Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

2 Timoteo 1:1-18

1  Paulo, Kristo Yesu ƒe apostolo to Mawu ƒe lɔlɔ̃nu me, le agbe si le Kristo Yesu me la ƒe ŋugbedodo la nu,  le esia ŋlɔm na vinye lɔlɔ̃tɔ Timoteo: Amenuveve kple nublanuikpɔkpɔ kple ŋutifafa si tso Mawu Fofo la, kple Kristo Yesu, mía Aƒetɔ gbɔ la, nanɔ anyi kpli wò.  Medaa akpe na Mawu, ame si metsɔ dzitsinya dzadzɛ le subɔsubɔdɔ kɔkɔe wɔm na, abe ale si tɔgbuinyewo wɔe ene be, nyemedzudzɔ ŋkuɖoɖo dziwò le nye kokoƒoƒowo me o zã kple keli,  eye ele dzroyem vevie be makpɔ wò, elabena meɖoa ŋku wò aɖatsiwo dzi, bene mayɔ fũu kple dzidzɔ.  Elabena meɖoa ŋku xɔse si le mewò alakpanuwɔwɔ manɔmee, si nɔ mamawò Lois kple dawò Eunike me gbã, eye meka ɖe edzi be ele wò hã mewò, la dzi.  Susu sia tututu tae mele ŋku ɖom edzi na wò be, nàde dzo Mawu ƒe nunana si le mewò to nye asiwo dada ɖe dziwò me la me.  Elabena Mawu mena vɔvɔ̃gbɔgbɔ mí o, ke ŋusẽ kple lɔlɔ̃ kpakple ŋuɖɔɖo ƒe gbɔgbɔ boŋ.  Eya ta ŋu negakpe wò le ɖaseɖiɖi tso mía Aƒetɔ la ŋu o, alo le nye, ame si nye gamenɔla le eyama ta, la ŋuti o, ke boŋ kpɔ gome le fukpekpe le vɔ̃ me me le nya nyui la ta, le Mawu ƒe ŋusẽ la nu.  Eɖe mí, eye wòtsɔ yɔyɔ kɔkɔe yɔ mí, menye le míaƒe dɔwɔwɔwo ta o, ke boŋ le ye ŋutɔ ƒe tameɖoɖo kple amenuveve la ta. Wona esia mí le Kristo Yesu me hafi ɣeyiɣi mavɔmavɔwo dze egɔme, 10  gake azɔ la, wona wòdze ƒãa to mía Xɔla, Kristo Yesu, ƒe ɖeɖe fia la me, ame si ɖe ku ɖa, gake wòna kekeli klẽ ɖe agbe kple magblẽmagblẽ dzi to nya nyui la dzi, 11  nya nyui si ƒe gbeƒãɖela kple apostolo kpakple nufiala woɖom. 12  Nu sia tututu tae nye hã mele nu siawo ƒe fu kpem ɖo, gake ŋu mekpeam o. Elabena menya ame si dzi mexɔ se, eye meka ɖe edzi be ate ŋu adzɔ nu si metsɔ de esi la ŋu va se ɖe ŋkeke ma dzi. 13  Yi edzi nàlé nya nyuitɔwo, siwo nèse le gbɔnye kple xɔse kpakple lɔlɔ̃ si le Kristo Yesu me la ƒe kpɔɖeŋu me ɖe asi. 14  Dzɔ nu nyui sia si wotsɔ de asiwò la ŋu to gbɔgbɔ kɔkɔe si le mewò la dzi. 15  Ènyae be ame siwo katã le Asia nutoa me la trɔ ɖa le ŋunye. Figelo kple Hermogene le ame siawo dome. 16  Aƒetɔ la nekpɔ nublanui na Onesiforo ƒe aƒe la, elabena efa dzi nam zi geɖe, eye nye kɔsɔkɔsɔwo mekpe ŋu nɛ o. 17  Ke boŋ esi wòva Roma la, eku kutri dim vevie, eye wòkpɔm. 18  Aƒetɔ Yehowa nekpɔ nublanui nɛ le ŋkeke ma dzi. Eye subɔsubɔdɔ siwo katã wòwɔ le Efeso la, ènya wo nyuie.

Etenuŋɔŋlɔ