emenuwo dzi

Dzo kpo yi emenuawo dzi

2 Timoteo 4:1-22

4  Mele se dem na wò vevie le Mawu kple Kristo Yesu, ame si woɖo be wòadrɔ̃ ʋɔnu agbagbeawo kple kukuawo, la ŋkume, to eƒe ɖeɖe fia kple fiaɖuƒe la dzi:  ɖe gbeƒã nya la, nɔ edzi vevie le nɔnɔme deamedziwo me, le nɔnɔme madeamedziwo me, gbe nya, ka mo, xlɔ̃ nu, le dzigbɔgbɔ blewu katã kple nufiafiaɖaŋu me.  Elabena ɣeyiɣi aɖe ava, esime womaxɔ nufiafia nyuitɔ la o, ke boŋ le woawo ŋutɔwo ƒe nudzodzrowo nu la, woaƒo nufialawo nu ƒu na wo ɖokuiwo, bene woalũ tome na wo;  eye woaɖe to ɖa le nyateƒe la ŋu, evɔ woatrɔ ɖe gliwo ya ŋu.  Ke wò la, nɔ mo xexi le nuwo katã me, do dzi le vɔ̃ me, wɔ nya nyui gblɔla ƒe dɔ, wɔ wò subɔsubɔdɔ la de goe bliboe.  Elabena wotsɔm le kɔkɔm ɖi abe nunovɔsa ene xoxo, eye asiɖeɖe le ŋunye ƒe ɣeyiɣi la gogo.  Ʋiʋli nyui lae meʋli, mewu duɖimekeke la nu, melé xɔse la me ɖe asi.  Tso fifia dzi heyina la, wodzra dzɔdzɔenyenye ƒe dziɖuɖukuku la ɖo ɖi nam, si Aƒetɔ la, ʋɔnudrɔ̃la dzɔdzɔe la, atsɔ anam abe fetu ene le ŋkeke ma dzi, ke hã, menye na nye ɖeɖe ko o, ke na ame siwo katã lɔ̃ eƒe ɖeɖe fia la hã.  Dze agbagba ɖe sia ɖe nàva gbɔnye kaba. 10  Elabena Dema gblẽm ɖi, le esi wòlɔ̃ fifi nuɖoanyi sia ta, eye wòdzo yi Tesalonika; Kreske yi Galatia, Tito yi Dalmatia. 11  Luka ɖeɖe koe le gbɔnye. Kplɔ Marko, ne mia kplii miava, elabena enye kpeɖeŋutɔ nyui aɖe nam le subɔsubɔ gome. 12  Gake medɔ Tixiko ɖe Efeso. 13  Ne ègbɔna la, tsɔ awu ʋlaya si megblẽ ɖe Troa ɖe Karpo gbɔ, kpakple agbalẽ xatsaxatsaawo, vevietɔ lãgbalẽawo, ɖe asi vae. 14  Aleksandro si nye akɔblinutula la wɔ nuvevi geɖem—Yehowa aɖo eteƒe nɛ ɖe eƒe dɔwɔwɔwo nu— 15  eye wò hã kpɔ ɖokuiwò dzi nyuie le eŋu, elabena etsi tsitre ɖe míaƒe nyawo ŋu vevie. 16  Le ɖokuinye ta ʋiʋli gbãtɔ me la, ame aɖeke mede dzinye o, ke boŋ wo katã wogblẽm ɖi—womegabu esia na wo o— 17  gake Aƒetɔ la nɔ tsitre ɖe gbɔnye, eye wòdo ŋusẽm, bene woawɔ gbeƒãɖeɖedɔ la ade goe bliboe to dzinye, eye be dukɔwo katã nasee; eye woɖem tso dzata la ƒe nu me. 18  Aƒetɔ la aɖem tso dɔwɔwɔ vɔ̃ ɖe sia ɖe me, eye wòaxɔm ɖe eƒe dziƒofiaɖuƒe la me. Eya tɔ nanye ŋutikɔkɔe tso mavɔ me yi mavɔ me. Amen. 19  Do gbe na Priska kple Akwila kpakple Onesiforo ƒe aƒe la nam. 20  Erasto tsi Korinto, gake megblẽ Trofimo ɖe Mileto, elabena enɔ dɔ lém. 21  Dze agbagba ɖe sia ɖe nàva ɖo hafi vuvɔŋɔli naɖo. Eubulo do gbe na wò, eye Pude kple Lino kple Klaudia kpakple nɔviawo katã hã do gbe na wò. 22  Aƒetɔ la nenɔ anyi kple gbɔgbɔ si nèɖena fiana la. Eƒe amenuveve nanɔ anyi kpli mi.

Etenuŋɔŋlɔ