Dzo kpo yi emenuwo dzi

Dzo kpo yi emenuawo dzi

2 Timoteo 2:1-26

2  Eya ta wò la, vinye, yi edzi nànɔ ŋusẽ kpɔm le amenuveve si le Kristo Yesu me la me,  eye nu siwo nèse le gbɔnye, siwo dzi ɖasefo geɖewo hã ɖo kpee la, tsɔ nu siawo de asi na nyateƒetɔwo; ekema woawo hã woadze nyuie be woafia nu ame bubuwo.  Esi nènye Kristo Yesu ƒe asrafo nyui ta la, kpe fu si wòle be nàkpe le vɔ̃ me la.  Ame si le asrafodɔ wɔm la megaƒoa eɖokui ɖe agbemesitsatsadɔwo me o, bene wòadze ame si xɔe abe asrafo ene la ŋu.  Gawu la, ne ame aɖe le gome kpɔm le hoʋiʋliawo me la, womeɖɔa dziɖuɖukuku nɛ o, negbe ɖeko wòʋli ho la le ɖoɖoawo nu hafi.  Agbledela si doa vevie nu la, eyae wòle be wòatre kutsetseawo ƒe ɖe ɖuɖu.  De ŋugble le nya si gblɔm mele la ŋu ɣeawokatãɣi; Aƒetɔ la ana nugɔmesese wò le nuwo katã me godoo.  Ðo ŋku edzi be, wofɔ Yesu Kristo ɖe tsitre tso ame kukuwo dome, eye wònye David ƒe dzidzimevi le nya nyui, si meɖea gbeƒãe, la nu;  si ta mele fu kpem le vɔ̃ me keke va ɖo gaxɔ me bablawo me ke abe nu vɔ̃ wɔla ene ɖo. Ke hã, womebla Mawu ƒe nyaa ya o. 10  Esia tae meyi edzi le dzi dom le nu sia nu me le ame tiatiawo ta, bene woawo hã nakpɔ ɖeɖe si le Kristo Yesu me, hekpe ɖe ŋutikɔkɔe mavɔ ŋuti. 11  Nya sia nye nyateƒe: Ɛ̃, ne míeku kplii la, ekema míanɔ agbe hã kplii; 12  ne míeyi edzi do dzi la, míaɖu fia hã kplii; ne míegbe nu le egbɔ la, eya hã agbe nu le mía gbɔ; 13  ne míenye nyateƒetɔwo o hã la, eya kpɔtɔ nye nyateƒetɔ, elabena mate ŋu agbe nu le eɖokui gbɔ o. 14  Yi edzi nànɔ ŋku ɖom nu siawo dzi na wo, eye nàde se na wo le Mawu ŋkume abe ɖasefo ene, be woaganɔ dzre wɔm le nyawo ŋu o, nu si ŋu viɖe aɖeke mele o, le esi wògblẽa nu le ame siwo sea wo ŋu la ta. 15  Wɔ wò ŋutete ɖe sia ɖe nàtsɔ ɖokuiwò afia Mawu abe ame si dze eŋu ene, dɔwɔla si mehiã be ŋu nakpe le naneke ŋuti o, ame si wɔa nyateƒenya la ŋu dɔ pɛpɛpɛ. 16  Gake gbe dzeɖoɖo ƒuƒlu, siwo medea asixɔxɔ nu si le kɔkɔe ŋu o la; elabena woayi edzi le mawumavɔ̃mavɔ̃ me geɖe wu, 17  eye woƒe nya la akeke abe abi vɔ̃ ene. Himenayo kple Fileto le ame siawo dome. 18  Ame siawo trɔ ɖa le nyateƒe la ŋu, eye wole gbɔgblɔm be tsitretsitsi la va yi xoxo; eye wole ame aɖewo ƒe xɔse trɔm le anyi tsyɔm. 19  Ke hã, Mawu ƒe gɔmeɖoanyi sesẽ la le tsitre sesĩe, eye nutrenu sia le eŋu: “Yehowa nya ame siwo nye etɔ,” eye: “Ame sia ame si le Yehowa ƒe ŋkɔ yɔm la, neɖe asi le madzɔmadzɔnyenye ŋu.” 20  Ke le aƒe gã me la, menye nugoe siwo wotsɔ sika kple klosalo wɔ la ɖeɖe koe nɔa anyi o, ke boŋ esiwo wotsɔ ati kple anyi wɔ hã nɔa anyi, ɖewo li siwo woazã na nu si ŋu bubu le, gake ɖewo hã li siwo woazã na nu si ŋu bubu mele o. 21  Eya ta ne ame aɖe te ɖe aga tso mamlɛtɔ siawo ŋu la, anye nugoe si woazã na nu si ŋu bubu le, si ŋu wokɔ, si ŋu viɖe le na eƒe aƒetɔ, si wodzra ɖo ɖi hena dɔ nyui sia dɔ nyui wɔwɔ. 22  Eya ta si le sɔhɛmenɔɣi ƒe nudzodzrowo nu, ke boŋ dze dzɔdzɔenyenye, xɔse, lɔlɔ̃, ŋutifafa yome hekpe ɖe ame siwo yɔa Aƒetɔ la tso dzi dzadzɛ me la ŋu. 23  Gawu la, gbe bometsitsi ƒe nyahehe siwo me susu aɖeke mele o, esi nènyae be wohea dzre vanɛ ta. 24  Ke mele be Aƒetɔ la ƒe kluvi nawɔ dzre o, ke boŋ ele be wòafa tu na amewo katã, wòanya nufiafia, wòaɖu eɖokui dzi le vɔ̃ me, 25  wòafia nu tsitretsiɖeŋulawo le tufafa me; elabena ɖewohĩ Mawu ana dzimetɔtrɔ wo, si akplɔ wo ava nyateƒe ƒe sidzedze vavãtɔ gbɔ, 26  eye woaganyɔ le wo ɖokuiwo me tso Abosam ƒe mɔ me, esi wokpɔe be ɖe wòlé yewo agbagbee hena eƒe lɔlɔ̃nu wɔwɔ ta.

Etenuŋɔŋlɔ