Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

2 Petro 1:1-21

1  Simon Petro, Yesu Kristo ƒe kluvi kple apostolo, le esia ŋlɔm na ame siwo wona mɔnukpɔkpɔ be xɔse su wo si abe míawo ke ene, to mía Mawu kple mía Ðela Yesu Kristo ƒe dzɔdzɔenyenye me:  Amenuveve kple ŋutifafa nasɔ gbɔ ɖe edzi na mi to Mawu kple Yesu mía Aƒetɔ la ŋuti sidzedze vavãtɔ me,  elabena eƒe mawumeŋusẽ tsɔ nu siwo katã ku ɖe agbe kple ɖokuitsɔtsɔ na Mawu ŋu la ke mí, to ame si tsɔ ŋutikɔkɔe kple nɔnɔme nyui yɔ mí la ŋuti sidzedze vavãtɔ me.  Nu siawo me wòto tsɔ ŋugbedodo xɔasi gãtɔwo ke mí, bene miato esiawo me azu gomekpɔlawo le Mawu ƒe nɔnɔme me, esi miesi le gbegblẽ si le xexea me, le nudzodzro vɔ̃wo ta, la gbɔ.  Ɛ̃, le susu sia tututu ta la, miku kutri vevie miatsɔ nɔnɔme nyui akpe ɖe miaƒe xɔse la ŋu, sidzedze nekpe ɖe miaƒe nɔnɔme nyui la ŋu,  ɖokuidziɖuɖu nekpe ɖe miaƒe sidzedze la ŋu, dzidodo nekpe ɖe miaƒe ɖokuidziɖuɖu la ŋu, ɖokuitsɔtsɔ na Mawu nekpe ɖe miaƒe dzidodo la ŋu,  nɔvilɔlɔ̃ nekpe ɖe miaƒe ɖokuitsɔtsɔ na Mawu la ŋu, lɔlɔ̃ nekpe ɖe miaƒe nɔvilɔlɔ̃ la ŋu.  Elabena ne nu siawo le mia me, eye wogba go la, awɔe be mianye gbɔdzɔgbɔdzɔtɔwo loo alo ame matsekuwo o le mía Aƒetɔ Yesu Kristo ŋuti sidzedze vavãtɔ la gome.  Elabena ne nu siawo mele ame aɖe me o la, enye ŋkuagbãtɔ, si medi be yeakpɔ kekeli o, eye wòzu ame si ŋlɔa ale si woklɔ eƒe tsã nu vɔ̃wo ɖa le eŋui la be. 10  Esia ta nɔviwo, miwɔ miaƒe ŋutete ɖe sia ɖe, be kakaɖedzi nasu mia ŋutɔwo mia si le mia yɔyɔ kple mia tiatia la ŋu; elabena ne mieyi edzi wɔa nu siawo la, ekema miadze anyi akpɔ gbeɖe o. 11  Le nyateƒe me la, ale woana mɔnukpɔkpɔ gã mi be, miage ɖe mía Aƒetɔ kple Ðela Yesu Kristo ƒe fiaɖuƒe mavɔ la me. 12  Le susu sia ta la, manɔ klalo ɣesiaɣi be maɖo ŋku nu siawo dzi na mi, togbɔ be mienya wo, eye mieli ke sesĩe le nyateƒe si le mia me fifia la me hã. 13  Gake mekpɔe be enyo, zi ale si mekpɔtɔ le agbadɔ sia me, be manyɔ mi to ŋkuɖodzinya siawo dzi, 14  esi menyae be magadidi hafi woaɖe nye agbadɔ la ɖa o, abe ale si mía Aƒetɔ Yesu Kristo hã ɖee fiam ene. 15  Eya ta nye hã mawɔ nye ŋutete ɖe sia ɖe ɣesiaɣi, bene le nye dzodzo megbe la, mianɔ ŋku ɖom nu siawo dzi na mia ɖokuiwo. 16  Ao, menye gli siwo wokpa kple aɖaŋu yomee míedze esi míena mienya mía Aƒetɔ Yesu Kristo ƒe ŋusẽ kple anyinɔnɔ la o, ke boŋ esi míekpɔ eƒe gãnyenye kple atsyɔ̃ teƒe tae. 17  Elabena exɔ bubu kple ŋutikɔkɔe tso Mawu Fofo la gbɔ, esime wòse nya siawo le ŋutikɔkɔe gã la me be: “Ame siae nye vinye, si gbɔ nyemelɔ̃a nu le o, si dze nye ŋutɔ ŋunye.” 18  Ɛ̃, nya siawoe míese tso dziƒo esi míenɔ to kɔkɔe la dzi kplii. 19  Eya ta kakaɖedzi geɖe wu va le nyagblɔɖinya la ŋu na mí; eye miewɔnɛ nyuie be mieléa ŋku ɖe eŋu abe akaɖi si le keklẽm le tsyɔtsyɔƒe ene, va se ɖe fɔŋli esime ŋukeɣletivi adze, le miaƒe dziwo me. 20  Elabena mienya esia gbã be: Ŋɔŋlɔ la me nyagblɔɖi aɖeke metso ame ŋutɔ ƒe gɔmeɖeɖe gbɔ o. 21  Elabena nyagblɔɖi aɖeke metso ame ƒe lɔlɔ̃nu me ɣeaɖekeɣi kpɔ o, ke boŋ gbɔgbɔ kɔkɔe ye ʋã amewo wogblɔ Mawu ƒe nyawo ɖi.

Etenuŋɔŋlɔ