2 Korintotɔwo 7:1-16

7  Eya ta esi ŋugbedodo siawo le mía si ta la, lɔlɔ̃tɔwo, mina míakɔ mía ɖokui ŋu tso ŋutilã kple gbɔgbɔ ƒe ɖiƒoƒo sia ɖiƒoƒo me, eye míato mawuvɔvɔ̃ dzi ana míaƒe kɔkɔenyenye la nanɔ blibo zum ɣesiaɣi.  Miɖe mɔ na mí. Míeda vo ɖe ame aɖeke ŋu o, míegblẽ ame aɖeke o, míeba ame aɖeke o.  Nyemele esia gblɔm be mabu fɔ mi o. Elabena megblɔe xoxo be, miele míaƒe dziwo me, bene miaku kpli mí, eye mianɔ agbe kpli mí.  Metea ŋu ƒoa nu na mi faa. Meƒoa adegbe geɖe le mia ta. Akɔfafa yɔm taŋ, mele dzidzɔ kpɔm glo le míaƒe fukpekpe la katã me.  Le nyateƒe me la, esi míeva ɖo Makedonia la, míaƒe ŋutilã mekpɔ gbɔdzɔe aɖeke o, ke boŋ woyi edzi wɔ fu mí le go sia go me—ʋiʋliwo nɔ egodo, vɔvɔ̃wo nɔ ememe.  Ke hã, Mawu, ame si faa akɔ na ame siwo ŋu nu te la, tsɔ Tito ƒe anyinɔnɔ fa akɔ na mí.  Ke hã, menye to eƒe anyinɔnɔ la ɖeɖe ko dzi o, ke to akɔfafa si wotsɔ fa akɔ nɛ le mia ta hã dzi, elabena egava gblɔ miaƒe didi vevi kple miaƒe nuxaxa kpakple miaƒe veviedodo ɖe tanye ŋu nya na mí; eye esia na mekpɔ dzidzɔ geɖe wu.  Esia tae ne meto nye agbalẽa dzi na miexa nu hã la, mevem o. Ne evem gbã hã la, (mekpɔe be agbalẽ ma do nuxaxa na mi, gake ɣeyiɣi vi aɖe koe)  azɔ la, mele dzidzɔ kpɔm, menye esi wòdo nuxaxa na mi ta ko o, ke esi wòna miexa nu hena dzimetɔtrɔ ta boŋ; elabena ena miexa nu wòsɔ ɖe Mawu ƒe lɔlɔ̃nu nu, bene naneke nagabu na mi, si atso mía gbɔ o. 10  Elabena nuxaxa si sɔ ɖe Mawu ƒe lɔlɔ̃nu nu nana wotrɔa dzi me hena ɖeɖekpɔkpɔ si mave ame o; gake nuxaxa si sɔ kple xexea tɔ la hea ku vanɛ. 11  Elabena mikpɔ ale si nu sia tututu—nuxaxa sia si sɔ ɖe Mawu ƒe lɔlɔ̃nu nu—na miedo vevie nui ɖa, ɛ̃, miekɔ mia ɖokui ŋu, ɛ̃, miedo dziku wòsɔ, ɛ̃, vɔvɔ̃ ɖo mi, ɛ̃, didi vevi nɔ mia me, ɛ̃, mietsɔ dzo ɖe nu ŋu, ɛ̃ mieɖɔ nu si gblẽ la ɖo! Mieɖee fia le go sia go me be yewole dzadzɛ le nya sia me. 12  Vavãe, togbɔ be meŋlɔ nu na mi hã la, menye ame si wɔ vodada alo ame si ŋu woda vo ɖo tae meŋlɔe ɖo o, ke boŋ bene miaƒe veviedodo le mía ŋuti la nadze le mia dome le Mawu ŋkume. 13  Esia tae wofa akɔ na mí ɖo. Ke hã, hekpe ɖe míaƒe akɔfafa sia ŋu la, míegakpɔ dzidzɔ geɖe wu le Tito ƒe dzidzɔ la ŋuti, elabena mi katã miena eƒe gbɔgbɔ kpɔ dzidzeme. 14  Elabena ne meƒo adegbe le nane me tso mia ŋu le eŋkume la, mezu ŋukpe nam o; ke boŋ ale si míegblɔ nyawo katã na mi le nyateƒe me la, nenema kee adegbe si míeƒo le Tito ŋkume la hã nye nyateƒe. 15  Eye miaƒe nu lé dzi nɛ geɖe wu, esi wòɖoa ŋku mi katã miaƒe toɖoɖo la dzi, ale si mietsɔ vɔvɔ̃ kple dzodzo nyanyanya xɔe. 16  Dzi le dzɔyem be le mɔ sia mɔ nu la, dzideƒo geɖe ate ŋu asu asinye le mia ta.

Etenuŋɔŋlɔ