Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

2 Petro 2:1-22

2  Ke hã, aʋatsonyagblɔɖilawo va nɔ ameawo dome, abe ale si ko aʋatsonufialawo ava nɔ miawo hã mia dome ene. Ame siawo atsɔ kɔmama siwo agblẽ nu la ava tra ɖe eme dzaa, eye woagbe nu le aƒetɔ si ƒle wo la kura gɔ̃ hã gbɔ, eye woahe tsɔtsrɔ̃ kpata ava wo ɖokuiwo dzi.  Gawu la, ame geɖewo adze woƒe ŋukpenanuwɔnawo yome, eye le ame siawo ta la, woaƒo nu gbegblẽ tso nyateƒea ƒe mɔ la ŋu.  Eye le ŋubiabiã ta la, woakpa nyawo atsɔ adi viɖe le mia ŋu. Gake woƒe ʋɔnudɔdrɔ̃ si li tso blema ke la mele hehem ɖe megbe o, eye woƒe tsɔtsrɔ̃ mele akɔlɔ̃e dɔm o.  Vavãe, ne Mawu mehe ɖe megbe le tohehe na mawudɔla siwo wɔ nu vɔ̃ me o, ke boŋ wòtsɔ wo de asi na blukɔ tsiɖitsiɖi ƒe dowo bene woadzra wo ɖo ɖi na ʋɔnudɔdrɔ̃ to wo tsɔtsɔ ƒu gbe ɖe Tartaro me;  eye mehe ɖe megbe le tohehe na blemaxexe aɖe me o, gake wòkpɔ Noa, dzɔdzɔenyenye ƒe gbeƒãɖela, kpakple ame adre bubuwo ta dedie esime wòhe tsiɖɔɖɔ va ame mavɔ̃mawuwo ƒe xexe aɖe dzi;  eye wòbu fɔ du siwo nye Sodom kple Gomora to nana be wozu afi me, wònye nu siwo ava va la ƒe kpɔɖeŋu na ame mavɔ̃mawuwo;  eye wòɖe ame dzɔdzɔe Lot, si sedzidalawo ƒe ŋukpenanuwɔwɔ atraɖii ɖe fu na vevie la—  elabena nu si ame dzɔdzɔe ma kpɔna hesena gbe sia gbe esi wònɔ wo dome la nɔa fu wɔm eƒe luʋɔ dzɔdzɔe la le woƒe sedzimawɔmawɔ nuwɔnawo ta—  Yehowa nya ale si wòaɖe ame siwo tsɔ wo ɖokui na Mawu la tso tetekpɔ me, gake wòadzra ame madzɔmadzɔwo ɖo hena ʋɔnudrɔ̃gbe, bene woaɖe wo ɖa, 10  gake vevietɔ la, ame siwo dzea ŋutilã la yome kple didi be woaƒo ɖii, eye wodoa vlo aƒetɔnyenye la. Esi wonye ame siwo mevɔ̃a naneke o kple ɖokuiŋudzelawo ta la, womebua ŋutikɔkɔemewo o, ke boŋ wogblɔa nya gbegblẽwo, 11  evɔ mawudɔlawo, ame siwo nye gã wu le ŋutete kple ŋusẽ me la, metsoa wo nu to nya gbegblẽwo gbɔgblɔ ɖe wo ŋu me o, womewɔnɛ o, le esi wodea bubu Yehowa ŋu ta. 12  Gake ame siawo, siwo le abe lã manyanu siwo li tso dzɔdzɔme hena léle kple tsɔtsrɔ̃ ene la, akpɔ tsɔtsrɔ̃ le woawo ŋutɔ ƒe tsɔtsrɔ̃mɔ la dzi, le nu siwo ŋu womenya naneke le o, siwo ŋu woƒoa nu gbegblẽ le la me, 13  eye wole nuvevi wɔm wo ɖokuiwo wònye woƒe nu vɔ̃ɖi wɔwɔ ƒe fetu. Wobua agbeɖuɖu le ŋkeke me abe dzidzɔdonamenu ene. Ðiƒoƒowo kple nuwɔamewo wonye, eye wòdzɔa dzi na wo vevie be woatsɔ alakpanufiafiawo able mi ne wole nu ɖum kpli mi. 14  Ŋku siwo yɔ fũu kple ahasiwɔwɔ, eye womete ŋu trɔna ɖa le nu vɔ̃ ŋu o la, li na wo, eye woblea luʋɔ malikewo. Dzi si wotsɔ ŋubiabiã mla la li na wo. Fiƒodeviwo wonye. 15  Esi wogblẽ mɔ dzɔdzɔe la ɖi ta la, wotra mɔ. Woto Bileam, Beor vi, ƒe mɔ dzi, ame si lɔ̃ nu vɔ̃ɖi wɔwɔ ƒe fetu, 16  gake wogbe nya nɛ le nu si nyo la mawɔmawɔ ta. Dɔwɔlã maƒonu, si tsɔ ame ƒe gbe ƒo nu la, xe mɔ na nyagblɔɖila la ƒe aɖaʋanuwɔna. 17  Ame siawo nye vudo siwo me tsi mele o, afu siwo ahom sesẽwo lɔ ɖe nu, eye woɖo blukɔ tsiɖitsiɖi ɖi na wo. 18  Elabena wogblɔa nya gã nya gã siwo ŋu viɖe aɖeke mele o, eye wotsɔa ŋutilã ƒe nudzodzrowo kple agbenɔnɔ gbegblẽwo blea ame siwo si le nu gbegblẽ wɔlawo gbɔ teti koe nye ema la. 19  Togbɔ be wole ablɔɖe ŋugbe dom na wo hã la, woawo ŋutɔwo wonye kluviwo na nu gbegblẽ wɔwɔ. Elabena ame si dzi ame aɖe ɖu la, ame ma wɔnɛ kluvii. 20  Le nyateƒe me la, ne wosi le xexea me nu makɔmakɔwo gbɔ to Aƒetɔ kple Ðela Yesu Kristo ŋuti sidzedze vavãtɔ me, hafi gaƒo wo ɖokuiwo ɖe nu siawo ke me, eye nuawo ɖu wo dzi la, ekema woƒe nɔnɔme mlɔetɔwo va gblẽna wu gbãtɔwo. 21  Elabena ne ɖe womenya dzɔdzɔenyenye ƒe mɔ la nyuie o la, ne enyo na wo wu, be woanyae nyuie hafi agatrɔ ɖa le sedede kɔkɔe si wotsɔ na wo la yome. 22  Nya si nyateƒelododo la gblɔ la dzɔ ɖe wo dzi be: “Avu gbugbɔ yi ye ŋutɔ ƒe xeɖeɖe gbɔ, eye ha si wole tsi na la, gale mimlim le ba me.”

Etenuŋɔŋlɔ