2 Korintotɔwo 6:1-18

6  Esi míewɔa dɔ kplii aduadu ta la, míele kuku ɖem na mi vevie hã be, miagaxɔ Mawu ƒe amenuveve la, evɔ ada taɖodzinu si le eŋu ya ƒu o.  Elabena egblɔ be: “Meɖo to wò le amenuveɣi, eye mekpe ɖe ŋuwò le xɔxɔgbe la.” Kpɔ ɖa! Fifia koŋ ye nye amenuveɣi la. Kpɔ ɖa! Fifiae nye xɔxɔ ƒe ŋkeke la.  Míewɔa naneke si azu nukikli le mɔ aɖeke nu o, bene woagakpɔ vodada le míaƒe subɔsubɔdɔ la ŋu o;  ke boŋ míeɖea mía ɖokui fiana le mɔ sia mɔ nu be míenye Mawu ƒe subɔlawo, to dzidodo le nu geɖewo me, le xaxawo me, le hiãkamewo me, le fukpekpewo me,  le ƒoƒowo me, le gaxɔwo me, le zitɔtɔwo me, le agbagbadzedzewo me, le zãdomadɔlɔ̃e me, le ɣeyiɣi siwo me míekpɔa nu ɖuna o me,  to dzadzɛnyenye dzi, to sidzedze dzi, to dzigbɔgbɔ blewu dzi, to dɔmenyonyo dzi, to gbɔgbɔ kɔkɔe dzi, to lɔlɔ̃ si me alakpanuwɔwɔ mele o dzi,  to nyateƒetoto dzi, to Mawu ƒe ŋusẽ dzi; to dzɔdzɔenyenye ƒe aʋawɔnu siwo le ɖusi kple mia me dzi;  to ŋutikɔkɔe kple bubumanɔameŋu dzi, to nyatakaka vɔ̃ kple nyatakaka nyui dzi; abe ameblelawo ene, evɔ nyateƒetɔwoe;  abe ame siwo womenya o ene, evɔ wonya wo nyuie hafi; abe ame siwo le kukum ene, ke hã, kpɔ ɖa! míele agbe; abe ame siwo wohe to na ene, ke hã, wometsɔ wo de asi na ku o; 10  abe ame siwo le nu xam ene, ke hã, wokpɔa dzidzɔ ɣesiaɣi; abe ame dahewo ene, ke hã, wona ame geɖewo zua kesinɔtɔwo; abe ame siwo si naneke mele o ene, evɔ nuwo katã le wo si hafi. 11  Korintotɔwo, míeƒo nu na mi faa, míaƒe dzi keke. 12  Miexaxa le mía me o, ke boŋ miexaxa le mia ŋutɔwo miaƒe lɔlɔ̃ɖeɖefia me. 13  Eya ta nu si miawɔ atsɔ aɖo eteƒe lae nye be—mele nu ƒom na mi abe ɖeviwoe mienye ene—miawo hã mikeke mia ɖokui. 14  Migazu ame siwo nɔa kɔkuti ɖeka te kple dzimaxɔsetɔwo o, elabena mesɔ o. Elabena hadede kae le dzɔdzɔenyenye kple sedzimawɔmawɔ dome? Alo gome kae le kekeli si le viviti gbɔ? 15  Gawu la, ɖekawɔwɔ kae le Kristo kple Belial dome? Alo gome kae le nuteƒewɔla si le dzimaxɔsetɔ gbɔ? 16  Eye ɖekawɔwɔ kae le Mawu ƒe gbedoxɔ kple trɔ̃wo dome? Elabena Mawu gbagbe ƒe gbedoxɔ míenye; abe ale si Mawu gblɔe ene be: “Manɔ wo dome, eye mazɔ wo dome, eye manye woƒe Mawu, eye woanye nye dukɔ.” 17  “‘Eya ta mido go le wo dome, eye miɖe mia ɖokui ɖa,’ Yehowa ye gblɔe, ‘eye midzudzɔ asikaka nu makɔmakɔ la ŋu’”; “‘eye maxɔ mi.’” 18  “‘Eye manye fofo na mi, eye miawo mianye viŋutsuwo kple vinyɔnuwo nam,’ Yehowa Ŋusẽkatãtɔ lae gblɔe.”

Etenuŋɔŋlɔ